Elimizde pedagogterdiń 81 paıyzy — áıelder
ASTANA.KAZINFORM — Oqý-aǵartý mınıstri Juldyz Súleımenova «BUU-Áıelder» qurylymynyń Ortalyq Azııa boıynsha úılestirý keńsesiniń basshysy ári Qazaqstandaǵy Eldik keńse ókili Djeren Gıýven Gıýrespen resmı kezdesý ótkizdi.
Basqosýǵa «BUU-áıelder» qurylymynyń Qazaqstandaǵy baǵdarlamalar basshysy Dına Amrısheva da qatysty. Taraptar bilim berý salasyndaǵy irgeli reformalardy jáne bala quqyqtaryn qorǵaý taqyrybyn talqylady.
Jıynda Memleket basshysy Qasym-Jomart Toqaevtyń tapsyrmasymen salynǵan «Keleshek mektepteri» ulttyq jobasynyń nátıjeleri týraly aıtyldy. Búgingi tańda elimizde 217 zamanaýı mektep paıdalanýǵa berilse, onyń 84-i aýyldyq jerlerde boı kótergen. Mınıstr bul qadam aýyl men qala arasyndaǵy bilim sapasynyń teńsizdigin joıýǵa jáne shalǵaı eldi mekenderde halyqaralyq standarttarǵa saı bilim oshaqtarynyń salynýyna múmkindik bergenin aıta kele, oqýshylardyń bilim alý múmkindigin teńestirý — elimizdegi memlekettik saıasattyń basym baǵyty ekenin atap ótti.
— Búginde elimizde pedagogterdiń 81 paıyzy — áıelder. TALIS-2024 halyqaralyq zertteýiniń qorytyndylary otandyq bilim berý salasyndaǵy oń nátıjelerdi kórsetti. Sońǵy jyldary Memleket basshysy Qasym-Jomart Toqaevtyń tapsyrmasymen júzege asyrylǵan irgeli reformalardyń arqasynda muǵalimderdiń 95 paıyzy óz jumysyna kóńili tolatynyn, al 80 paıyzy kásibı tańdaý múmkindigi qaıta berilse, taǵy da osy mamandyqty tańdaıtynyn bildirgen. Bul kórsetkishter muǵalim mártebesin kóterýge baǵyttalǵan Prezıdenttiń irgeli reformalarynyń tıimdiligin kórsetedi, — dedi Bilim salasyndaǵy kadrlyq áleýettiń damýyna toqtalǵan Juldyz Súleımenova.
Balalardyń quqyqtyq saýaty men qaýipsizdigin qamtamasyz etý maqsatynda mınıstrlik 10 mańyzdy zańdy ilgeriletti. Atap aıtqanda, zorlyq-zombylyqqa «nóldik tózimdilik» prıntsıpi engizilip, kámeletke tolmaǵandarǵa qarsy qylmystar úshin jaýapkershilik kúsheıtildi. 2025 jylǵy zańnamalyq jańartýlar aıasynda qorǵanshylyq talaptar kúsheıip, bala quqyqtaryn qorǵaý boıynsha óńirlik organdardyń fýnktsııalary keńeıtildi jáne memlekettik baqylaýdyń jańa tetikteri bekitildi.
Óz kezeginde Djeren Gıýven Gıýres Qazaqstannyń genderlik saıasat pen bilim berýdegi jetistikterin joǵary baǵalap, Mınıstrlikti birneshe baǵyt boıynsha seriktestikti nyǵaıtýǵa shaqyrdy. Kezdesý sońynda Juldyz Súleımenova Memleket basshysynyń áıelder qaýymyn qoldaýǵa baǵyttalǵan saıasatynyń mańyzdylyǵyn atap ótip, mártebeli meımanǵa Qazaqstannyń saıasattaǵy áıelderi týraly kitapty tartý etti.
Aıta ketelik Qazaqstan birqatar damyǵan elden ozyp, álemdik bilim berý reıtınginde top-20-ǵa endi.