Elimizde qaı mamandyqtarǵa suranys joǵary
ASTANA. KAZINFORM – Eńbek naryǵynda zańgerlik mamandyqqa joǵary suranys joq. Bul týraly ǴJBM Joǵary jáne joǵary oqý ornynan keıingi bilim komıtetiniń tóraǵasy Gúlzat Kóbenova málim etti.
Aıta keteıik, búgin Senatta zań bilimin damytý taqyrybyna arnalǵan parlamenttik tyńdaý barysynda zańger mamandyǵyna memlekettik grantyń úlesi óte az bolǵandyqtan, kóbisi aqyly negizde oqýǵa májbúr ekeni aıtylǵan edi.
- Memlekettik granttar bólingen kezde, olardyń sany birinshi kezekte naryqtaǵy suranysqa oraı qalyptasady. Jyl saıyn Eńbek mınıstrligi bizge qajet mamandardyń sanyna qatysty málimetterdi berip turady. Osy aqparatqa súıensek, qazir jáne aldaǵy bes jylda bizdiń ekonomıkaǵa kóbine tehnıkalyq baǵyttaǵy mamandar men pedagogter, dárigerler, aýyl sharýashylyǵy mamandary qajet. Al zańgerlerge sonshalyqty joǵary suranys joq, - dedi G.Kóbenova.
Onyń aıtýynsha, qazir aqyly negizde oqıtyn stýdentterge joǵary oqý oryndary oqý aqysyn ózderi belgileıdi.
- 2023 jyldyń kórsetkishin qarasaq, zańgerlik mamandyqty támamdaǵyn túlekterdiń 72 paıyzy óz salasy boıynsha jumysqa ornalasqan. 2024 jyly oqýdy aıaqtaǵan túlekterdiń kórsetkishi bıyl jazda naqty belgili bolady. Búgingi talaptar boıynsha, bıyl oqýdy bitirgen stýdenttiń bir jyl ishinde jumysqa ornalasýy jaǵdaıyna taldaý jasaımyz. Zańgerlik baǵytynda memlekettik grantpen oqyǵandardyń kóbisi óz mamandyǵymen jumysqa ornalasyp jatyr, - dedi komıtet basshysy.
Budan buryn habarlanǵandaı, Senat tóraǵasy Máýlen Áshimbaev zańgerler daıarlaý isinde qordalanǵan problemalar bar ekenin aıtty.
Ǵylym jáne joǵary bilim mınıstri Saıasat Nurbek búginde zańger mamandyǵy boıynsha joǵary bilim alyp jatqan jastardyń 97 paıyzy aqyly negizde oqıtynyn aıtty.