Elimizde apta ishinde bolǵan kadrlyq taǵaıyndaýlar
ASTANA. KAZINFORM – Ótken aptada elimizde birqatar kadrlyq aýys-túıis boldy.
Balym Adamıdenova Týrızm jáne sport mınıstriniń BAQ-pen baılanys jónindegi keńesshisi qyzmetine taǵaıyndaldy.
2015 jyly L.N. Gýmılev atyndaǵy Eýrazııa ulttyq ýnıversıtetin «jýrnalıstıka» mamandyǵy boıynsha aıaqtap, 2022 jyly osy oqý ornynda «halyqaralyq jýrnalıstıka» mamandyǵy boıynsha magıstratýrany támamdaǵan.
Eńbek jolyn 2015 jyly «Qazaqstan Baspasóz klýby» aqparat ortalyǵynda joba menedjeriniń assıstenti qyzmetinen bastaǵan. Sonymen qatar Oqý-aǵartý jáne Densaýlyq saqtaý mınıstrlikterinde baspasóz qyzmetin basqarǵan. Astana qalasy Esil aýdany ákiminiń keńesshisi qyzmetin atqarǵan. Tórt jyldan astam ýaqyt «Týrıstik Qamqor» qorynyń medıa jobalaryn úılestirýshi bolyp eńbek etti.
Serik Tólenbergenov Abaı oblysy ákiminiń orynbasary bolyp taǵaıyndaldy.
Serik Tólenbergenov 1974 jyly Semeı oblysynda dúnıege kelgen. Eńbek jolyn 1995 jyly jeke uıymda býhgalter bolyp bastaǵan. Respýblıkalyq jáne óńirlik deńgeılerde basqarýshylyq tájirıbesi mol. Ár jyldary Qazaqstan Respýblıkasynyń Qarjy mınıstrligi qurylymdarynda qyzmet atqarǵan, jekemenshik sektor kásiporyndaryn basqarǵan, sondaı-aq ákimdik júıesinde jumys istegen.
Rıdder qalasy ákiminiń orynbasary, Ulan aýdanynyń ákimi, Aqtóbe oblysy ákiminiń orynbasary qyzmetterin atqarǵan. Sonymen qatar Shyǵys Qazaqstan, Aqtóbe jáne Abaı oblystarynda qurylys, energetıka jáne turǵyn úı-kommýnaldyq sharýashylyq basqarmalaryn basqarǵan.
Sondaı-aq «Báıterek» ulttyq holdıngi basqarma tóraǵasynyń keńesshisi, Semeı qalalyq máslıhatynyń depýtaty bolǵan.
QR Premer-mınıstriniń orynbasary – ulttyq ekonomıka mınıstriniń buıryǵymen Tımýr Qosymbaev QR UEM Tabıǵı monopolııalardy retteý komıtetiniń tóraǵasy qyzmetine taǵaıyndaldy.
Tımýr Qosymbaev 1989 jyly Jezqazǵan qalasynda dúnıege kelgen. Qazaqstan menedjment, ekonomıka jáne boljaý ınstıtýtyn, E. A. Bóketov atyndaǵy Qaraǵandy memlekettik ýnıversıtetin bitirgen. Ulybrıtanııada Lester Ýnıversıtetinde bilim alǵan.
Eńbek jolyn 2011 jyly Qazaqstan Respýblıkasynyń respýblıkalyq bıýdjettiń atqarylýyn baqylaý jónindegi Esep komıtetinde bastaǵan. 2019 jylǵa deıin osy mekemede ártúrli laýazymdarda qyzmet atqarǵan.
2019-2022 jyldar aralyǵynda Qazaqstan Respýblıkasy Prezıdenti Ákimshiliginiń Qarjy-ekonomıka bóliminiń bıýdjet qarjylandyrý sektorynyń meńgerýshisi qyzmetin atqardy.
2022 jyldan bastap búgingi kúnge deıin QR Ulttyq ekonomıka mınıstrligi Tabıǵı monopolııalardy retteý komıteti tóraǵasynyń orynbasary laýazymyn atqardy.
Samal Qadyrova Pavlodar oblysynyń jumyspen qamtýdy úılestirý jáne áleýmettik baǵdarlamalar basqarmasynyń basshysy bolyp taǵaıyndaldy.
Samal Qanatqyzy 1977 jyly týǵan, joǵary bilimdi. Eńbek jolyn 1996 jyly Aqtoǵaı aýdanynyń Qojamjar aýylyndaǵy J. Tilenshın atyndaǵy orta mektepte bastaýysh synyp muǵalimi bolyp bastaǵan.
Memlekettik qyzmettegi eńbek jolyn 2014 jyly oblystyq bilim basqarmasynda bas maman bolyp bastaǵan.
2017-2022 jyldary Ertis jáne Maı aýdandarynda bilim bóliminiń basshysy jáne ákimniń orynbasary, sondaı-aq QR Bilim jáne ǵylym mınıstrliginde basqarma basshysy qyzmetterin atqarǵan.
2022-2024 jyldary Baıanaýyl aýdany ákiminiń orynbasary jáne Pavlodar oblysy bilim basqarmasy basshysynyń orynbasary bolǵan.
2024 jyldan bastap osy laýazymǵa taǵaıyndalǵanǵa deıin Jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary qyzmetin atqardy.
«Jeńis» fýtbol klýby bas bapkeri qyzmetine ýkraınalyq maman Andreı Demchenko keldi.
Andreı Demchenko 1976 jyly Ýkraınada dúnıege kelgen. Sporttyq mansabynda Reseıdiń TsSKA, Nıderlandtyń «Aıaks», Ýkraınanyń «Metallýrg» (Zaporoje), «Ilıchevets», «Obolon», «Gelıos», Moldovanyń «Dachııa» klýbtarynda dop tepken.
2011 jyldan beri bapkerlik qyzmetinde Ýkraınanyń «Imeks», «Metallýrg» (Zaporoje), «Lvov», «Metallıst-1925», «Býkovına», Grýzııanyń «Dıla», «Dınamo» (Batýmı) klýbtarynda eńbek etti.
Qazaqstan Respýblıkasy Úkimetiniń qaýlysymen Gúlzat Іzbasarqyzy Kóbenova ǵylym jáne joǵary bilim vıtse-mınıstri bolyp taǵaıyndaldy.
Gúlzat Іzbasarqyzy 1978 jyly Aqtóbe oblysynda dúnıege kelgen. Q. Jubanov atyndaǵy Aqtóbe memlekettik ýnıversıteti men E.A. Bóketov atyndaǵy Qaraǵandy memlekettik ýnıversıtetin támamdaǵan.
Eńbek jolyn 1998 jyly Q. Jubanov atyndaǵy ýnıversıtette oqytýshy bolyp bastaǵan. 2002-2009 jyldary atalǵan oqý ornynda jáne Aqtóbe pedagogıkalyq ınstıtýtynda basshylyq qyzmetter atqarǵan.
2009-2010 jyldary QR Mádenıet jáne aqparat mınıstrliginde, 2010-2018 jyldary QR Bilim jáne ǵylym mınıstrliginde túrli laýazymdarda jumys istegen.
2018-2019 jyldary – Elbasy kitaphanasy dırektorynyń orynbasary, keıin QR Prezıdenti Keńsesinde sektor meńgerýshisi jáne ınspektor bolyp qyzmet atqardy.
2019-2023 jyldary Bilim jáne ǵylym salasyn baqylaý jáne sapany qamtamasyz etý boıynsha birqatar komıtetterdi basqarǵan.
Azat Sarpekov QR Atom energııasy jónindegi agenttigi Apparaty basshysynyń mindetin atqarýshy bolyp taǵaıyndaldy.
Eńbek jolyn 2009 jyly Semeı qalasyndaǵy Elektrotehnıka kolledjinde óndiristik oqý sheberi retinde bastaǵan. Keıin sheberhana meńgerýshisi, dırektordyń orynbasary, odan soń kolledj dırektory qyzmetterin atqarǵan.
2020 jyly «Nur Otan» partııasynyń Semeı qalalyq fılıaly tóraǵasynyń birinshi orynbasary, odan keıin «Teplokommýnenergo» memlekettik kommýnaldyq kásipornynyń dırektory bolyp jumys istedi.
2022–2023 jyldary Ekibastuz qalasy ákiminiń orynbasary qyzmetin atqaryp, qalalyq basqarý júıesinde eńbek etti.
2023 jyldan beri QR Energetıka mınıstrligine qarasty Atomdyq jáne energetıkalyq qadaǵalaý men baqylaý komıteti tóraǵasynyń orynbasary qyzmetin atqardy.
«Qazposhta» AQ tóraǵasynyń buıryǵymen Aızat Іztileýova Qyzylorda oblystyq fılıalynyń dırektory qyzmetine taǵaıyndaldy.
Aızat Іztileýova 1972 jyly Qyzylorda qalasynda dúnıege kelgen. Qazaq memlekettik basqarý akademııasynda ekonomıst mamandyǵy boıynsha bilim alǵan.
Eńbek jolyn 1995 jyly jylý-elektr ortalyǵynda býhgalter retinde bastaǵan. Ár jyldary jeke kompanııalarda, sondaı-aq «Qazposhta» men «Turǵyn úı qurylys jınaq banki» AQ-da jaýapty qyzmetter atqarǵan.
2018 jyldan beri «Qazposhta» Qyzylorda oblystyq fılıaly dırektorynyń orynbasary qyzmetin atqaryp kelgen.
Memlekettik qyzmet isteri agenttiginiń kelisimimen jáne merıtokratııa qaǵıdatyna sáıkes Batys Qazaqstan oblysy ákiminiń ókimimen Nurken Ediluly Moldashev oblystyq qurylys basqarmasynyń basshysy qyzmetine taǵaıyndaldy.
Nurken Moldashev 1990 jyly Batys Qazaqstan oblysy Syrym aýdanynda dúnıege kelgen. Joǵary bilimdi – Jáńgir han atyndaǵy Batys Qazaqstan agrarlyq-tehnıkalyq ýnıversıtetin mashına jasaý jáne qurylys mamandyǵy boıynsha támamdaǵan.
Eńbek jolynda birqatar qurylys kompanııalarynda («BatysKonstrakshn», «KKB», «Álim», «Ýralskstroımontaj») qyzmet atqarǵan. Sonymen qatar BQO qurylys basqarmasynyń óndiristik-tehnıkalyq bóliminde bas maman, keıin osy bólimniń basshysy bolǵan.
Taǵaıyndalǵanǵa deıin basqarma basshysynyń orynbasary qyzmetin atqardy.
QR Densaýlyq saqtaý mınıstrliginiń Medıtsınalyq jáne farmatsevtıkalyq baqylaý komıtetine qarasty Qyzylorda oblystyq departamentiniń basshysy laýazymyna Lázzat Aıtymbetova taǵaıyndaldy.
Lázzat Aıtymbetova 1974 jyly Qarmaqshy aýdanynda dúnıege kelgen. Shymkent memlekettik farmatsevtıkalyq ınstıtýtynda provızor, sondaı-aq Ortalyq Azııa ýnıversıtetinde qarjy jáne nesıe mamandyqtary boıynsha bilim alǵan.
Eńbek jolyn 1996 jyly Qyzylorda qalalyq perzenthanasynda dárihana provızory retinde bastaǵan. Ár jyldary oblystyq densaýlyq saqtaý basqarmasynda, Medıtsınalyq jáne farmatsevtıkalyq baqylaý komıtetiniń Qyzylorda oblysy boıynsha departamentinde, sondaı-aq Áleýmettik medıtsınalyq saqtandyrý qorynda jaýapty qyzmetter atqarǵan.
2024 jyldan beri atalǵan komıtettiń ortalyq apparatynda basshylyq laýazymdarda jumys istegen.
Sáken Erjanuly Mamyrbekov Túrkistan halyqaralyq áýejaıynyń dırektory bolyp taǵaıyndaldy.
Jańa basshy buǵan deıin «Shymkent áýejaıy» AQ-da ekonomıka jáne qarjy jónindegi basqarma tóraǵasynyń orynbasary qyzmetin atqarǵan. Ol áýe kóligi ınfraqurylymyn damytý, strategııalyq josparlaý men qarjylyq turaqtylyqty qamtamasyz etý salalarynda mol tájirıbege ıe.