Elimizde otbasylyq sottar qurylýy múmkin
Sot statıstıkasy bala tárbıesine baılanysty máselelerdiń óte ózekti ekenin kórsetip otyr. Bul týraly Senatta kámeletke tolmaǵandardyń quqyqtary men zańdy múddeleriniń saqtalýyn qamtamasyz etý taqyrybyndaǵy jıynda depýtat Nurlan Beknazarov aıtty, dep habarlaıdy Kazinform.
«Balalardyń quqyqtaryn, bostandyqtary men zańdy múddelerin qorǵaý, olardyń baqytty jáne qaýipsiz balalyq shaǵy úshin qajet jaǵdaılar jasaý - memleketimizdiń basty mindetteriniń biri. Memleket basshysy óz Joldaýlarynda balalardyń qaýipsizdigi men quqyqtaryn qorǵaý, olardyń áleýmettik jáne ekonomıkalyq ál-aýqatyn qamtamasyz etý máselelerine erekshe nazar aýdarady. Atap aıtsaq, 2022 jylǵy 1 qyrkúıektegi Joldaýynda el Prezıdenti Ulttyq qordyń ınvestıtsııalyq tabysynan balalardyń shottaryna 18 jasqa tolǵannan keıin bilim alýǵa jáne turǵyn úı satyp alýǵa paıdalana alatyn qarajatty aýdarý jónindegi baǵdarlamany iske asyrýdy tapsyrǵan bolatyn. Atalmysh tapsyrma 2024 jylǵy 1 qańtardan bastap qoldanysqa engiziletin zańda zańnamalyq túrde bekitildi jáne bıylǵy qazan aıynda Parlament qabyldady», - dedi N. Beknazarov.
Senator Qazaqstan Respýblıkasyndaǵy balalardyń quqyqtyq jaǵdaıy Konstıtýtsııada, «Neke (erli-zaıyptylyq) jáne otbasy týraly» Kodeksinde, «Balanyń quqyqtary týraly», «Bilim týraly» «Kámeletke tolmaǵandar arasyndaǵy quqyq buzýshylyqtardyń profılaktıkasy men balalardyń qadaǵalaýsyz jáne panasyz qalýynyń aldyn alý týraly» zańdarda, sondaı-aq basqa da birqatar normatıvtik-quqyqtyq aktilerde aıqyndalǵanyn eske saldy. Qazaqstan táýelsizdik jyldarynda bala quqyqtaryn qorǵaýǵa baǵyttalǵan birqatar halyqaralyq sharttardyń, onyń ishinde Bala quqyqtary týraly Konventsııanyń tolyqqandy qatysýshysyna aınaldy.
«Balalardyń quqyqtaryn qorǵaý júıesinde memleketimizdegi sottardyń orny aıryqsha. Balanyń kez kelgen buzylǵan quqyǵyn sot tártibimen qorǵaýǵa bolady. Sonymen qatar, balalarǵa qatysty daýlar sot isteriniń kúrdeli sanattarynyń biri sanalady, óıtkeni olardy sheshý nátıjeleri balanyń jeke basynyń qalyptasýyna, onyń fızıologııalyq, rýhanı jáne adamgershilik damýyna áser etedi. Balalarǵa qatysty kóptegen daýlar, mysaly, balalardyń turǵylyqty jerin anyqtaý jáne bólek turatyn ata-analardyń olarmen qarym-qatynas tártibin anyqtaý, áke bolýdy anyqtaý, alımentterdi óndirip alý, bala asyrap alý jáne t.b. sot tártibimen sheshiledi. Sot statıstıkasy bala tárbıesine baılanysty máselelerdiń óte ózekti bolyp otyrǵanyn kórsetip otyr», - dedi Nurlan Beknazarov.
Onyń sózine qaraǵanda, qazir otbasyny saqtap qalý úshin qolaıly jaǵdaılar jasaýǵa, sondaı-aq sottardyń neke-otbasy qatynastarynan týyndaıtyn daýlardy qaraý kezinde tatýlastyrý rásimderin keńeıtýge baǵyttalǵan «Otbasylyq sot» pılottyq jobasy iske asyrylyp keledi.
«Pılottyq joba oń nátıje kórsetken jaǵdaıda, elimizde sottardyń úsh túrin: ıývenaldy, azamattyq jáne ákimshilik sottardy biriktire otyryp, otbasylyq sottar qurylýy múmkin», - dedi senator.
Aıta keteıik, elimizde Otbasylyq sot qanatqaqty jobasy 2018 jyldyń qyrkúıek aıynan bastap engizildi.
