Elimizde mıkrokredıt berý qaǵıdalary bekitildi
ASTANA. KAZINFORM – Qarjy naryǵyn retteý jáne damytý agenttigi mıkrokredıt berý qaǵıdalaryn bekitti.
— Mıkrokredıt boıynsha syıaqy mólsherlemesi týraly aqparatty qamtıtyn jarnamany taratý nemese ornalastyrý kezinde, jyldyq tıimdi syıaqy mólsherlemesi tsıfrlyq túrde kórsetiledi. Jyldyq tıimdi syıaqy mólsherlemesin jarnamada ózge aqparatty kórsetý kezinde paıdalanylatyn qaripten kishi qarippen kórsetýge jol berilmeıdi, — delingen qujatta.
Mıkroqarjy uıymdary klıenttermen jumys isteý tártibi jónindegi ereje kelesi tarmaqtardy qamtıdy:
— klıentterdiń quqyǵy men múddesin saqtaý saıasaty men rásimi;
— mıkrokredıt berýge ótinishti qaraý rásimi men merzimi (ótinish berý qajet bolǵan jaǵdaıda);
— mıkrokredıt berý kezinde klıentpen ózara is-qımyl rásimi;
— múgedektigi bar jáne qozǵalysy shekteýli jandarǵa qyzmet kórsetý tártibi, qarjy uıymdaryna qoıylatyn ulttyq standart talaptaryn eskere otyryp (2026 jylǵy 2 shildeden bastap);
— múgedektigi bar jáne qozǵalysy shekteýli jandarǵa senimdi tulǵanyń qatysýymen qyzmet kórsetý erekshelikteri (2026 jylǵy 2 shildeden bastap).
— Mıkroqarjy uıymyna, mıkroqarjy ombýdsmen nemese sotqa kórsetiletin mıkroqarjylyq qyzmet boıynsha daý týyndaǵan kezde klıentke onyń júginý quqyǵy týraly habarlaıdy. Osy maqsatta klıentke mıkroqarjy uıymynyń, mıkroqarjy ombýdsmenniń ornalasqan jeri, elektrondyq poshtasy jáne ınternet-resýrsy (bar bolsa) týraly aqparat berilýi tıis, — dep túsindirilgen buıryqta.
Buıryq 2026 jylǵy 2 shildede kúshine enedi.
Ótken jyly aılyqqa deıin mıkrokredıt alǵysh qazaqstandyqtardyń sany óskeni týraly jazǵan edik.