Elimizde balyq ónimderiniń eksporty ósti me
ASTANA. KAZINFORM – Elimizde jergilikti mańyzy bar 3 myńǵa jýyq sý aıdandarynda akvasharýashylyqty damytýǵa bolady. Bul týraly Senattyń jalpy otyrysynda depýtat Arman Óteǵulov málim etti.
- Sońǵy jyldary álemde balyq sharýashylyǵy azyq-túlik qaýipsizdigin qamtamasyz etýdiń jáne aımaqtardyń ekonomıkasyn damytýǵa serpin beretin mańyzdy baǵyttardyń birine aınalyp otyr. BUU Azyq-túlik jáne aýyl sharýashylyǵy uıymynyń (FAO) derekterine sáıkes, álemde tutynylatyn balyq ónimderiniń 53 paıyzy akvasharýashylyq esebinen qamtamasyz etiledi. Memleket basshysy Qasym-Jomart Kemeluly Toqaev Atyraý oblysyna jumys sapary barysynda balyq salasyn damytýdy, memlekettik qoldaý máselelerin qaraýdy tapsyrdy. Prezıdent tapsyrmalaryn júzege asyryp, salany damytý úshin Úkimet Balyq sharýashylyǵyn damytýdyń 2030 jylǵa deıingi baǵdarlamasyn qabyldady. Atalǵan baǵdarlamaǵa sáıkes, balyq ósirý kólemin 2030 jylǵa deıin jylyna 270 myń tonnaǵa deıin ulǵaıtý, balyq ónimderin ishki tutynýdy 134 myń tonnaǵa arttyrý jáne balyq resýrstarynyń tabıǵı popýlıatsııasyn 7%-ǵa jetkizý josparlanyp otyr, - dedi A. Óteǵulov.
Onyń aıtýynsha, búginde Qazaqstanda jan basyna shaqqanda balyqty tutyný normasy jylyna 4 kelini qurap otyr. Al kórshiles Reseı men Qytaı elderinde bul kórsetkish 20 keliden asty. Al Dúnıejúzilik densaýlyq saqtaý uıymynyń málimetine sáıkes, bir adam bir jyldyń ishinde kem degende 16 keli balyq ónimin tutynǵany jón.
- Joǵaryda atalǵan baǵdarlamada josparlanǵan kórsetkishterge qol jetkizýge jáne balyq tutyný normasyn arttyrýǵa barlyq múmkindigimiz bar. Bizde halyqaralyq jáne respýblıkalyq mańyzy bar 20, jergilikti mańyzy bar 3 myńǵa jýyq sý aıdyndarynda akvasharýashylyqty damytýǵa bolady. Kaspıı teńizin eseptemegende, sý aıdyndarynyń jalpy aýdany shamamen 5 mln gektardy quraıdy. Ótken jyly elimizdiń tabıǵı sý aıdyndarynda 45 myń tonnaǵa jýyq balyq aýlandy. Balyq ósirýshiler 24 myń tonnadan astam balyq ósirdi. Bul 2023 jylmen salystyrǵanda 28 paıyzǵa kóp. Norvegııa, Qytaı, Vetnam jáne Chılı akvasharýashylyq salasynda kósh bastap turǵan elder. Budan basqa kórshiles Ózbekstan men Qyrǵyzstan elderinde de balyq sharýashylyǵy qarqyndy damyp keledi. Mysaly, Ózbekstan Respýblıkasy 2023 jyly 740 myń dollarǵa balyq eksporttaǵan. Al Qazaqstan 2024 jyly 24 myń tonna balyq ónimderin eksporttady. Onyń jalpy quny bar-joǵy 75 myń AQSh dollaryn quraǵan, - dedi depýtat.
Budan buryn habardanǵandaı, búgin Senattyń jalpy otyrysynda Akvasharýashylyq týraly» Zańy qaraldy. Senat qujattyń jekelegen baptaryn jańa redaktsııada usynyp, ony Májiliske qaıtardy.