Elimizde iri saýda bazarlary jańartylady

QR Saýda jáne ıntegratsııa mınıstri Arman Shaqqalıev saýda bazarlaryn jańartý jumystary týraly aıtyp berdi, dep habarlaıdy Kazinform. 

«Bazarlar zamanaýı talaptarǵa saı bolýy qajet. Tutynýshylar men kásipkerler úshin qolaıly statsıonarlyq ǵımarattar, eń bastysy órt, sanıtarlyq jáne qurylys qaýipsizdigi normalaryna saı bolýy kerek. Biz saýdanyń ártaraptylyǵyn qoldaımyz. Biraq kóleńkeli saýda men antısanıtarııaǵa jol joq», - dedi mınıstr elordada ótken brıfıngte.

Sonymen qatar mınıstr bazar ákimshiligi men jalǵa alýshylardyń arasynda reglamenttiń joqtyǵy, jaldaý aqysyn kóterý, qosymsha qyzmetterdi júkteý syndy problemalar bar ekenin, shaǵymdar da kóp túsetinin jetkizdi.

«Problemalardyń bir bóligi zańnamalyq deńgeıde sheshildi. Menshik ıeleriniń saýdany uıymdastyrýdaǵy jeke jaýapkershilik engizildi, bazarlarǵa qoıylatyn talaptar anyqtaldy, bazarlarda tsıfrlandyrý jáne jańǵyrý jumystary júrgizilip jatyr. Smart QR-da búgingi tańda júıede 240 saýda obekt tirkelgen. Sońǵy jyldary pandemııa, geosaıası shılenister saldarynan jańǵyrtý jumystary eki ret keıinge ysyryldy. Endi 2025 jylǵa deıingi saýda bazarlaryn jańǵyrtý jol kartasyn ázirledik», - dedi mınıstr.

Resmı derekter boıynsha Qazaqstanda 722 bazar (460 ámbebap, 262 mamandandyrylǵan) jumys isteıdi. 2023 jylǵa elimizde 16 bazardy jańǵyrtý josparlanǵan. 2024 jyly – 24 bazar, 2025 jyly 35 bazar jańartylady.

«Biz osy jyldyń sońyna deıin 11 bazardy jańartýdy josparlap otyrmyz. Olardyń qatarynda Almatyda – 6 bazar (Baısat, Kazyna, Barys-4, Ójet, Almaty-1, Túrksib), Shymkentte Aına bazary, Túrkistan oblysynda – 4 bazar (Kúlparshyn, Ortalyq, Daýlet, Alyp) bar», - dedi A.Shaqqalıev.