Elimizde estý qabileti nashar jasóspirimder kóbeıgen

ASTANA. KAZINFORM – Elimizde estý qabileti nasharlaǵan jasóspirimderdiń sany artqan. Mamandar buǵan qulaqqap pen artyq shýdyń da áseri bolatynyn aıtyp otyr.

— Qoǵamdaǵy shýdyń artýy, qulaqtaǵy ınfektsııalar men jaraqattar da estý qabiletiniń nasharlaýyna sebep bolady. Keıingi statıstıkalyq derekterge sáıkes, 12-17 jas aralyǵyndaǵy balalarda estý qabiletiniń tómendeýi baıqalady. Qulaǵy aýyrlaǵan jasóspirimder sany 15-20%-ǵa artqan, - deıdi dáriger Aqbaıan Nurǵabylqyzy «Búgin LIVE» baǵdarlamasyna bergen suhbatynda.

Tájirıbeli maman jasóspirimderdegi bul máselege qulaqqaptyń tikeleı áser etetinin aıtady. 

— Jasóspirimder arasynda estý qabiletiniń tómendeýi kóbinese qulaqqapty durys paıdalanbaýmen baılanysty bolyp otyr. Qulaqqap arqyly beriletin dybystyń deńgeıin 60%-dan asyrmaý qajet, sebebi odan joǵary dybys qulaqtyń ishki qurylymyna keri áserin tıgizedi. Qazirgi ýaqytta «60/60» degen ereje keńinen qoldanylady: dybystyń deńgeıi 60%-dan aspaýy kerek jáne qulaqqappen tyńdaý ýaqyty 60 mınýttan uzaq bolmaýy tıis. Bul sharalar dybystyń qulaqta qysym týdyrýynyń aldyn alady, sebebi qysym joǵarylaǵanda qulaqta shý paıda bolyp, bul estý qabiletiniń tómendeýine ákeledi. Qulaqqaptar qulaqtaǵy bakterııalardyń kóbeıýine yqpal etedi, bul qulaqta qabyný týdyrýy múmkin jáne estý qabiletiniń nasharlaýyna ákeledi, - deıdi ol.

Stýdııa qonaǵy qulaq aýrýynyń aldyn alý úshin ata-analarǵa birneshe keńes berdi.

— Eger bala sóılegen sózińizdi birneshe ret durys estimese, onda ol qulaqtyń nasharlaı bastaǵanyn bildiredi. Balalarda bas aınalý, tepe-teńdikti ustaı almaý sııaqty qosymsha belgiler de baıqalýy múmkin. Mundaı jaǵdaıda tez arada LOR dárigerine qaralý qajet. Ata-analarǵa balalarynyń qulaqqapty paıdalaný ýaqytyn shekteý mańyzdy. Men jylyna kemi bir ret LOR dárigerine qaralyp turýdy usynamyn, - deıdi Aqbaıan Nurǵabylqyzy.

Aıta keteıik, elimizde múgedektigi joq adamdar da medıtsınalyq kórsetilimder boıynsha estý protezimen tegin qamtylady.