Elimizde poıyz bıletteriniń qymbattaǵany ras pa
«Jolaýshylar tasymaly» AQ keıbir BAQ betterine shyqqan poıyz bıletiniń qymbattaýy týraly aqparatqa túsinik berdi, dep habarlaıdy Kazinform.
«Jolaýshylar tasymaly» AQ áleýmettik mańyzy bar oblysaralyq qatynastar boıynsha temir jol tarıfi bıyl 1 qańtarda 7%-ǵa óskenin eske salady. Tarıftiń ózgerýi Kólik mınıstrligimen kelisildi jáne baǵanyń shekti deńgeıiniń jyl saıynǵy ósýin eskere otyryp jasaldy.
Aqparatta aıtylǵandaı, áleýmettik mańyzy bar baǵyttar boıynsha júretin poıyzdardan basqa, elimizde 2014 jyldan bastap ekspress kommertsııalyq poıyzdary qatynaıdy. Kommertsııalyq poıyzdar bıletiniń quny ony satyp alý merzimine jáne bıletke suranysqa baılanysty belgilenedi.
«Sonymen qatar, elimizde poıyz bıletterin satatyn jeke agenttik kassalar jumys isteıdi. Olardyń keıbiri bıletke komıssııa baǵasyn qosyp satady», - dep túsindirdi «Jolaýshylar tasymaly» AQ baspasóz hatshysy Narıman Dúısekeev.
