Elimizde balalar men áıelderdiń jaǵdaıyn baǵalaý maqsatynda zertteý júrgizilip jatyr
PETROPAVL. KAZINFORM – Ulttyq statıstıka bıýrosy 29 qarashaǵa deıin 24 myń páter-úıdi aralap, saýalnama júrgizbek. Maqsat – elimizde balalar men áıelderdiń jaǵdaıyn baǵalaý úshin qajet negizgi kórsetkishterdi jınaý.
Ulttyq statıstıka bıýrosynyń Soltústik Qazaqstan oblysy boıynsha departamentiniń málimetinshe, qajetti aqparatty jınaý úshin ıÝNISEF ázirlegen Halyqaralyq mýltıındıkatorlyq klasterlik zertteý (MICS) qoldanylady.
«Qazaqstanda MICS zertteýi tórtinshi ret júrgizilip otyr. Buǵan deıin ol 2006, 2010 jáne 2015 jyldary ótkizilgen. Alynǵan málimetter bizge bazalyq kórsetkishterdi belgileýge, maqsatty anyqtaýǵa, ulttyq jáne halyqaralyq mindettemelerdi oryndaýdaǵy progresti baqylaýǵa múmkindik beredi.
Bıyl basymdyq áıelder men balalardyń densaýlyǵy men ál-aýqatynyń jaı-kúıin baǵalaý jáne monıtorıngten ótkizý, sondaı-aq olardyń damýynyń negizgi kórsetkishteri boıynsha senimdi aqparat alýǵa negizdelgen. Saýalnama densaýlyq saqtaý, tamaqtaný, bilim berý, sanıtarııa, balalardy erte jastan damytý jáne basqa da kóptegen aspektini qamtıtyn suraqtardan turady», - deıdi departament basshysynyń orynbasary Juldyz Nurǵalıeva.
Zertteý 2 qyrkúıek bastaldy. SQO-da qala-aýyldan 1500-den astam úı sharýashylyǵy qamtylady. Saýalnamany ıntervıýerler júrgizedi, olar - ulttyq statıstıka bıýrosy departamenttiń qyzmetkerleri.
«Intervıýerlerdiń arnaıy logotıpteri bar kıim kıip, beıdj taǵady. Árbir beıdjde saýalnama týraly senimdi aqparat alýǵa bolatyn resmı veb-saıttyń QR siltemesi kórsetiledi. MICS aıasynda bes negizgi saýalnama paraǵy bolady, olar: úı sharýashylyǵynyń saýalnamasy; áıelderge arnalǵan saýalnama; erlerge arnalǵan saýalnama; bes jasqa deıingi balalar týraly saýalnama jáne bes jastan on jeti jasqa deıingi balalar týraly saýalnama.
Ár saýalnama turmys pen densaýlyqtyń túrli aspektilerin qamtıdy. Barlyq saýalnama beıindi memlekettik organmen kelisilgen.
Mysaly, áıelder men erlerge arnalǵan saýalnamada jumyspen qamtý jáne oqytý, neke, psıhıkalyq densaýlyq máseleleri qamtylǵan. Áıelderge arnalǵan saýalnamada bosaný jáne bosanǵannan keıingi kómek týraly qosymsha suraqtar bar», - deıdi Juldyz Nurǵalıeva.
Mamannyń aıtýynsha, saýalnamaǵa qatysý erikti, alynǵan aqparat anonımdi saqtalyp, tek statıstıkalyq maqsattarda paıdalanylmaq.
«Intrevıýerlerimiz baratyn úılerdi osy zertteýge túsinistikpen qaraýǵa shaqyramyz. Respondentter kez kelgen suraqqa jaýap berýden bas tarta alady nemese kez kelgen ýaqytta suhbatty toqtata alady», - deıdi departamen basshysynyń orynbasary.
MICS iske qosylǵan 1996 jyldan beri 118 elde osyndaı zertteý júrgizilgen.
Buǵan deıin otandyq joǵary oqý oryndaryna táýelsiz baǵalaý júrgiziletindigin jazǵan edik.
