Elimizde lýdomanııa dıagnozy neshe adamǵa qoıyldy

ASTANA. KAZINFORM — QR Densaýlyq saqtaý birinshi vıtse-mınıstri Tımýr Sultanǵazıev byltyrdan beri lýdomanııa boıynsha emdelip jatqandarǵa qatysty túsinik berdi.

- Bir jyl buryn lýdomanııadan emdeý men dıagnostıka hattamasy qabyldanǵan. Sodan beri 15 jaǵdaıǵa qumar oıyndarǵa táýeldilik dıagnozy qoıyldy. Qumar oıyndarǵa táýeldi adamdar ózderin dertke shaldyqqanyn moıyndamaıdy. Ekinshiden, byltyrǵa deıin oıynǵa táýeldi árbir adam psıhıkalyq saýyqtyrý ortalyǵynda dınamıkalyq baqylaýǵa alynatyn jáne bul jaǵdaı onyń qujattarynda kórsetiletin. Sondyqtan eshkim óziniń derekterinde mundaı dınamıkalyq baqylaýdyń bolǵanyn qalamaıdy, - dedi Tımýr Sultanǵazıev Senatta tilshiler suraǵyna jaýap bere otyryp.

Osyǵan baılanysty ótken jyly tıisti zań qabyldanyp, onyń aıasynda konsýltatıvtik monıtorıngtiń jańa tetigi qosyldy.

- Bul jańa qadam adamdarda emhanaǵa barýǵa, psıhıatrdan keńes alýǵa jáne qajet bolǵan jaǵdaıda emdelýge barýdy yntalandyryp otyr, - dedi vıtse-mınıstr.

Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine densaýlyq saqtaý, oıyn bıznesi jáne artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» Zańy eki oqylymda qaralyp, maquldandy.

Eske salsaq, bıyl naýryz aıynda Týrızm jáne sport vıtse-mınıstri Erjan Erkinbaev elimizde mıllıon lýdoman bar degen aqparatty joqqa shyǵardy.