Elimizde minez-qulqynda psıhıkalyq aýytqýy bar qansha bala esepte tur
ASTANA. KAZINFORM – Elimizde psıhologııalyq aýytqýy bar kámelet jasyna tolmaǵan balalar men jasóspirimder arnaıy ortalyqta emdeledi. Tolyq málimetti Densaýlyq saqtaý mınıstrliginen suratqan edik.
- 2025 jylǵy 12 aqpandaǵy jaǵdaı boıynsha elimizde dınamıkalyq baqylaýda turǵan psıhoaktıvti zattardy qoldanbaıtyn minez–qulqy psıhıkalyq buzylǵan (aýytqýy bar) 204 408 adam bar. Onyń ishinde 44 781-i - kámelet jasyna tolmaǵan balalar men jasóspirimder. 2023 jylǵy statıstıka boıynsha el aýmaǵynda 19 8421 adam tirkeldi, onyń ishinde 41 023 patsıent kámeletke tolmaǵan, - delingen saýal jaýabynda.
Atap aıtqanda, F20 dıagnozymen (shızofrenııa) 39 334 adam dınamıkalyq baqylaýda tur. Onyń arasynda 301 kámeletke tolmaǵan (2023 jyly – 39002 adam, onyń ishinde kámeletke tolmaǵandar-290 adam) bala men jasóspirim bar.
- Minez-qulqynda psıhıkalyq aýytqýy bar kámeletke tolmaǵan jandarǵa elimizdiń 20 óńirinde psıhıkalyq densaýlyq ortalyqtarynda, odan bólek respýblıkalyq psıhıkalyq densaýlyq ǵylymı-praktıkalyq ortalyǵynda qoldaý, kómek kórsetiledi. Ótken jyldyń qorytyndysy boıynsha elimizde 613 bala psıhıatrııalyq ortalyqtarǵa ornalastyryldy. Onyń ishinde 573-i óńirlerdegi psıhıkalyq densaýlyq ortalyqtaryna jáne 40 respýblıkalyq psıhıkalyq densaýlyq ǵylymı-praktıkalyq ortalyǵyna jaıǵastyryldy, - deıdi vedomstvodan.
Densaýlyq mınıstrligi usynǵan málimetke súıensek, ótken jyly elimizde kámeletke tolmaǵan 10 595 bala jáne jasóspirim statsıonarlyq jaǵdaıda em alǵan, onyń arasynda F20 dıagnozymen, ıaǵnı shızofrenııa dertine shaldyqqan 178 adam bar.
- Óńirlerdegi psıhıkalyq densaýlyq ortalyqtarynda 9865 kámeletke tolmaǵan adam statsıonarlyq emdeýden ótti, onyń ishinde F20 (shızofrenııa) dıagnozy qoıylǵan 157 adam bar, al respýblıkalyq psıhıkalyq densaýlyq ǵylymı-praktıkalyq ortalyǵynda barlyǵy 730 kámeletke tolmaǵan adam statsıonarlyq emdeýden ótti, onyń ishinde 21 jasóspirimge F20 (shızofrenııa) dıagnozy qoıylǵan, - dep tolyqtyrdy vedomstvo.
Eske sala ketsek, elordada jasóspirim lıfti ishinde balany pyshaqtap tastaǵan edi. Keıin belgili bolǵandaı pyshaqpen shabýyldaǵan jasóspirim arnaıy esepte turǵan.
Dárigerler zardap shekken balaǵa dereý ota jasap, psıhologııalyq kómek kórsetti.
Sondaı-aq elordalyq dárigerler jasóspirimniń pyshaqpen shabýylyna ushyraǵan 5 jasar balaqaıdyń jaǵdaıy aýyr ekenin aıtqan edi.