Elimizde bızneske júktemeni azaıtýdyń jańa tetikteri iske asyrylady
Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine bıznes júrgizý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy Kazinform.
Zań jobasy arqyly engizilgen ózgerister men tolyqtyrýlar kásipkerlik qyzmetti júrgizý jaǵdaıyn jaqsartýǵa, memlekettik baqylaý júıesin retke keltirýge, olardy júrgizýdiń ashyqtyǵyna kepildik berýge, sondaı-aq bızneske júktemeni azaıtýǵa, sybaılas jemqorlyq táýekelderin tómendetýge jáne tutynýshylar, kásipkerlik sýbektileri men memleket múddeleriniń teńgerimdiligin qamtamasyz etýge baǵyttalǵan.
«2021 jylǵy 30 jeltoqsanda kásipkerlik qyzmet salasyndaǵy jańa retteýshilik saıasat máselesi boıynsha zań qabyldandy. Úkimet qabyldaǵan zańdy iske asyrý maqsatynda kásipkerlik salasynda «taza paraqtan» retteýdi engizý jónindegi jumysty eki baǵytta júrgizip jatyr. Birinshiden, memlekettik baqylaýdyń jańa júıesin engizý. Al ekinshiden, bıznes úshin mańyzdy emes talaptardy qysqartý esebinen ákimshilik júktemeni azaıtý. Memlekettik baqylaý jáne qadaǵalaý júıesin reformalaý aıasynda bıznesti jazalaýdan quqyq buzýǵa jol bermeýge kóshý kózdelgen. Zańdy iske asyrý maqsatynda 326 túzetýdi qamtıtyn zań jobasy ázirlendi. Túzetýler baqylaý men qadaǵalaý nysandaryn retke keltirýge, qadaǵalaý salalaryndaǵy jedel den qoıý sharalaryn tek zańnamalyq deńgeıde reglamentteýge baǵyttalǵan», - dedi Ulttyq ekonomıka mınıstri Álibek Qýantyrov.
Onyń aıtýynsha, jekelegen salalyq zańdarda jedel den qoıý sharalaryn qoldanýdyń sharttary men tártibi belgilenbegen.
Osyǵan baılanysty usynylyp otyrǵan zań jobasynda zańdar deńgeıinde mynadaı 10 salada jedel den qoıý sharalaryn qoldaný tetikteri aıqyndalady:
1) halyqtyń sanıtarııalyq-epıdemıologııalyq salamattylyǵy;
2) ósimdikter karantıni;
3) sáýlet, qala qurylysy jáne qurylys;
4) saýda maqsatynda teńizge shyǵý;
5) ishki sý kóligi;
6) janýarlar dúnıesin qorǵaý, ósimin kóbeıtý jáne paıdalaný salalary;
7) ónerkásiptik qaýipsizdik salasy;
8) orman qoryn kúzetý, qorǵaý, paıdalaný, orman ósirý salasy;
9) erekshe qorǵalatyn tabıǵı aýmaqtar salasy;
10) atom energııasyn paıdalaný salasy.
«Jedel den qoıý sharalaryn qabyldaý memlekettik organdarǵa quqyq buzý derekterine zań júzinde áreket etýge múmkindik beredi. Sonymen qatar, bıznes sýbektisiniń kinásinen halyqtyń ómiri men densaýlyǵyna qater tóndiretin qoǵamdyq qaýipti qolaısyz jaǵdaılardy boldyrmaýǵa yqpal etedi», - dedi mınıstr.
Munymen qosa ol bıznes úshin ózekti emes talaptardy qysqartý arqyly ákimshilik júktemeni azaıtý máselesine toqtaldy.
«2022 jyly barlyq memlekettik organda salalyq jumys toptary retteýdiń 44 salasy bólinisinde quryldy. Nátıjesinde jumys toptary 128 myńnan artyq talaptar anyqtalǵan 44 saladaǵy 2823 normatıvtik-quqyqtyq aktini taldady, olardyń ishinde 10 myńnan astamy jańa retteýshi saıasattyń bazalyq sharttaryna sáıkes kelmeıdi. 10 myń ózekti emes talaptardyń ishinen 9 myńy qazirdiń ózinde zańǵa táýeldi qujat deńgeıinde alynyp tastaldy. Qalǵan talaptar osy bıznes júrgizý jónindegi zań jobasyna engizilgen túzetýlerdiń biryńǵaı pýly aıasynda joıylyp jatyr. Biryńǵaı pýl kásipkerlik qyzmetti jetildirýge baǵyttalǵan 51 zańnamalyq aktige 386 túzetýdi qamtıdy. Kásipkerlik qyzmetti retteýdegi jańa tásilderdi iske asyrý bızneske túsetin júktemeni túbegeıli jeńildetýge jáne iskerlik belsendilikti serpindi damytýǵa múmkindik beredi», - dedi Á.Qýantyrov.
