Elimizde keıbir dári-dármek baǵasy 30%-ǵa deıin tómendeıdi — DSM

ASTANA. KAZINFORM — Elimizde túpnusqamen sapasy birdeı balama dári-dármekterdiń baǵasy tómendeıdi. Bul týraly QR Densaýlyq saqtaý vıtse-mınıstri Erjan Nurlybaev aıtty.

— Qazaqstanda dárihanalarda satylatyn preparattardyń shekti qunyn tómendetýdi kózdeıtin jańa tetik jumys isteıtin bolady. Dári-dármektiń shekti qunyn tómendetý quraldarynyń biri — buryn dári-dármektiń qunyna engizilgen qosymsha shyǵystardy alyp tastaý. Olar: marketıng (30%-ǵa deıin), tasymaldaý (15%-ǵa deıin) jáne sapany baǵalaý shyǵyndary. Ústeme baǵalardyń regressıvti shkalasyn qaıta qaraý nátıjesinde olardy qoldaný shegi aıtarlyqtaı tómendedi: tegin medıtsınalyq kómektiń kepildik berilgen kólemi (TMKKK) jáne mindetti áleýmettik medıtsınalyq saqtandyrý (MÁMS) sheńberinde olar 20%-ǵa deıin, kóterme satý úshin — 25%-ǵa deıin, al bólshek saýda úshin — 30%-ǵa deıin (buryn 55% bolǵan), — dedi ol OKQ alańynda ótken brıfıng barysynda.

Vıtse-mınıstrdiń aıtýynsha, atalǵan retteý sharalary generık (dáriniń túpnusqasymen quramy men sapasy birdeı balama nusqasy) dári-dármek baǵasyn tómendetpek.

— Retteý, shekti baǵalar men ústeme baǵalardy qalyptastyrý qaǵıdalarynyń jańa redaktsııasynda generıkterge baǵany bastapqy dárilik zat baǵasynan 30%-ǵa tómendetý kózdelgen. Eger bastapqy preparat naryqta bolmaǵan jaǵdaıda, otandyq analogtyń shekti quny ımporttalatyn dárilerdiń ortasha baǵasynan aspaýǵa tıis. Mundaı saıasat básekelestikti yntalandyrýǵa jáne barlyq taraptar múddeleriniń teńgerimin qamtamasyz ete otyryp, otandyq óndirýshiler úshin jaǵdaılardy jaqsartýǵa múmkindik beredi, — dedi Erjan Nurlybaev.

Spıkerdiń aıtýynsha, júıeniń ashyqtyǵyn arttyrý úshin memlekettik aqparattyq portaldarmen, atap aıtqanda, Memlekettik kirister komıtetimen ıntegratsııa jasalatyn bolady. Bul shara dárihanalardyń kedendik deklaratsııalary men kassalyq chekteriniń derekterine monıtorıng jasaý arqyly dárilik zattardyń baǵasyn tıimdi baqylaýǵa múmkindik beredi.

Aıta keteıik, buǵan deıin tegin dári-dármekterdi berý júıesine ózgeris engiziletinin jazǵan edik.