Elimizde demograf mamandardy daıarlaý usynyldy

ASTANA. KAZINFORM – Senat tóraǵasynyń keńesshisi Juldyzaı Ysqaqova Qazaqstannyń joǵary oqý oryndarynda demografııa boıynsha jańa bilim berý baǵdarlamasyn ashýdy usyndy.

Senat tóraǵasy keńesshisiniń aıtýynsha, elimizde demografııalyq damý tujyrymdamasyn qabyldaý qajet.

— Ulttyq ekonomıka mınıstrliginiń jaýabynda bul qujatty qabyldaý orynsyz ekeni aıtylǵan. Sebebi memlekettik josparlaý júıesi teńgerimdi, qandastardy qabyldaý máseleleri rettelgen, al týýdyń ósý úrdisi baıqalady. Alaıda, meniń oıymsha, 2021 jyldan bastap týý kórsetkishi kerisinshe tómendep jatyr. Sondaı-aq óńirlik damýda aıtarlyqtaı teńgerimsizdik bar. Sondyqtan, kóptegen eldiń tájirıbesine súıene otyryp, bizge de osy tujyrymdamany qarastyrý qajet dep sanaımyn, - dedi Juldyzaı Ysqaqova Senattyń áleýmettik-mádenı damý jáne ǵylym komıtetinde ótken jıynda.

Búginde Ǵylym jáne joǵary bilim mınıstrliginiń málimetine sáıkes, «Demografııa» mamandyǵy «Tarıh» bilim berý baǵdarlamalary tobynyń aıasynda oqytylady.

— Biraq, tarıh – ótkendi zertteý, al demografııa – bolashaqqa baǵyttalǵan ǵylym. Biz joǵary oqý oryndarynda jańa baǵdarlamany ashý ońaı emes ekenin túsinemiz. Onyń ústine, kóptegen ýnıversıtet KEAQ (kommertsııalyq emes aktsıonerlik qoǵam) mártebesine ıe bolǵandyqtan, ózderi sheshim qabyldaıdy. Degenmen memlekettik qoldaý kórsetýdi suraımyz, — dedi Senat spıkeriniń keńesshisi.

Onyń aıtýynsha, ótken jyly elordadaǵy L. Gýmılev atyndaǵy Eýrazııa ulttyq ýnıversıteti Reseıdiń joǵary ekonomıka mektebi ókilderimen kezdesý ótkizip, atalǵan baǵytty qolǵa alý múmkindigin talqylaǵan.

— Ǵylym jáne joǵary bilim mınıstrligi bizge jańa baǵyt ashý ońaı emes ekenin aıtty. Sondyqtan Qazaqstan demograftary qaýymdastyǵy, áıelder isteri jónindegi ulttyq komıssııa jáne sarapshylar qaýymdastyǵymen qosymsha kezdesý ótkizýdi suraımyz. Qazir áleýmettanýshylar demografııalyq baǵyttardy zerttep jatyr, sol sııaqty pılottyq joba retinde Eýrazııa ýnıversıtetinde bólek mamandyq ashý múmkindigi bar. Ol úshin memlekettik granttar qajet, sheshilýi tıis kóptegen másele bar,- dep qorytyndylady Juldyzaı Ysqaqova.

Aıta ketsek, Senattyń Áleýmettik-mádenı damý jáne ǵylym komıtetinde «Demografııalyq ósý –ulttyń strategııalyq artyqshylyǵynyń negizi» taqyrybynda byltyr ótken Úkimet saǵatynda qabyldanǵan usynymdardy iske asyrý qorytyndylaryn talqylaýǵa arnalǵan keńeıtilgen otyrys ótti.

Sondaı-aq atalǵan jıynda Qazaqstanda demografııa jáne kóshi-qon salasyn retteıtin memlekettik organ qurý usynyldy.

Odan bólek, qazaqstandyqtardyń soltústik óńirlerden kóshýi jalǵasyp jatqany aıtyldy.