Qazaqstanda ınvestorlar men bıznes ókilderi úshin vıza rásimdeý jumystary jeńildedi
ASTANA. KAZINFORM - Qazaqstan ınvestorlar, bıznes ókilderi jáne ózge de shetel azamattary úshin elge kirý, vıza rásimdeý jáne ruqsat qujattaryn alý tártibin ońtaılandyryp jatyr, dep habarlaıdy QR Eńbek jáne halyqty áleýmettik qorǵaý mınıstrliginiń baspasóz qyzmeti.
Baspasóz qyzmetiniń habarlaýynsha, jeńildetilgen jáne ınvestıtsııalyq rejımder aıasynda túrli preferentsııalardyń keń aýqymy usynylǵan. Bul degenimiz – ınvestorlar men kásipkerler arnaıy vızalyq rejımderdi, ótinimderdi jedel qaraý rásimderin, sondaı-aq ınvestıtsııalyq jobalardy súıemeldeý tetikterin paıdalana alady degen sóz.
Jeńildetilgen sharttar suranysqa ıe mamandyqtar boıynsha Qazaqstanda jumys isteý úshin keletin shetel azamattaryna, sondaı-aq memlekettik organdardyń qoldaýhaty bolǵan jaǵdaıda ekonomıkalyq jáne áleýmettik jobalarǵa qatysýshylarǵa da qoljetimdi.
Tsıfrlyq tehnologııalardyń qarqyndy damýy jahandyq eńbek naryǵyn túbegeıli ózgertip jatyr. Álemde jasandy ıntellektimen jumys isteý daǵdylary bar mamandarǵa suranys artyp keledi. Osyǵan baılanysty suranysqa ıe mamandyqtar tiziminde erekshe nazar ІT salasyna aýdarylǵan (jasandy ıntellekt ınjeneri, aqparattyq júıeler arhıtektory, qosymsha ázirleýshi, aqparattyq qaýipsizdik ınjeneri jáne t.b.). Sonymen qatar densaýlyq saqtaý (neırohırýrg, gematolog, onkolog, sáýlelik dıagnostıka dárigeri jáne t.b.), kreatıvti ındýstrııa (grafıkalyq dızaıner, dybys rejısseri, grafıkalyq anımatsııa tehnıgi jáne t.b.), jaratylystaný ǵylymdary, ınjenerlik jáne óńdeý salalarynda da (farmatsevtıkalyq óndiris ınjener-tehnology, lazerlik jabdyqtar ınjeneri, bakterıolog jáne t.b.) suranys joǵary.
Eýrazııalyq ekonomıkalyq odaqqa (Armenııa Respýblıkasy, Belarýs Respýblıkasy, Qyrǵyzstan, Reseı Federatsııasy) múshe memleketterdiń azamattary úshin de qolaıly jaǵdaılar jasalǵan.
EAEO aıasynda qatysýshy elderdiń azamattary Qazaqstan aýmaǵynda ruqsat qujattaryn almaı-aq erkin jumysqa ornalasý quqyǵyna ıe. Bul jumys kúshiniń joǵary mobıldiligin qamtamasyz etip, ekonomıkalyq yntymaqtastyqtyń damýyna oń áserin tıgizedi.
Aıta ketý kerek, dál osyndaı qaǵıdat boıynsha qazaqstandyqtar da odaqqa múshe elderde eńbek etýde.
Odaqqa múshe emes elderdiń azamattary úshin eńbek naryǵynyń qajettilikteri men kvotalaý negizinde qurylǵan jumys kúshin tartý júıesi qoldanylady. Bul tásil ekonomıka múddeleri men ishki eńbek naryǵyn qorǵaý arasyndaǵy tepe-teńdikti saqtaýǵa múmkindik beredi. Osylaısha Qazaqstan ashyq ári teńgerimdi kóshi-qon saıasatyn qalyptastyryp keledi.
2026 jyldyń basynan beri suranysqa ıe mamandyqtar boıynsha sheteldik jumys kúshin tartýǵa 5,1 myń ruqsat berildi, al eńbek ımmıgranttaryna shamamen 75 myń ruqsat rásimdeldi.
Osyǵan deıin Eńbek mınıstrliginiń halyqtyń osal toptaryn baqylaý úshin tsıfrlyq quraldardy paıdalanyp jatqany týraly jazdyq.