Elimizde qandaı jumysshy mamandarǵa tapshylyq bar
ASTANA. KAZINFORM – QR Eńbek jáne halyqty áleýmettik qorǵaý mınıstrligi elimizde qandaı jumysshy mamandaryna tapshylyq bar ekenin aıtyp berdi.
Orta merzimdi boljamǵa sáıkes, jumysshy mamandary boıynsha kadrlarǵa qajettilik 2030 jylǵa qaraı 410,6 myń adamǵa jetedi (bıyl – 52,7 myń adamǵa tapshylyq bar).
«Olardyń ishinde eń kóp suranysqa ıe mamandyqtar – avtomobılderdiń, júk avtomobılderiniń júrgizýshileri, taksı júrgizýshileri – 88,1 myń adamdy, dánekerleýshiler – 18 myń adam, qurylysshy-montajshylar, qurylysshy-árleýshiler, sýretshiler – 13,4 myń adam, santehnıkter – 13,2 myń adam, fermerler men aralas ónimderdi óndirý boıynsha jumysshylar – 12,4 myń adam, sylaqshylar – 11,2 myń adam, traktorshylar – 11 myń adam, ónerkásiptik jabdyqtardyń slesarlary – 8,2 myń adam jáne basqalary bar», - dep jazylǵan mınıstrlik jaýabynda.
Sonymen qatar, Elektrondy eńbek bırjasy portalynda jumysshy mamandaryna jumys berýshilerden 15 722 bos jumys oryndary jarııalanǵan, ondaǵy jalaqy mólsheri 85 myń teńgeden 500 myń teńgege deıin jetedi.
Aıta keteıik, jyl saıyn qyrkúıek aıynyń sońǵy jeksenbisinde elimizde Eńbek kúni atalyp ótedi.
Al bıyl Memleket basshysy 2025 jyldy «Jumysshy mamandyqtary jyly» dep jarııalaýdy jáne olardyń mártebesin kóterýdi usynǵan edi.
