Elimizde qandaı qylmystar azaıdy

ASTANA. KAZINFORM – Elimizde qylmystyń tómendeýi baıqalady. Bul týraly QR Іshki ister mınıstrliginiń resmı ókili Shyńǵys Álekeshev jarty jyldyq jumys esebiniń qorytyndysyn baıandady.

Spıker keltirgen derekterge sáıkes, densaýlyqqa aýyr zııan keltirý 2%-ǵa; urlyq 29%-ǵa; mal urlyǵy 33%-ǵa; tonaý 20%-ǵa azaıǵan. Qylmystardyń ashylýy da jaqsarǵan.

«Vedomstvo «SOS» batyrmalaryn ornatý jumystaryn jalǵastyrýda. Búgingi tańda respýblıka boıynsha 284 qurylǵy jumys isteıdi. Olarda beınebaqylaý kamerasy bar. Jalpy mundaı batyrmalar qylmys deńgeıin tómendetýge jáne qala turǵyndary men týrısterdiń ómir súrý sapasyn jaqsartýǵa kómektesedi», - dedi Sh. Álekeshev mınıstrlik ótkizgen brıfıngte.

Máselen, aqpan aıynda elordalyq polıtsııaǵa batyrma arqyly «Kóktal» shaǵyn aýdanynyń saıabaǵynda joǵalyp ketken 8 jasar bala qońyraý shalǵan.

Sondaı-aq mamyr aıynda «Kerýen» saýda-oıyn-saýyq ortalyǵy janyndaǵy batyrmanyń kómegimen joǵalǵan 6 jasar qyz polıtsııaǵa habarlasqan. Tek 1 maýsymda Astanada «SOS» batyrmalary arqyly polıtsııaǵa júginýdiń 4 faktisi tirkelgen.

«Búgingi tańda elimiz boıynsha 1,3 mln beınebaqylaý kamerasy jumys isteıdi, onyń ishinde 291 myń kamera polıtsııanyń jedel basqarý ortalyqtaryna jáne kezekshi bólimderine qosylǵan. Olardyń kómegimen jyl basynan beri 5 myńnan astam qylmys jáne 324 myń ákimshilik quqyq buzýshylyq anyqtaldy», - dedi Shyńǵys Álekeshev.

Aıta ketý kerek, Іshki ister mınıstrligi qarjy ınstıtýttarymen jáne jeke kompanııalarmen birlesip, bıýdjetten qarajat ketirmeı, túımelerdi ornatýdyń oń tájirıbesin engizdi. Osy tásilmen 38 qurylǵy ornatylǵan.