Elimizde kóship-qoný úshin júk tasymaldaý quny qansha
ASTANA. KAZINFORM – Qazaqstanda kıim-keshek, jıhaz jáne turmystyq tehnıkany tasymaldaý úshin júk kóligine saǵatyna orta eseppen 4 000 teńge tóleý kerek, dep habarlaıdy Kazinform agenttiginiń tilshisi.
Zattardy páterden páterge, sonymen birge keńseden keńsege tasymaldaý úshin kúni buryn tapsyrys berip qoıý kerek. Júk tasymaldaý qyzmeti týraly aqparat qazir kópshilikke tanys saıttarda tolyp tur. Onda júrgizýshiler ortasha baǵany usynady. Júk tasymaldaý qyzmeti saǵatyna esepteledi. Tek júkti tıeý, ony túsirý de ýaqyt alatynyn esten shyǵarmaǵan jón. Sondyqtan júkti bir jerden, ekinshi orynǵa jetkizý úshin 2-3 saǵatqa qajetti shyǵyndy aldyn ala eseptegen jón.
Baǵa barar jerdiń alys nemese jaqyn ekenine de baılanysty ózgerip otyrady. Eger qala ishindegi mekenjaı bolsa arzanǵa túsedi, al qala syrtyndaǵy tasymal qosymsha shyǵyndy talap etedi. Sonymen birge bir qaladan ekinshi bir qalaǵa júk tasymaldaıtyn júrgizýshiler de bar. Olardyń qyzmet aqysy joǵary.
Taǵy bir eskere keterlik jaıt, júkti kim tıep, kim túsiredi? Mundaıda óz kúshińizge senesiz, dostaryńyzdy shaqyrasyz nemese týǵan-týystaryńyzdyń kómegine júginesiz. Jıhaz ben turmystyq tehnıkany aldyn ala syrtqa shyǵaryp qoısańyz, ýaqyt utasyz. Eger kómekshi tappasańyz, júk tasymaldaýshylardy shaqyramyz. Bir adamnyń qyzmeti orta eseppen – 3 000 teńge. Júk tasymaldaý qyzmetin usynatyn júrgizýshilerdiń keıbiri júkti tıep, túsirip beretin adamdardyń da qyzmetin qosa usynady.
Aıtyp óteıik, keıbir qalalarda, sonyń ishinde Almaty men Astanada qoqys tógý qyzmetin usynatyndar da bar. Eski jıhaz, tehnıka, qurylys qaldyqtaryn alyp ketip, qoqys polıgonyna jetkizý qyzmetiniń quny ózgelerge qaraǵanda arzan.
Júk tasymaldaý quny qansha
Júk tasymaly qyzmetiniń arzany Aqtaý qalasynda bolyp shyqty. Munda bir saǵatqa 1 000 teńge suraıdy. Eskere keterligi, tasymaldaý kezinde úlken júk kóligi emes, qarapaıym GAZel keledi. Bul kólikke sizdiń júgińiz syımaýy da múmkin.
Sodan keıingi orynda Shymkent qalasy tur. Munda júk tasymaly qyzmetiniń quny – 1 500 teńge. Dál osy aqshaǵa qoqysty alyp, polıgonǵa tastaý qyzmetin de usynady. Al Qaraǵandy, Aqtóbe, Óskemen, Tarazda júk tasymaldaý qyzmetiniń quny – 2 000 teńge. Bul qalalardaǵy eń joǵary baǵa 8 000 teńgeden bastalyp, 15 000 teńgege deıin jetedi.
Qazaqstannyń astanasynda júk tasymaldaý qunynyń eń arzany – 2 100 teńge. Sonymen birge qoqys tógý quny da osy shamada. Astanalyqtar júk tasymaldaýǵa orta eseppen saǵatyna 5 000 teńge jumsaıdy.
Qostanaı men Oralda júk tasymaldaý qyzmeti saǵatyna 2 500 teńge bolyp tur. Bir eskererligi, bul qalalarda júk tasymaldaý qyzmetiniń eń qymbaty – 22 000-30 000 teńge.
Júk tasymaldaý qyzmetiniń kóbi saǵatyna 3 000 teńge suraıdy. Mundaı baǵany Almaty, Atyraý, Semeı, Pavlodar, Kókshetaý, Túrkistan, Ekibastuzda usynyp otyr. Júk tasymaldaý kezinde kóbine shaǵyn GAZel keletinin umytpańyz.
Qyzmet quny joǵary qalalardyń ishinde Jezqazǵan ekinshi orynda tur. Munda eń arzan qyzmet quny 3 500 teńge dep kórsetilgen. Habarlamalarda dál osylaı jazýly tur. Eń qymbaty – Petropavl pen Qyzylordada. Munda saǵatyna – 4 000 teńge. Aıtyp óteıik, elimizdiń qalalarynyń basym bóliginde bul qyzmet túri jaqsy jolǵa qoıylǵan. Sondyqtan júk tasýǵa qajetti kólik tabý qıynǵa soqpaıdy.
Eske salsaq, buǵan deıin Qazaqstan qalalarynda akvaparkke kirý bıletiniń quny týraly jazyldy.