Elimizde qurylys salasyna 200 myńnan astam maman qajet

ASTANA. KAZINFORM – Úkimet basshysy Oljas Bektenov qurylys salasyndaǵy otandyq materıaldardyń úlesin arttyrýdy tapsyrdy. Sonymen qatar sala mamandaryn daıarlaý máselesin kóterdi.

— Ónerkásip jáne qurylys mınıstrligi óńir ákimdikterimen birlesip, turǵyn úıler men ınjenerlik jelilerdi iske qosýdyń bıyl jáne aldaǵy jyldarǵa arnalǵan jospardyń oryndalýyn qamtamasyz etsin. Bıyl jańa ıpotekalyq baǵdarlamalar iske qosyldy. Bul turǵyn úı qurylysyna qosymsha serpin beredi. Ónerkásip jáne qurylys mınıstrligi memlekettik organdarmen birlesip, qurylys jáne kommýnaldyq sektorlardyń jobalarynda otandyq materıaldar úlesiniń artýyn qamtamasyz etsin, — dedi Oljas Bektenov Úkimet otyrysynda. 

Sondaı-aq Premer-mınıstr quzyrly mınıstrlikke otandyq qurylys materıaldaryn shyǵaratyn jobalardy kelesi jyly iske qosýdy tapsyrdy. 

— Eńbek resýrstary ortalyǵynyń derekteri boıynsha, 2030-shy jylǵa deıin qurylys salasyna 200 myńnan astam bilikti mamandar qajet. Ǵylym jáne joǵary bilim mınıstrligi, Oqý-aǵartý mınıstrligi, Ónerkásip jáne qurylys mınıstrligi, Eńbek jáne halyqty áleýmettik qorǵaý mınıstrligi naryqtyń suranysyn eskere otyryp, joǵaryda atalǵan mamandardy daıarlaý máselelerin pysyqtaýdy tapsyramyn, — deıdi ol.

Buǵan deıin Oljas Bektenov qurylys talaptarynyń buzylýyna qatysty shaǵymdardyń kóbeıip jatqanyn aıtty. 

Odan bólek, Premer-mınıstr turǵyn úı kezegin bir júıege keltirý jumysynyń áli rettelmegenin aıtty.