Elimizde apta ishinde bolǵan kadrlyq taǵaıyndaýlar
ASTANA. KAZINFORM – Elimizde ótken aptada birqatar kadrlyq aýys-túıis boldy.
26 aqpanda Pavlodar oblysy Aqparat jáne qoǵamdyq damý basqarmasynyń basshysy taǵaıyndaldy.
Álnur Serikuly 1987 jyly 29 sáýirde dúnıege kelgen. 2010 jyly Varshava ýnıversıtetin támamdady. Saıasattaný magıstri dárejesi bar.
2010-2015 jyldar aralyǵynda Astana qalasynyń Іshki saıasat basqarmasynda túrli laýazymda, sonyń ishinde basqarma basshysynyń orynbasary bolyp jumys istedi.
2015-2016 jyldary – Astana qalasy ákimi apparaty basshysynyń orynbasary.
2016 jyldan bastap QR Prezıdentiniń Ákimshiliginde ártúrli laýazymdarda eńbek etti, onyń ishinde 2021 jyldan 2023 jyldar aralyǵynda Prezıdent Ákimshiliginiń ishki saıasat bólimi meńgerýshisiniń orynbasary qyzmetin atqardy.
Sol kúni Qazaqstan Respýblıkasy Prezıdenti Ákimshiliginiń kelisimi boıynsha Azamat Aıtbaıuly Taıjanov Qaraǵandy oblysy ákiminiń birinshi orynbasary bolyp taǵaıyndaldy.
Azamat Taıjanov Qazaq gýmanıtarlyq-zań ýnıversıtetin (Halyqaralyq quqyq bakalavry), Japonııadaǵy Tokaı ýnıversıtetin (ekonomıka magıstri), L.N.Gýmılev atyndaǵy Eýrazııa ulttyq ýnıversıtetin bitirgen. PhD doktory.
2007 jyldan bastap memlekettik qyzmette. Ekonomıka jáne bıýdjettik josparlaý, qorshaǵan ortany qorǵaý, ındýstrııa jáne jańa tehnologııalar mınıstrlikterinde ártúrli qyzmetter atqardy.
Stepnogorsk qalasy ákiminiń orynbasary, Aqmola oblysy Egindikól jáne Arshaly aýdandarynyń ákimi bolyp jumys istedi. «Qazaqstandyq turǵyn úı-kommýnaldyq sharýashylyqty jańǵyrtý jáne damytý ortalyǵy» AQ Basqarýshy dırektory, Basqarma tóraǵasynyń orynbasary – Basqarma múshesi boldy.
2021 jyldan 2023 jylǵa deıin – Qazaqstan Respýblıkasy Premer-Mınıstriniń orynbasary – Qarjy mınıstriniń keńesshisi.
2023 jylǵy mamyrdan bastap osy taǵaıyndaýǵa deıin Aqmola oblysy ákiminiń orynbasary qyzmetin atqardy.
Aptanyń alǵashqy kúni Bolatbek Aıtbaev «Jol aktıvteri sapasynyń ulttyq ortalyǵy» RMK-nyń bas dırektory boldy.
Bolatbek Qablanbekuly 1975 jyly Almaty qalasynda dúnıege kelgen.
M.Tynyshbaev atyndaǵy Qazaq kólik jáne kommýnıkatsııalar akademııasyn avtomobıl joldary men aerodromdar qurylysy mamandyǵy boıynsha bitirgen.
Eńbek jolyn 2004 jyly «QazJolǴZI» AAQ Astana qalasyndaǵy fılıalynda ınjener bolyp bastady.
B.Aıtbaev uzaq ýaqyt boıy «QazAvtoJol» júıesinde basshylyq qyzmetterde boldy.
Dúısenbide Gennadıı Golovkın Ulttyq olımpıada komıtetiniń prezıdenti bolyp saılandy.
QR UOK Bas assambleıasynyń otyrysyna olımpıadalyq sport túrleri boıynsha 35 ulttyq sport federatsııasynyń ókilderi men uıymnyń sportshylar komıssııasynan 2 ókil qatysty.
34 qatysýshy Gennadıı Golovkınniń kandıdatýrasyn qoldady, ekeýi qalys qaldy.
Sport áleminde GGG laqap atymen tanymal bolǵan Gennadıı Golovkın sharshy alańda shashasyna shań juqtyrmaı, áýesqoı da, kásipqoı da boksta óziniń urys mánerimen, erekshe stılimen mıllıondaǵan jankúıerdiń súıikti sportshysyna aınalǵan.
Ol áýesqoı boksta 350 jekpe-jek ótkizip, onyń 345-inde jeńiske jetti. Esh ýaqytta nokaýt turmaq, nokdaýnǵa da túsip kórgen joq. Gennadıı áýesqoı boksta Azııa, Álem chempıonattarynda top jardy. Alaıda Olımpıada chempıony bola almady, kúmis medaldi qanaǵat tutty. Ol 2004 jyly Afınada ótken Olımpıada oıyndary bolatyn. Dál osy jazǵy oıyndarǵa Golovkın qazaqqa únemi altyn medal syılap kelgen 69 keli salmaq sanatynda barýy tıis edi. Degenmen ol 75 kelige aýysyp, al 69 keli salmaqta el úmiti Baqtııar Artaevqa artylǵan bolatyn. Osy Olımpıadada Baqtııar Artaev chempıon atansa, Gennadıı Golovkın kúmis júldeger atandy. Degenmen, áli kúnge deıin dál osy jekpe-jekke qatysty daý kóp. Kópshilik Gennadııdiń sol ýaqytta reseılik Gaıdarbek Gaıdarbekovten jeńilmegenin aıtady. Genanyń ózi de sol jekpe-jekte jeńilmegenine senimdi.
Aıta keteıik, sol kúni Ulttyq olımpıada komıtetinde basqa da taǵaıyndaýlar boldy.
Atap aıtqanda, Ulttyq olımpıada komıtetiniń qysqy sport túrleri boıynsha vıtse-prezıdenti – Mamın Asqar Uzaqbaıuly saılandy.
Ol 1965 jyly 23 qazanda qazirgi Astana qalasynda dúnıege kelgen. Ár jyldary Astana qalasynyń ákimi, Kólik jáne kommýnıkatsııalar mınıstri, Premer-Mınıstrdiń orynbasary, Úkimet basshysy bolǵan.
Ulttyq olımpıada komıtetiniń jazǵy sport túrleri boıynsha vıtse-prezıdenti – Ábilǵazın Danııar Rústemuly. 1969 jyly Almaty qalasynda dúnıege kelgen. Ol – Qazaqstannyń Sý sporty túrleri federatsııasynyń prezıdenti, Ústel tennısi federatsııasynyń prezıdenti, Sporttyq jekpe-jek jáne kúsh qoldanylatyn sport túrleri konfederatsııasynyń tóraǵasy, «Almaty Triathlon Federation» QB qamqorshylyq keńesiniń, «Fizmat Endowment Fund» qamqorshylyq keńesiniń tóraǵasy.
Ulttyq olımpıada komıtetiniń jalpy máseleler boıynsha vıtse-prezıdenti – Erbol Qýantaıuly Myrzabosynov.
Ol 1984 jyly Shyǵys Qazaqstan oblysynda dúnıege kelgen. Semeı pedagogıkalyq ıstıtýtyn, Qazaq gýmanıtarlyq-zań ınnovatsııalyq ýnıversıtetin, Qazaq sport jáne týrızm akademııasyn bitirgen. 2020-2021 jyldary Qazaq kuresi qaýymdastyǵynyń basqarýshy dırektory, 2021-2023 jyldary Dene tárbıes jáne buqaralyq sport akademııasynyń rektory bolǵan. 2023 jyldan beri Mádenıet jáne sport mınıstrligi Sport isteri jáne dene tárbıesi komıtetiniń tóraǵasy qyzmetin atqarady.
Ulttyq olımpıada komıtetiniń paraolımpıadalyq sport túrleri boıynsha vıtse-prezıdenti – Sápıev Serik Jumanǵalıuly.
1983 jyly 16 qarashada Qaraǵandy oblysynda dúnıege kelgen. Mádenıet jáne sport mınıstrligi Sport isteri jáne dene tárbıesi komıtetiniń tóraǵasy qyzmetin atqarǵan. 2005 jáne 2007 jyldary bokstan álem chempıony, 2012 jyly Olımpıada chempıony bolǵan. Qazaqstannyń eńbek sińirgen sport sheberi, eńbek sińirgen sport qaıratkeri, Vel Barker kýbogynyń ıegeri.
Ulttyq olımpıada komıtetiniń bas hatshysy – Ótesheva Janar Azyrqanqyzy.
Ol sońǵy 2 jyl boıy Gennadıı Golovkın komandasynyń BAQ-pen jumys máselelerimen aınalysyp keldi.
Sondaı-aq, sporttyń olımpıadalyq túrleri boıynsha ulttyq federatsııa ókilderi Ulttyq olımpıada komıteti Atqarýshy komıtetiniń de múshesi boldy, olar:
Dmıtrıı Igorevıch Balandın 1995 jyly 4 sáýirde Almaty qalasynda dúnıege kelgen. 200 metrge brass ádisimen júzýden 2016 jylǵy jazǵy Olımpıada oıyndarynyń chempıony, Azııa oıyndarynyń úsh dúrkin chempıony, 2015 jyly ótken Ýnıversıada jeńimpazy.
Dıas Tóleýtaıuly Súleımenov 1972 jyly 27 shildede Temirtaý qalasynda dúnıege kelgen. «Qamqor Menedjment» JShS-niń bas dırektory, Qazaqstan Ulttyq shańǵy qaýymdastyǵynyń prızıdenti, Ulttyq paralımpıadalyq komıtettiń vıtse-prezıdenti.
Bolat Jamıtuly Ótemuratov 1957 jyly 13 qarashada Atyraý qalasynda dúnıege kelgen. Qazaqstan Tennıs federatsııasynyń prezıdenti, Halyqaralyq tennıs federatsııasynyń vıtse-prezıdenti (International Tennis Federation).
Álııa Maqsutqyzy ıÝsýpova 1984 jyly 15 mamyrda Shymkent qalasynda dúnıege kelgen. Qazaqstan sportshysy. Kórkem gımnastıkadan Afına men Beıjiń Olımpıadalaryna qatysqan;
Qýanyshbek Baqytbekuly Esekeev 1975 jyly 10 maýsymda Almaty qalasynda dúnıege kelgen. «Qazaqtelekom» AQ basqarmasynyń tóraǵasy jáne Dırektorlar keńesiniń múshesi.
Gadjı Shapıevıch Gadjıev 1974 jyly 29 qyrkúıekte dúnıege kelgen. Bıznesmen, qoǵam qaıratkeri. Aýyr atletıka federatsııasynyń birinshi vıtse-prezıdenti, QR Penchak sılat qaýymdastyǵynyń prezıdenti.
Danıal Kenjetaıuly Ahmetov 1954 jyly 15 maýsymda Pavlodar qalasynda dúnıege kelgen. Shyǵys Qazaqstan oblysynyń ákimi, Qorǵanys mınıstri, Premer-Mınıstr, Eýrazııalyq ekonomıkalyq komıssııanyń energetıka jáne ınfraqurylym jónindegi alqasynyń múshesi (mınıstr) bolǵan.
Qazaqstan Ulttyq olımpıada komıteti Tekserý komıssııasynyń tóraǵasy laýazymyna Alpamysov Abaı Ábdimásetuly saılandy.
Ol 1969 jyly 11 maýsymda dúnıege kelgen. Qazaqstan Ulttyq basketbol federatsııasynyń bas hatshysy, prezıdenti, Qyzylorda oblysy ákiminiń orynbasary qyzmetterin atqarǵan.
Qazaqstan Ulttyq olımpıada komıteti Tekserý komıssııasynyń múshesi bolǵandar:
Rabbanı Ábdikamaluly Áshimbekov – Qazaqstannyń gımnastıka federatsıfsynyń bas hatshysy.
Rollan Serikuly Serikov – Týrızm jáne sport mınıstrliginiń Sport isteri jáne dene tárbıesi komıteti tóraǵasynyń orynbasary.
Sportshylardyń, sportshylar saılaǵan komıssııanyń ókili bolyp Olga Sergeevna Rypakova saılandy.
Ol 1984 jyly 30 qarashada Óskemen qalasynda dúnıege kelgen. Jeńil atlet. Ol 2012 jyly London Olımpıadasynda altyn, Beıjiń Olımpıadasynda kúmis jáne Rıe-de-Janeıro Olımpıadasyna qola medal jeńip alǵan.
Ulttyq Olımpıada komıteti 1990 jyldyń 3 aqpanynda qurylyp, 1993 jyldyń qyrkúıek aıynda Halyqaralyq Olımpıada komıteti tarapynan resmı túrde tanylǵan. Ol derbes, táýelsiz qoǵamdyq uıym sanalady. Óz qyzmetin júzege asyrý barysynda Olımpıada hartııasy, Qazaqstan Respýblıkasy Zańdary jáne UOK Jarǵysyn negizge alady. UOK mıssııasy – Qazaqstan aýmaǵynda olımpıadalyq qozǵalysty damytý jáne ony qorǵaý, Olımpıadalyq qundylyqtardy nasıhattaý.
Sonymen qatar 26 aqpan kúni Aıdar Kıbaev Jetisý oblysy jumyldyrý daıyndyǵy basqarmasyna basshy boldy.
Aıdar Maýsymbaıuly 1968 jyly týǵan. Joǵary bilimdi.
Qazaq Eńbek jáne áleýmettik qatynastar akademııasyn bitirgen.
Eńbek jolyn Kırov aýdandyq avtobazada júrgizýshi bolyp bastady.
Ár jyldary Almaty oblysynyń tótenshe jaǵdaılar jónindegi basqarmasynyń Taldyqorǵan aımaqtyq ortalyǵynyń kezekshi dıspetcheri, Taldyqorǵan qalalyq TJ basqarmasynyń jetekshi mamany, bas mamany, bólim basshysy, Almaty oblystyq tótenshe jaǵdaılar departamentiniń bas mamany, Almaty oblysynyń jumyldyrý daıyndyǵy, azamattyq qorǵanys jáne avarııalar men tabıǵı apattardyń aldyn alýdy jáne joıýdy uıymdastyrý basqarmasynyń bas mamany, Eskeldi aýdany ákimi apparatynyń jalpy bóliminiń, jalpy jáne qarjy sharýashylyq bóliminiń áskerı-jumyldyrý jumystary, bastapqy áskerı daıyndyq, azamattyq qorǵanys jáne tótenshe jaǵdaılar jónindegi bas mamany, Almaty oblysy ákimi apparatynyń jumyldyrý daıyndyǵy jáne aýmaqtyq qorǵanys bóliminiń bas mamany, Jetisý oblysy ákimi apparatynyń jumyldyrý daıyndyǵy jáne aýmaqtyq qorǵanys bóliminiń bas ınspektory laýazymdaryn atqardy.
2022 jyldyń tamyzynan Jetisý oblysy ákimi apparatynyń jumyldyrý daıyndyǵy jáne aýmaqtyq qorǵanys bóliminiń basshysy.
Apta basynda Qaraǵandy oblysy boıynsha Ónerkásiptik qaýipsizdik departamentine jańa basshy keldi.
Sergeı Bragın Máskeý memlekettik ashyq ýnıversıtetiniń taý-ken fakýltetin «Gaıdaly qazbalar ken oryndaryn jerasty ıgerý» mamandyǵy boıynsha bitirgen.
Ár jyldary «Qaraǵandykómir» birlestiginde («Stepnaıa» shahtasy) elektroslesar, taý-ken sheberi, mehanık, jeldetý ýchaskesi jáne TB bastyǵynyń orynbasary bolyp jumys istedi.
QazKSR Memlekettik tehnıkalyq baqylaý Qaraǵandy okrýginiń basqarmasynda ýchaskelik taý-ken ınspektory, Shahtınsk taý-ken ınspektsııasy bastyǵynyń orynbasary boldy.
1998 jyldan 2022 jylǵa deıin — QR IDM ónerkásiptik qaýipsizdik komıtetiniń Qaraǵandy oblysy boıynsha departamenti № 4 kómir ónerkásibindegi memlekettik qadaǵalaý bóliminiń bas mamany.
2022 jyldyń tamyz aıynan bastap osy taǵaıyndaýǵa deıin QR Tótenshe jaǵdaılar mınıstrligi ónerkásiptik qaýipsizdik komıtetiniń Qaraǵandy oblysy boıynsha departamentiniń № 4 kómir ónerkásibindegi memlekettik qadaǵalaý jáne baqylaý bólimin basqardy.
27 aqpanda Eýropalyq Odaqtyń adam quqyqtary jónindegi jańa ókili taǵaıyndaldy.
Olaf Skýg – óz elinde jáne Eýroodaqtaǵy ártúrli laýazymdarda tájirıbesi bar shved dıplomaty. Eń sońǵy laýazymy – Birikken Ulttar Uıymyndaǵy Eýropalyq Odaq delegatsııanyń basshysy (2019 jyldyń jeltoqsanynan 2023 jyldyń tamyzyna deıin).
Eýropalyq keńeste atap ótkendeı, EO-nyń jańa Arnaıy ókili Eýroodaqtyń adam quqyqtary salasyndaǵy saıasatyn júzege asyrýǵa, halyqaralyq gýmanıtarlyq quqyqty saqtaý jáne halyqaralyq qylmystyq sot tóreligin qoldaýǵa qatysty EO ustanymyn júzege asyrýǵa úles qosýda ózine deıingilerdiń jumysyn jalǵastyrady.
Seısinbide QR Prezıdenti Qasym-Jomart Toqaevtyń 22 aqpandaǵy Jarlyǵymen el óńirlerinde sot tóraǵalary men sýdıalar taǵaıyndaldy.
Aptanyń ekinshi kúni Qazaqstan Respýblıkasy Premer-Mınıstriniń baspasóz hatshysy bolyp Dılıara Ardaqqyzy Alenova taǵaıyndaldy.
Dılıara Alenova halyqaralyq quqyq mamandyǵy boıynsha QazGZÝ ýnıversıtetin bitirgen.
Eńbek jolyn 2014 jyly tilshi bolyp bastady.
Ár jyldary QR Prezıdenti janyndaǵy ortalyq kommýnıkatsııalar qyzmetinde, QR Aqparat jáne kommýnıkatsııalar mınıstrligi aqparat komıtetinde, «Qazkontent» AQ-da, QR Premer-Mınıstriniń baspasóz qyzmetinde jumys istedi.
Almaty qalasynyń óńirlik kommýnıkatsııalar qyzmeti basshysy, Almaty qalasy qoǵamdyq damý basqarmasy kommýnıkatsııalyq is-tájirıbeler bóliminiń basshysy, Almaty qalasy ákiminiń baspasóz qyzmetiniń basshysy bolyp jumys istedi.
27 aqpanda Azat Isenov Ulytaý oblysy boıynsha Memlekettik kirister departamentin basqarýǵa kiristi.
Azat Isenov 1979 jyly týǵan. Bilimi boıynsha — qarjyger, zańger.
Shákárim atyndaǵy Semeı memlekettik ýnıversıtetin, Qazaq gýmanıtarlyq-zań ýnıversıtetin bitirdi.
Memlekettik qyzmettegi jumys ótili — 24 jyl.
Salyq júıesinde eńbek qyzmetin 2000 jyly bastady.
Qatardaǵy salyq ınspektorynan Qarjy mınıstrligi memlekettik kirister komıtetiniń Ulytaý oblysy boıynsha memlekettik kirister departamenti basshysynyń orynbasaryna deıin eńbek jolyn ótti.
2022 jylǵy qyrkúıekten bastap memlekettik kirister komıtetiniń Ulytaý oblysy boıynsha Memlekettik kirister departamenti basshysynyń orynbasary laýazymyn atqardy.
28 aqpanda Darhan Ábdýahıt AMANAT partııasynyń baspasóz hatshysy bolyp taǵaıyndaldy.
Darhan Ábdýahıt 1983 jyly 12 shildede dúnıege kelgen.
A.Baıtursynov atyndaǵy Qostanaı memlekettik ýnıversıtetiniń túlegi.
Eńbek jolyn «Jas qazaq», «Alǵa» jýrnaldarynda bastaǵan.
«Habar» arnasynda «Jeti kún», «Betpe-bet» baǵdarlamalarynyń júrgizýshisi boldy.
2022 jyldan bastap «Habar 24» arnasynda shyǵarýshy redaktor qyzmetin atqardy.
Sársenbide Dármenııar Qydyrbekuly Astanadaǵy Esil aýdanynyń ákimi bolyp taǵaıyndaldy.
42 jastaǵy Dármenııar Qydyrbekuly 4 jyldan astam ýaqyt Esil aýdany ákiminiń orynbasary qyzmetin atqarǵan.
Eńbek jolyn 2006 jyly «Múlhın» qory» qoǵamdyq birlestiginde bastaǵan.
Ár jyldary qoǵamdyq jáne jeke qurylymdarda jumys istedi.
2012-2013 jyldar aralyǵynda «Jetisý ÁKK» UK» AQ (Taldyqorǵan) basqarma tóraǵasynyń orynbasary laýazymyn atqardy.
2013 jyly Talǵar aýdany ákiminiń kómekshisi bolyp jumys istedi.
2013-2019 jyldar aralyǵynda Talǵar aýdany ákiminiń orynbasary boldy.
2019 jylǵy 19 qarashadan bastap Astana qalasy Esil aýdany ákiminiń orynbasary.
Memleket basshysynyń tapsyrmalary aıasynda Astana ákimi Jeńis Qasymbek aýdan men eldi mekenderdi damytý boıynsha birqatar mindet júktedi.
Sonymen qatar 28 aqpanda Ǵazızbek Samatov Semeı halyqaralyq áýejaıyna dırektor boldy.
Ǵazızbek Qaıratuly 1986 jyly 1 tamyzda Tarbaǵataı aýdany Tuǵyl kentinde dúnıege kelgen.
S.Amanjolov atyndaǵy Shyǵys Qazaqstan memlekettik ýnıversıtetinde «qarjyger» mamandyǵy, Azamattyq avıatsııa akademııasynda «áýe kóligindegi tasymaldaýdy uıymdastyrý» mamandyǵy boıynsha bilim alǵan.
Kóp jyldar boıy «Óskemen áýejaıy» AQ-da basshylyq laýazymdarda jumys istedi.
2018 jyldan bastap «Semeı halyqaralyq áýejaıy» JShS dırektorynyń kómekshisi – sapany baqylaý aýdıtory qyzmetin atqardy.
Taǵaıyndaýǵa deıin «Semeı halyqaralyq áýejaıy» JShS dırektorynyń avıatsııalyq qaýipsizdik jónindegi orynbasary – avıatsııalyq qaýipsizdik qyzmetiniń basshysy boldy.
Apta ortasynda (28 aqpan) Prezıdenttik kadr rezerviniń músheleri astananyń 4 mektebine konkýrssyz dırektor boldy.
Atap aıtqanda, Astana qalasy boıynsha 18 kandıdat respýblıkalyq kadr rezervine alyndy, bul týraly elorda ákimdigi habarlaǵan edi. Pedagogter quzyrettilikterin baǵalaý úshin testileýden ótti.
Ekinshi kezeńde — úsh deńgeıli oqytý, úshinshi kezeńde — eldiń jetekshi mektepterinde taǵylymdamadan ótý, tórtinshi kezeńde — qorytyndy baǵalaý jáne qorytyndy kezeńde mınıstrlik janyndaǵy komıssııamen áńgimelesý boldy.
Respýblıkalyq kadr rezervine engizilgen kandıdattardy orta bilim berý uıymdarynyń birinshi basshylarynyń bos laýazymdaryna taǵaıyndaý máselesi qaralýda. Qazirgi tańda bilim berý uıymdarynyń basshylary bolyp úsh úmitker taǵaıyndaldy.
№ 14 mektep-gımnazııa dırektory laýazymyna Ǵalııa Rahmatýllaqyzy Haılıtdınova, № 82 «Daryn» mamandandyrylǵan lıtseıiniń dırektory laýazymyna Aıgúl Bazarbaıqyzy Beısenbına, № 62 mektep-lıtseıine Qaırat Muqashev taǵaıyndaldy.
Kadr rezervi úmitkerleri bilim berý uıymdarynyń basshylary laýazymyna konkýrstyq rásimnen ótpeı-aq birinshi basshynyń bos ornyna taǵaıyndalady.
Jańa býyn menedjerleri aldaǵy ýaqytta kezeń-kezeńimen mektepterge jáne «Jaıly mektep» ulttyq jobasy aıasynda salynyp jatqan bilim oshaqtaryn kadrlyq jaǵynan qamtamasyz etý máselesin sheshýge járdemdesedi.
29 aqpanda Astana qalasynyń Dene shynyqtyrý jáne sport basqarmasynyń basshysy laýazymyna Vasılıı Levıt taǵaıyndaldy.
Qostanaı oblysynyń týmasy Vasılıı Levıt 1988 jyly dúnıege kelgen.
Qazaqstan Respýblıkasynyń eńbek sińirgen sport sheberi, eki márte Olımpıada oıyndaryna qatysqan. 2016 jylǵy Olımpıada oıyndarynyń kúmis júldegeri, álem chempıonatynyń eki dúrkin qola júldegeri, Qazaqstan tarıhyndaǵy alǵashqy úsh dúrkin Azııa chempıony, Azııa chempıonatynyń eki dúrkin júldegeri, bokstan halyqaralyq jáne ulttyq jarystardyń birneshe dúrkin jeńimpazy.
Ol 2022 jyldan bastap Sybaılas jemqorlyqqa qarsy is-qımyl agenttigi Qyzmetkerlerdi fızıkalyq shynyqtyrý basqarmasynyń basshysy bolyp qyzmet atqardy.
2 naýryzda Almatynyń grek-rım, áıelder jáne erkin kúres federatsııasyna jańa basshy keldi.
Qalalyq kúres federatsııasynyń basshysy Aıdar Berkimbaev sportshylardyń erekshe jetistikterin, onyń ishinde erkin kúresten álem chempıonatynyń tarıhyndaǵy tuńǵysh altyn medaldi Rızabek Aıtmuhan jeńip alǵanyn atap ótti.
Astanada ótken kúresten Qazaqstan Respýblıkasynyń chempıonatynda almatylyqtar joǵary deńgeı kórsetip, erkin kúresten jalpy esepte úshinshi, áıelder kúresinen birinshi oryndy jeńip aldy.
Federatsııa basshylyǵyndaǵy ózgerister týraly habarlandyrý mańyzdy sát boldy. Osyǵan baılanysty Aıdar Berkimbaev basshylyq qyzmetinen ketip, onyń ornyna kásipker jáne metsenat Omar Álıevti taǵaıyndaýdy usyndy. Onyń kandıdatýrasyn biraýyzdan qoldady.
Omar Álıev ózine bildirgen senim úshin rızashylyǵyn bildirip, balalar men jastardy sportqa baýlýǵa basa nazar aýdaryp, qalada kúresti damytýǵa nıetti ekenin jetkizdi.
Joǵary nátıjeler men kúresti damytýǵa qosqan úlesi úshin Aıdar Berkimbaevqa Respýblıkalyq kúres federatsııasy prezıdentiniń Alǵys haty tabys etildi. Konferentsııaǵa qatysýshylar U-17 jáne U-23 jas sanattary boıynsha aldaǵy QR chempıonatynda sportshylar men jattyqtyrýshylar quramyna sáttilik tiledi.
