Elimizde birde-bir uıym múgedekti jumysqa alǵysy kelmeıdi – depýtat
Májilis depýtaty Tańsáýle Serikov Premer-Mınıstr Álıhan Smaıylovqa saýal joldap, múgedek jandardy jumysqa ornalastyrý máselesin kóterdi, dep habarlaıdy Kazinform.
«El Prezıdenti Qasym-Jomart Toqaev óziniń ár Joldaýynda múgedektigi bar jandardy qorǵaý, olarǵa degen kómekti ulǵaıtý kerektigin árdaıym aıtýda jáne naqty tapsyrýda. Bul Úkimetke ǵana emes, ár mekeme basshylaryna da qatysty. 2015 jyldan beri múgedektigi bar tulǵalardy jumyspen qamtý týraly zań qabyldandy. Naqty tapsyrma berildi. 2016 jyly ár mekemege kvota engizildi. Kvota mólsheri 2 paıyzdan 4 paıyzǵa deıin kórsetilgen. Álemdik kórsetkish – 6 paıyz. 2023 jyly Áleýmettik kodeks kúshine endi. Osy jyldyń 7 maýsymda Eńbek jáne halyqty áleýmettik qorǵaý mınıstriniń buıryǵymen múgedek adamdar úshin jumys oryndaryn kvotalaý Erejesi bekitildi. Bekitilgen erejede, tapsyrmada sol kúıinde qaldy», - dedi ol.
Onyń atap ótýinshe, birde-bir uıym múgedekti jumysqa alǵysy kelmeıdi. Múgedekti músirkeıdi. Al endi kóp mekeme ózderinde múgedek jannyń jumys istep júrgenin bilmeıdi de.
«Sebebi olar óziniń múgedek ekenin aıtqysy kelmeıdi. Óıtkeni jumystan aıyrylyp qalýdan qorqady. Ókinishke qaraı, kúnnen kúnge múgedektigi bar jandar sany artyp keledi. Sondyqtan olar erteńgi kúnine senimdi bolýlary úshin biz olarǵa kómektesip, jumys oryndaryn uıymdastyra bilýimiz kerek. Prezıdenttiń tapsyrmasy mindetti túrde oryndalýy tıis jáne ony Úkimet qadaǵalaýy kerek», - dedi Májilis depýtaty.
Osy oraıda Tańsáýle Serikov Úkimet basshysyna mynadaı usynystaryn jetkizdi.
1. Múgedektigi bar jandar úshin jumys oryndary mindetti túrde uıymdastyrylyp, qatań túrde qadaǵalanýy kerek.
2. Ony oryndamaǵan uıymdarǵa úlken mólsherde aıyppul salynýy qajet. Sol aıyppuldan túsken qarjyǵa múgedektigi bar tulǵalarǵa jumys oryndary uıymdastyrylǵany jón.
3. Oqý aǵartý mınıstrligine, Ǵylym jáne joǵary bilim mınıstrligine múgedektigi bar jandar úshin joǵary oqý oryndarynda, kolledjderde sapaly mamandar daıarlaıtyn, qaıta daıarlaıtyn oqý oryndary uıymdastyrýy tıis. Oqý oryndaryn támamdaǵan múgedektigi bar jandar memlekettik, kvazımemlekettik uıymdarda 100 paıyz jumysqa ornalastyrylýy kerek.
