Elimizde emhanaǵa tirkelý qaǵıdalary jańartyldy
ASTANA. KAZINFORM – Densaýlyq saqtaý mınıstri 2025 jylǵy 12 mamyrdaǵy buıryǵymen alǵashqy medıtsınalyq-sanıtarııalyq kómek kórsetetin densaýlyq saqtaý uıymdaryna azamattardy tirkeý qaǵıdalaryna ózgerister engizildi.
Negizgi qaǵıdattar
- Otbasylyq qyzmet kórsetý qaǵıdaty;
- Medıtsınalyq qyzmetterdiń aýmaqtyq qoljetimdiligi;
- Qoljetimdilik sheginde medıtsınalyq uıymdy erkin tańdaý;
- Kórsetiletin kómektiń sapasyna patsıentterdiń qanaǵattanýshylyǵy;
- Menshik túrine qaramastan medıtsınalyq uıymdar arasyndaǵy teń quqyqtylyq pen adal básekelestik;
- Naýqastardyń ornalasqan jerine qaramastan profılaktıka, dıagnostıka jáne emdeý qyzmetteriniń qoljetimdiligi.
Mańyzdy ózgerister
Jańa qaǵıdalarmen birge «balanyń zańdy ókilderi» uǵymy engizildi. Olarǵa ata-ana, asyrap alýshylar, qamqorshylar, qorǵanshylar, patronat tárbıeshileri jáne balalardyń quqyǵyn qorǵaýdy jáne qamqorlyq jasaýdy qamtamasyz etetin ózge de tulǵalar jatady.
Tirkelý protsesi
Qazaqstan Respýblıkasynyń azamattary, qandastar, bosqyndar, sheteldikter jáne elde turaqty turatyn azamattyǵy joq adamdar memlekettik kepildendirilgen kólem medıtsınalyq kómek jáne MÁMS (mindetti áleýmettik medıtsınalyq saqtandyrý) aıasynda medıtsınalyq kómek alý úshin alǵashqy medıtsınalyq-sanıtarııalyq kómek uıymdaryna tirkele alady.
Tirkelý protsesi JSN (jeke sáıkestendirý nómiri) negizinde júzege asyrylady jáne mynalardy qamtıdy:
- Alǵashqy medıtsınalyq-sanıtarııalyq kómek uıymyn tańdaıdy;
- Jańa uıymǵa tirkelgen kezde avtomatty túrde aldyńǵy uıymnan shyǵarylady.
Balalardy tirkeý
- 5 jasqa deıingi balalar perzenthanadan shyqqannan keıin úsh kún ishinde naqty turatyn mekenjaıy boıynsha tirkeledi;
- 6–14 jas aralyǵyndaǵy balalar zańdy ókilderiniń tirkelgen mekenjaıy boıynsha nemese olardyń ótinishi negizinde tirkeledi;
- 18 jastan asqan stýdentter men medresede oqıtyndar óz betinshe tirkeledi.
Erekshe sanattaǵy azamattar men júkti áıelder turǵylyqty jeri boıynsha tirkeledi. Qazaqstanda ýaqytsha turatyn sheteldikter men azamattyǵy joq adamdar erikti nemese mindetti medıtsınalyq saqtandyrý sheńberinde medıtsınalyq kómek ala alady.
Tirkelý tásilderi
Alǵashqy medıtsınalyq-sanıtarııalyq kómek uıymyna tirkelý jeke júginý nemese elektrondyq úkimet portaly arqyly iske asyrylady.
Tirkeý úshin qajetti qujattar:
- Jeke kýálik nemese elektrondyq qujat;
- Zeınetker kýáligi (zeınetkerler úshin);
- Balalarǵa qatysty tulǵalar úshin qamqorshylyqty rastaıtyn qujattar;
- Tirkeý jónindegi komıssııanyń hattamasy (sottalǵandar úshin).
Alǵashqy medıtsınalyq-sanıtarııalyq kómek uıymy ótinimdi bir jumys kúni ishinde qarastyrýy tıis. Elektrondyq úkimet portaly arqyly júgingen jaǵdaıda qyzmet ótinish túsken kúni kórsetiledi.
Tirkeýden shyǵý tártibi
Turǵylyqty jerin aýystyrǵan kezde nemese azamattyń qalaýy boıynsha jańa uıymǵa tirkelý kezinde aldyńǵy uıymnan avtomatty túrde tirkeýden shyǵarý júzege asyrylady.
- Atalǵan ózgerister 2025 jylǵy 1 shildeden bastap kúshine enedi jáne tirkelý qaǵıdattary men medıtsınalyq qyzmet alýǵa quqyǵy bar azamattar sanatyna qatysty. Bul ózgerister barlyq sanattaǵy azamat úshin alǵashqy medıtsınalyq-sanıtarııalyq kómektiń qoljetimdiligi men sapasyn arttyrýǵa baǵyttalǵan,- delingen qujatta.
Jyl basynda Densaýlyq saqtaý mınıstri Aqmaral Álnazarova medıtsınalyq qyzmettiń sapasy, sonyń ishinde emhana máselesi sheshimine qatysty pikir aıtqan edi.