Elimizde qaýyn men qarbyzdyń baǵasy qansha
Jaz bastalǵanda dúken sóresine qarbyz ben qaýyn túsip, suranys ta artady, dep habarlaıdy Kazinform tilshisi.
Qazaqstanǵa qarbyz ben qaýyn Qytaı, Iran, Brazılııa, Taılandtan ákelinedi. Sonymen birge sharýalar baptap, pisiredi. Jetisý men Túrkistannan, Ózbekstannan jemis-jıdek pen kókónis tasymaldanady. Baqsha ónimderi kóbine Túrkistan oblysynda ósiriledi.
Satýshylardyń aıtýynsha, kóbi jaz bastalǵanda satyp alýǵa júreksinedi. Qarbyz tamyz aıynda babyna kelip pisedi degen de túsinik bar. Bul qarbyzda qospa az bolady dep aıtylady.
Degenmen búginde bazardan qarbyz ben qaýyn satyp alýǵa bolady.
Qarbyzdyń eń arzany Tarazda satylady. Munda kelisi - 195-250 teńge. Al Túrkistanda kelisi 200-250 teńge, Kókshetaýda - 230 teńge, Qyzylorda, Almaty men Pavlodarda - 250 teńge.
Ala qarbyzdyń kelisi Shymkentte - 260-300 teńge. Al Aqtóbede 280-300 teńgege satylyp jatyr. Al Atyraý, Semeı, Aqtaý, Óskemen, Qostanaıda kelisi 300 teńgege satylady. Elimizdiń astanasynda kelisi 303 teńge shamasynda.
Qarbyz Oral, Qaraǵandy, Jezqazǵanda qymbat. Munda kelisi 350 teńgege satylyp jatyr. Eń qymbat qarbyz - Petropavlda. Munda kelisi - 360 teńgeden.
Qaýyn qarbyzdan qymbat. Qaýyn túri kóp, al onyń ortasha baǵasy shamalas. Qaýynnyń eń arzany Aqtóbede satylady. Munda kelisi -500-700 teńge. Qostanaı (560-670 teńge) men Pavlodarda (589-828 teńge) baǵa sál joǵary.
Atyraý, Túrkistan men Shymkentte qaýynnyń ortasha baǵasy - 600 teńge. Qaýyn baǵasy Tarazda - 620-700 teńge, Kókshetaý men Aqtaýda - 650 teńge. Al Oral men Qaraǵandydan kelisin 700 teńgege satyp alýǵa bolady.
Almaty, Jezqazǵan, Semeı men Óskemende baǵa joǵary. Kelisi - 800 teńge. Al eń qymbat baqsha ónimi Petropavl, Astanada satylyp jatyr. Kelisi - 999 teńge. Al Qyzylordada - 1 000 teńge.
Buǵan deıin Qazaqstandaǵy órik pen shabdaly baǵasy jazyldy.