Elimizde ataýly áleýmettik kómekti esepteý júıesi qalaı ózgeredi
ASTANA. KAZINFORM – Bıyl aqpanda Eńbek jáne halyqty áleýmettik qorǵaý mınıstri Svetlana Jaqypova vedomstvo alqasynda elimizde ataýly áleýmettik kómekti tolyq transformatsııalaý kútip turǵanyn málimdedi. Ataýly áleýmettik kómekke qatysty tólemdi esepteý júıesi qalaı ózgeretini týraly Kazinform agenttigi mınıstrlikke resmı saýal joldaǵan edi.
Az qamtylǵan azamattardy áleýmettik qoldaý úshin elimizde ataýly áleýmettik kómek kórsetiledi. Ol aqshalaı tólemnen basqa, eńbekke qabiletti azamattardy jumyspen qamtýǵa járdemdesý, sondaı-aq mektep jasyna deıingi balalarǵa qosymsha tólemdi qamtıdy.
AÁK kórsetý muqtajdyqty baǵalaýmen jáne otbasynyń eńbekke qabiletti múshelerin jumysqa ornalastyrý shartymen júzege asyrylady. Taǵaıyndalǵan kómektiń mólsheri otbasynyń jıyntyq tabysyna baılanysty.
Eńbek mınıstrligi Memleket basshysynyń tapsyrmasyn oryndaý úshin azamattardyń kirisi men shyǵysyn eskere otyryp, AÁK kórsetýdiń bıznes-protsesin transformatsııalaý tetigin ázirleý boıynsha jumys júrgizilip jatqany aıtyldy. AÁK taǵaıyndaý memlekettik organdardyń basqa aqparattyq júıelerimen ıntegratsııalanǵan «Áleýmettik kómek» júıesi arqyly tolyq avtomattandyrylǵan.
«Múddeli memlekettik organdarmen birlesip azamattardyń negizgi shyǵystaryn esepke alý jáne verıfıkatsııalaý tetigi pysyqtalyp jatyr. Onyń aıasynda jyljymaly jáne jyljymaıtyn múlikti satyp alý, oqytý men qosymsha bilim alýǵa aqy tóleý, saıahat shyǵyndary, sanatorıı-kýrorttyq emdeý, aýdıovızýaldy jabdyqty satyp alý, jıhaz, turmystyq tehnıka satyp alý, kredıtterdi óteý jáne taǵy basqa negizgi shyǵys túrleri kózdelip otyr», - dep túsindirdi atalǵan vedomstvo.
Azamattardyń shyǵystary týraly málimetterdi alý úshin Ónerkásip jáne qurylys, Tsıfrlyq damý, ınnovatsııalar jáne aeroǵarysh ónerkásibi, Densaýlyq saqtaý, Oqý-aǵartý, Ǵylym jáne joǵary bilim mınıstrlikteriniń, Ulttyq banktiń basqa da quzyrly uıymdardyń aqparattyq júıelerin ıntegratsııalaý júrgiziledi.
Sondaı-aq, Eńbek jáne halyqty áleýmettik qorǵaý mınıstrligi 2025 jyldyń 1 qańtarynan bastap kedeılik sheginiń mólsheri halyqtyń ortasha tabysy negizinde anyqtalatynyn eske saldy. Otbasynyń árbir múshesine AÁK mólsheri belgili bir sala úshin ortasha tabys kórsetkishine baılanysty aıqyndalady. AÁK taǵaıyndaý krıterııi kedeılik shegi bolyp tabylady, onyń mólsheri ortasha tabystyń 50%-na teńestirý josparlanyp otyr.
«Eger árbir otbasy múshesiniń tabysy osy kórsetkishten tómen bolsa, aıyrmashylyq AÁK mólsherine teń. Osyǵan baılanysty, árbir naqty otbasy úshin AÁK taǵaıyndalǵan somasynyń mólsheri jeke anyqtalady, ıaǵnı jıyntyq tabystyń mólsherine jáne kedeılik shegine baılanysty», - dep habarlady mınıstrlik.
