Elimizde dron paıdalanýdy úıretetin 1100 orta mektep bar

ASTANA. KAZINFORM – Oqý-aǵartý mınıstrliginen Kazinform saýalyna joldanǵan jaýapta elimizde oqýshylaryna dron paıdalanýdy úıretetin mektepterdiń sanyn kórsetiledi.

- Drondardy paıdalaný, ásirese STEM-bilim berý aıasynda, oqýshylardyń tehnıkalyq oılaý qabiletin, ınjenerlik daǵdylaryn damytýǵa baǵyttalǵan. Búgingi kúni elimizde mundaı mektepterdiń sany shamamen 1 100-ge jýyq. Bul mektepterde ol negizinen STEM-zerthanalar aıasynda iske asyrylady. Mundaı zerthanalarda oqýshylar drondardy qurastyrý, baǵdarlamalaý jáne basqarý sekildi praktıkalyq daǵdylardy meńgeredi, - dep jazylǵan resmı málimette.

Jalpy respýblıka boıynsha jetkinshekterdiń tehnıkalyq qabiletin ushtaýǵa arnalǵan 24 jas tehnıkter stantsııasy men tehnıkalyq shyǵarmashylyq ortalyq bar.

- Qosymsha bilim berý protsesine drondardy kiriktirý qarajat talap etkendikten, bul másele árbir óńirdiń múmkindikterine jáne qajettilikterine qaraı josparlanatynyn eskertemiz. Sondaı-aq bıylǵy oqý jylynan bastap elimizdiń birneshe tehnıkalyq jáne kásiptik bilim berý uıymdarynda zaman talabyna saı paıda bolǵan mamandyqtardyń biri - dron operatorlaryn daıarlaý qolǵa alyndy, - delingen mınıstrlik jaýabynda.

Al Qytaı ónertapqyshtary jasandy zeıin kómegimen 10 myń shaqyrymǵa deıin eńseretin Rainbow-9 apparatyn synaqtan sátti ótkizdi.