Elimizde MÁMS jarnasyn tóleýde ózgeris bolady
ASTANA. KAZINFORM – Qazaqstandyqtar mindetti áleýmettik medıtsınalyq saqtandyrýdy (MÁMS) ádildik qaǵıdaty boıynsha tóleıdi. Bul týraly Parlament Májilisinde medıtsına salasyn talqylaýǵa arnalǵan jıynda Densaýlyq saqtaý mınıstri Aqmaral Álnazarova aıtty.
«Áleýmettik medıtsınalyq saqtandyrý júıesine jarnalardy tóleýde ádildikke qol jetkizý maqsatynda salyq tóleýshilerdiń barlyq toptary tıimdi mólsherleme boıynsha jarnalardy tóleıtin naqty shkalaǵa kóshý usynylyp otyr. Atap aıtqanda, tabysy tómen adamdar aýqatty azamattardan artyq tólemeýi kerek», - dedi A. Álnazarova.
Mınıstrlik málimetine qaraǵanda, usynylǵan sharalardyń nátıjesinde medıtsına salasynda halyqtyń qalta nemese jeke shyǵystarynyń tómendeýi, saqtandyrylǵan azamattardyń aldyn ala tólengen sapaly medıtsınalyq kómek alý quqyqtaryn qorǵaý eskerilgen. Sondaı-aq, bul jańalyq medıtsına uıymdarynyń qarjylyq turaqtylyǵy jáne densaýlyq saqtaýdy qarjylandyrýdyń saqtandyrý modeline kóshý máselelerin birtindep sheshýge múmkindik beredi.
