Elimizde dári-dármektiń baǵasy 30 paıyzǵa arzandaıdy

ASTANA. KAZINFORM – Qazaqstanda dári-dármektiń baǵasy 30 paıyzǵa arzandaıdy. Bul týraly QR Densaýlyq saqtaý vıtse-mınıstri Erjan Nurlybaev aıtty. 

— Byltyr bizge aıtylǵan syndardan keıin baǵanyń qalyptasý modelin ózgertetinimizdi habarladyq. Mınıstrlik aýqymdy jumys júrgizip, bul modeldi ózgertti. Dári-dármekke qosylatyn birqatar qosymsha qun alynyp tastaldy. Biz marketıngke, kedenge, kólikke jumsalatyn shyǵyndy baǵaǵa qosýdy jónsiz dep taptyq, - dedi ol OKQ alańynda.

Onyń aıtýynsha, osynyń arqasynda dári-dármekterdiń baǵasy aıtarlyqtaı arzandaýy tıis.

— Búgingi kúni bir ǵana ústeme baǵa qaldyryldy, ol óndirýshi zaýyt belgilegen qunǵa qosylady. Atalǵan model qazirdiń ózinde synaqtan ótip úlgerdi, sondyqtan 1 shildege deıin Qazaqstan aýmaǵynda tirkelgen barlyq dárilik zattarǵa qaıta esepteý júrgiziledi. Qazir farmatsevtıkalyq qaýymdastyqpen belsendi jumys júrgizilip jatyr. Biz bul model boıynsha mindetti áleýmettik medıtsınalyq saqtandyrý (MÁMS) men tegin medıtsınalyq kómektiń kepildendirilgen kólemi (TMKKK) sheńberindegi dárilerdiń baǵasy shamamen 19%-ǵa, al kóterme-bólshek saýda salasynda shamamen 30%-ǵa tómendeıdi dep boljap otyrmyz, - dedi vıtse-mınıstr.

Aıta keteıik, buǵan deın el azamattary tegin alatyn dáriler tizbegi keńeıtilgenin jazǵan edik.