Elimizde qoǵamdyq baqylaýshylar jol sapasyn tekseredi
ASTANA. KAZINFORM — «Jol aktıvteri sapasynyń ulttyq ortalyǵy» RMK sybaılas jemqorlyqqa qarsy jumystardy qoǵamdyq uıymdarmen birge júzege asyrmaq.
«Jolshylar ashyq jáne aıqyn jumys isteıdi. Muny sózben emes, is júzinde kórsetý úshin jol salasynyń mamandary ózderiniń barlyq óndiristik jumystaryn sybaılas jemqorlyqqa qarsy is-qımylda qoǵamdyq baqylaýshylarmen birge júrgizýge daıyn. Osyndaı nıetpen Jol aktıvteri sapasynyń ulttyq ortalyǵy basshylyǵy «Ádildik joly» ókilderimen kezdesý uıymdastyrdy. Qoǵamdyq uıymnyń maqsaty - sybaılas jemqorlyqqa qarsy saıasatty iske asyrý, sybaılas jemqorlyqqa qarsy is-qımyl boıynsha qabyldanatyn sharalardyń tıimdiligin arttyrý, parasattylyq ıdeologııasyn ilgeriletý, sybaılas jemqorlyq quqyq buzý áreketin jasaýǵa yqpal etetin sebepter men jaǵdaılardy joıý», - delingen Jol aktıvteri ortalyǵy málimetinde.
Atap aıtqanda, QR Kólik mınıstrligi «Jol aktıvteri sapasynyń ulttyq ortalyǵy» RMK men «Ádildik joly» RQB arasynda yntymaqtastyq týraly Memorandýmǵa qol qoıyldy. Qujattyń tarmaqtarynda jol-qurylys materıaldary synamalaryn irikteý, jol sapasyna saraptama jáne dıagnostıka júrgizý kezinde qadaǵalaýshy retinde sybaılas jemqorlyqqa qarsy is-qımylda qoǵamdyq baqylaýshylardyń qatysýy kózdelgen.
Jol aktıvteri sapasynyń ulttyq ortalyǵynda sybaılas jemqorlyq táýekelderin azaıtý maqsatynda qazirgi kezde zerthanalyq synaqtar júrgizýdegi protsesterdi tsıfrlandyrýǵa kóshý boıynsha jumystar atqarylyp jatyr.
«Jol-qurylys materıaldary synamalaryna QR kodtaý ádisin qoldaný ádisi engizilip jatyr. Bul jerde nysan nemese merdigerdiń ataýy jáne materıaldardyń qaı jerden alynǵany týraly aqparat kórsetilmeıd. ("Olımp" medzerthanasynyń analogy). Kásiporynda jol-qurylys materıaldary synaqtaryn júrgizý protsesterin jáne synaq jabdyqtarynan derekterdi avtomatty túrde KazRoadLab biryńǵaı bazasyna berýge múmkindik beretin avtomattandyrý júıesi engizildi. Bul jerde zerthanashy málimetterdi qolmen jazyp otyrmaıdy. Vedomstvolyq saraptama portaly jumys protsesin jeńildetedi jáne jol jobalaryndaǵy tehnıkalyq kemshilikter men táýekelderdi jedel ári senimdi anyqtaýǵa múmkindik beredi. Osy ázirlemelerdiń barlyǵy adamı faktordy joqqa shyǵarady jáne sybaılas jemqorlyq táýekelderin azaıtady. Sondaı-aq, jaqyn arada sybaılas jemqorlyq táýekelderine neǵurlym beıim nysandarda turaqty beınebaqylaýdy qamtamasyz etý josparlanǵan», - dedi JASUO Bas dırektorynyń orynbasary Arman Qaıyrbekov.
Óz kezeginde «Ádildik joly» RQB atqarýshy dırektory Dıdar Smaǵulov joldyń sapasyn jaqsartý úshin uıym ne istep jatqanyn aıtty.
«Biz arnaıy saıt qurdyq jáne azamattardyń ótinishteri úshin koll ortalyǵyn iske qostyq. 8 aı ishinde joldarǵa qatysty 2000-ǵa jýyq shaǵym kelip tústi. Barlyq osy ótinishter boıynsha biz jol ýchaskelerine baramyz. Nátıjesinde merdigerler kóbinese joldy qalpyna keltirý jumystaryn dereý bastaıdy. Sebebi qoǵamdyq baqylaý bolǵan kezde - merdigerdiń kózqarasy múldem basqasha. Sondyqtan Jol aktıvteri sapasynyń ulttyq ortalyǵymen birlesken jumystarymyz joldarymyzdyń sapasyn jaqsartý úshin tek oń nátıje beretinine senimdimiz», - dedi D. Smaǵulov.
