Elimizde otandyq qurylys materıaldarynyń úlesi qandaı

ASTANA. KAZINFORM — Ónerkásip jáne qurylys mınıstrligi shetelden kóbine qandaı materıaldar jetkizilip jatqanyn málim etti.

- 2024 jyldyń qorytyndysy boıynsha otandyq qurylys materıaldarynyń úlesi 67 paıyzdy qurady. Qazirgi kezde, 2025 jyldyń 1-jartyjyldyǵynyń qorytyndysy boıynsha 70 paıyzǵa ishki naryq otandyq ónimmen qamtamasyz etilip otyr. Osy aıtylyp ótken kezeńde QR Strategııalyq josparlaý jáne reformalar agenttigi Ulttyq statıstıka bıýrosy aqparatyna sáıkes, 713,1 mlrd teńgege otandyq ónim óndirildi, - delingen mınıstrliktiń Kazinform agenttigine bergen aqparatynda.

Qazir shet elderden keramıkalyq taqtaı, keramıkalyq sanıtarly-tehnıkalyq ónimder, otqa tózimdi kirpishter tasymaldanady.

- Joǵaryda aıtylyp ótken asa kóp ımporttalatyn materıaldardy otandyq ónimmen almastyrý maqsatynda byltyrdyń aıaǵynda «Wan Sheng Ceramic» JShS (keramıkalyq taqtaı), «Almaty Insulation» JShS (jylýoqshaýlaǵysh materıaldar), «Semeı qurylys materıaldary» JShS (qasbetke arnalǵan fıbrotsementti panel) zaýyttary iske qosyldy. Sonymen qatar, sanıtarly- keramıkalyq ónimder óndirý maqsatynda Qyzylorda oblysynda ınvestormen kelisý jumystary júrgizilip jatyr. 2025 jyldyń 1-jartyjyldyǵynda ımportty almastyrý maqsatynda iske qosylǵan ónerkásip oryndarynyń arqasynda keramıkalyq taqtaı (+179%) jáne fıbrotsementti paneldiń (+700 mln sharshy metr) óndiristik kólemi ulǵaıyp otyr, - dep atalyp ótken vedomstvo aqparatynda.

Eske salsaq, bıyl kóktemde Qazaqstan qalalarynda qurylys materıaldarynyń baǵasy qansha turatynyn jazǵan edik.