Elimizde qysqy sport túrleri qalaı damyp keledi
ASTANA. KAZINFORM - Qazaqstan qysqy sport túrleri boıynsha olımpıadalyq kezeńdi aıaqtap keledi.
QR Týrızm jáne sport mınıstrligi baspasóz qyzmetiniń habarlaýynsha, osy ýaqyt aralyǵynda ulttyq quramalardy keshendi daıarlaý qamtamasyz etilip, sportshylar barlyq negizgi lıtsenzııalyq jarystarǵa qatysty.
Olımpıadalyq kezeń bıyl 6-22 aqpan kúnderi Italııanyń Mılan men Kortına-d’Ampetstso qalalarynda ótetin XXV qysqy Olımpıadamen túıindelmek.
Qazirgi tańda elimizde qysqy olımpıadalyq sporttyń 13 túri (konkımen júgirý, short-trek, mánerlep syrǵanaý, bıatlon, kerlıng, shańǵy jarystary, taý shańǵy sporty, frıstaıl (mogýl, akrobatıka), snoýbord, shańǵy qossaıysy, shaıbaly hokkeı, skı-alpınızm jáne tramplınnen sekirý) qarqyndy damyp keledi.
Oıyndarǵa sapaly daıyndalý maqsatynda ulttyq komandalar sheteldegi oqý-jattyǵý jıyndarynan bastap, halyqaralyq jarystarǵa deıin qatysty. Jalpy alǵanda, qysqy sport túrleri boıynsha ulttyq komandalar 612 oqý-jattyǵý jıynyn ótkizip, 434 halyqaralyq jarysta baq synady.
Daıyndyq sapasyn arttyrý jáne Memleket basshysynyń tapsyrmalaryn oryndaý aıasynda Nıderland, Polsha, Germanııa, Rýmynııa, Reseı, Belarýs, Bolgarııa jáne Slovenııa elderinen álemdik deńgeıdegi 13 sheteldik jattyqtyrýshy-keńesshi tartyldy.
Tórt jyldyq olımpıadalyq tsıkldi qarjylandyrýǵa respýblıkalyq jáne jergilikti bıýdjetterden, sondaı-aq bıýdjetten tys jáne demeýshiler esebinen 13,3 mlrd teńge jumsaldy. Bólingen qarjynyń basym bóligi sport qural-jabdyqtary men ekıpırovka satyp alýǵa, sportshy-nusqaýshylar men jattyqtyrýshylar quramynyń (onyń ishinde sheteldik mamandardyń) eńbekaqysyn tóleýge, medıtsınalyq-farmakologııalyq qamtamasyz etýge, halyqaralyq jarystar men lıtsenzııalyq týrnırlerge qatysýǵa, ǵylymı-ádistemelik súıemeldeýge jáne oqý-jattyǵý jıyndaryn ótkizýge baǵyttaldy.
Qysqy sport túrleri boıynsha ulttyq quramalardy daıarlaý Memleket basshysynyń sport salasyn jańǵyrtý jáne joǵary jetistikter sportyndaǵy nátıjeni arttyrý jónindegi tapsyrmalary aıasynda júzege asyrylyp keledi.
- Týrızm jáne sport mınıstrligi qysqy sport dıstsıplınalaryn damytýǵa jáne eldiń sport rezervin qalyptastyrýǵa baǵyttalǵan júıeli sharalardy aldaǵy ýaqytta da jalǵastyra beredi, - delingen habarlamada.
Osyǵan deıin Úkimet basshysy qysqy sport baǵyty boıynsha mınıstrlerge birqatar tapsyrma bergen bolatyn.