Biryńǵaı satyp alý platformasy: bıyl qandaı qyzmetter qosyldy
ASTANA. KAZINFORM — Bıyl Biryńǵaı satyp alý platformasyna bilim alýshylardy tamaqtandyrý, memlekettik bilim berý tapsyrysy, memlekettik-jekeshelik áriptestik, TMKKBK sheńberinde dárilik zattar men medıtsınalyq buıymdardy satyp alý qosyldy. Bul týraly QR Qarjy mınıstrliginiń baspasóz qyzmetinde jarııalandy.
Atalǵan platforma memlekettik ári kvazımemlekettik sektordyń satypalymdaryn biriktiredi. Endi qyzmet kórsetýshiler biryńǵaı portaldyń kómegimen tenderge qatysa alady. Bul bıznes protsesti edáýir jeńildetedi. Buǵan deıin avtorızatsııalaý ár júıede bólek júrgizilip kelgen edi.
— Jańa platformada memlekettiń úlesi 50% asatyn barlyq memlekettik organnyń, ulttyq kompanııalardyń, holdıngterdiń, kásiporyndar men uıymdardyń, sondaı-aq «Samuryq-Qazyna» ulttyq ál-aýqat qory men onyń enshiles uıymdarynyń satypalymdary qamtylǵan. Bul satypalym protsesiniń barlyq qatysýshysyna (retteletin satyp alýlarǵa qatysýǵa) teń múmkindik beredi, — delingen aqparatta.
Tyń júıeniń artyqshylyǵy: retteletin satypalymnyń barlyq túrine birtutas portal arqyly kirý, rásimderdiń tolyqtaı ashyq bolýy, bir júıede satypalymnyń barlyq túrin monıtorıngteý jáne taldaý, jeke kabınette paıdalanýshylardyń suranysyna saı ólshemderdiń jolǵa qoıylýy.
Osy júıeniń bazasynda ádister, josparlar, kelisimsharttar, óńirler, bıýdjet túrleri, eseptilik ákimgeri bólinisinde josparlanyp, ótkizilgen satypalymdar boıynsha aqparatty kórsetetin taldaý modýli ázirlengen.
2025 jyly Biryńǵaı satyp alý platformasyna: bilim alýshylardy tamaqtandyrý, memlekettik bilim berý tapsyrysy, memlekettik-jekeshelik áriptestik, TMKKBK sheńberinde dárilik zattar men medıtsınalyq buıymdardy satyp alý qosyldy.
Kelesi jyly tabıǵı monopolııa sýbektileri men jer qoınaýyn paıdalanýshylardy satypalym alańdarynyń platformasyna qosý josparlanǵan. Bul amal satypalym rásimderin jeńildetip, birizdendirýge, sol sekildi retteletin satypalymdardyń ashyqtyǵyn nyǵaıtýǵa baǵyttalǵan.
Aıta keteıik, Qazaqstannyń e-Qyzmet júıesi halyqaralyq OPSI platformasynda tanystyryldy.