Elimizde apta ishinde bolǵan kadrlyq taǵaıyndaýlar
ASTANA. KAZINFORM – Ótip bara jatqan aptada elimizdiń ortalyq memlekettik organdary men óńirlerinde birqatar kadrlyq aýys-túıis boldy.
Ásirese eldiń kúshtik qurylymdarynda mańyzdy aýys-túıis tirkeldi. Aptanyń alǵashqy kúninde Ulttyq qaýipsizdik komıteti tóraǵasynyń eki orynbasary taǵaıyndaldy.
Memleket basshysynyń ókimimen Marat Qabıdenuly Jumabaev QR Ulttyq qaýipsizdik komıteti tóraǵasynyń orynbasary – Syrtqy barlaý qyzmetiniń dırektory laýazymyna taǵaıyndaldy.
Sonymen qatar Almas Tilepbergenuly Naımantaev Qazaqstan Respýblıkasy Ulttyq qaýipsizdik komıteti tóraǵasynyń orynbasary laýazymyna taǵaıyndaldy.
Al Baqytbek Jamalbekuly Qosjanov Qazaqstan Respýblıkasy Ulttyq qaýipsizdik komıteti tóraǵasynyń orynbasary laýazymynan bosatyldy.
Aptanyń ortasynda Rýslan Serikuly Sarqulov Ulttyq qaýipsizdik komıteti tóraǵasynyń orynbasary bolyp taǵaıyndaldy.
Sondaı-aq, Memleket basshysynyń ókimimen Qaırat Saparbekuly Dáýitov QR Qarýly Kúshteri Áýe qorǵanysy kúshteri Áýe shabýylyna qarsy qorǵanys áskerleriniń qolbasshysy laýazymyna taǵaıyndaldy.
Bul qyzmette bolǵan Nurtas Dáýletuly Qabaqov laýazymynan bosatyldy.
Parıj Olımpıadasynan keıin Týrızm jáne sport mınıstri laýazymynan bosatylǵan Ermek Marjyqpaev osy aptada jańa laýazymǵa ıe bolady.
Ermek Marjyqpaev 1969 jyly Astana (Tselınograd) qalasynda dúnıege kelgen.
S. Seıfýllın atyndaǵy Aqmola memlekettik pedagogıkalyq ınstıtýtyn, «Turan» ýnıversıtetin jáne Kókshetaý ýnıversıtetin bitirgen.
Eńbek jolyn 1991 jyly dene shynyqtyrý muǵalimi bolyp bastaǵan:
1992-1993 jyldary — Aqmola oblysy Býrabaı kentiniń orta mektebinde muǵalim.
1993-1994 jyldary — «Shonaı» ShJK dırektory.
1994-2008 jyldary — «Bereke-Býrabaı» JShS dırektory.
2008-2012 jyldary — Aqmola oblysy Arshaly aýdanynyń ákimi.
2012-2013 jyldary — Aqmola oblysy Zerendi aýdanynyń ákimi.
2013-2014 jyldary — Aqmola oblysy ákiminiń orynbasary.
2014-2015 jyldary — Qazaqstan Respýblıkasy Prezıdenti Ákimshiligi Memlekettik baqylaý jáne aýmaqtyq-uıymdastyrý jumysy bóliminiń memlekettik ınspektory.
2015-2019 jyldary — Aqmola oblysy Kókshetaý qalasynyń ákimi.
2019 jylǵy naýryzdan — Aqmola oblysynyń ákimi.
2023 jylǵy 2 qyrkúıekte Qazaqstan Respýblıkasy Prezıdentiniń Jarlyǵymen týrızm jáne sport mınıstri bolyp taǵaıyndalyp, bıyl 31 tamyzda bosatylǵan edi.
Qaraǵandy oblysy ákiminiń orynbasary laýazymyna Temirtaýdyń burynǵy ákimi Oraz Táýirbekov taǵaıyndaldy.
Ol bul laýazymda densaýlyq saqtaý, jumyspen qamtý jáne eńbek qaýipsizdigi máselelerine jetekshilik etetin bolady.
Oraz Táýirbekov salyq qyzmetinde jumys istep, salyq ınspektory qyzmetinen birneshe óńirdegi oblystyq basqarmalardyń basshysyna deıingi joldan ótti. Sondaı-aq, kommertsııa salasyndaǵy basshylyq laýazymdarda jumys tájirıbesi bar.
Jeti jyl Qaraǵandy oblysynyń Tekserý komıssııasynyń múshesi bolyp jumys istedi.
Oraz Táýirbekov Qaraǵandy oblysynyń ekonomıka jáne bıýdjettik josparlaý basqarmasyn, qaıta qurylǵannan keıin – «Qaraǵandy oblysynyń ekonomıka basqarmasy» MM basqardy. Balqash qalasynyń ákimi bolǵan. 2022 jyldyń qyrkúıeginen bastap osy taǵaıyndaýǵa deıin Temirtaý qalasynyń ákimi qyzmetin atqardy.
Túrkistan oblysynyń ákimi Darhan Satybaldynyń ókimimen Nurdáýlet Medeýov Túrkistan oblystyq týrızm basqarmasynyń basshysy bolyp taǵaıyndaldy.
Eńbek jolynda «Ońtústik Qazaqstan oblysy týrızmdi damytý assotsıatsııasy» qoǵamdyq birlestiginiń dırektor mindetin atqarýshy, Astana qalasynyń bilim basqarmasy «Jas saıahatshylar stantsııasy» memlekettik mekemesiniń týrızm nusqaýshysy, 2017 jyly Astana qalasynyń bilim basqarmasy «Balalar men jasóspirimderdiń týrızm jáne ólketaný ortalyǵy» MKQK-niń týrızm nusqaýshysy bolyp qyzmet etti.
Sondaı-aq, Túrkistan oblysy týrızm jáne syrtqy baılanystar basqarmasynyń «Turkistan Tourism Center» týrıstik aqparattyq ortalyǵy» KMM-niń basshy orynbasary, Týrızm basqarmasy Týrızmdi damytý bóliminiń bas mamany, Týrıstik jobalardy josparlaý jáne júzege asyrý bóliminiń basshysy, Týrızmdi damytý jáne týrıstik jobalardy iske asyrý bóliminiń basshysy bolyp eńbek etti. Jyl basynan búgingi kúngn deıin, Túrkistan oblysynyń mádenıet jáne týrızm basqarmasy jáne mádenıet basqarmasy basshysynyń orynbasary laýazymyn atqardy.
Almaty qalasy Memlekettik aktıvter basqarmasynyń basshysy bolyp Erkinbek Rahymbaıuly Ámirǵalıev taǵaıyndaldy.
Onyń eńbek joly 2004 jyly Almaty qalasy Jetisý aýdanynyń №2 aýdandyq sotynyń sot otyrysy hatshysynyń m.a. laýazymynan bastaldy.
Sondaı-aq ol Ádilet mınıstrliginde, Densaýlyq saqtaý mınıstrliginde, Eńbek jáne halyqty áleýmettik qorǵaý mınıstrliginde, sondaı-aq QR Joǵarǵy sotynda birqatar negizgi laýazymdy atqardy.
Keıingi jyldary Erkinbek Ámirǵalıev Almaty qalasy eńbek ınspektsııasy basqarmasynyń basshysy boldy.
Abaı oblysy qarjy basqarmasynyń basshysy bolyp Ashat Smaılov taǵaıyndaldy.
Ashat Saıdahmetuly 1968 jyly 1 naýryzda Semeı oblysy Aqsýat aýdany Qyzyl-Kesik aýylynda dúnıege kelgen.
Eńbek jolyn 1991 jyly Aqsýat aýdandyq qarjy bólimine kiristerdiń túsýin boljaý jáne ekonomıkalyq taldaý boıynsha aǵa ekonomıst retinde bastady. 1994-1997 jyldary Aqsýat aýdandyq qarjy bóliminiń salyqtardy boljaý bóliminiń meńgerýshisi, qarjy bóliminiń meńgerýshisi bolǵan.
1997-2002 jyldary Tarbaǵataı aýdanynyń qarjy bólimi meńgerýshisiniń orynbasary. 2002-2005 jyldary Tarbaǵataı aýdandyq ekonomıka bóliminiń basshysy. 2005-2007 jyldary Tarbaǵataı aýdany ákiminiń orynbasary.
2007-2009 jyldary Tarbaǵataı aýdandyq qarjy bóliminiń, ekonomıka jáne bıýdjettik josparlaý bóliminiń basshysy, Kókjyra aýylynyń ákimi laýazymdaryn atqardy.
2009-2010 jyldary Tarbaǵataı aýdany ákimi apparatynyń basshysy boldy. 2010-2018 jyldary qaıtadan Tarbaǵataı aýdany ákiminiń orynbasary bolyp qyzmet etken.
2018-2020 jyldary Kókpekti aýdanynyń, 2020-2022 jyldary Tarbaǵataı aýdanynyń ákimi laýazymdaryn atqardy.
2022 jyldan osy ýaqytqa deıin Abaı oblysy Aqsýat aýdanynyń ákimi bolyp jumys istedi.
Shyǵys Qazaqstan oblysy Úlken Naryn aýdanynyń ákimi bolyp Eldos Baırahmetov taǵaıyndaldy.
Eńbek jolyn 2011 jyly «Qazaqtelekom» AQ-da operator bolyp bastady. 2012-2013 jyldary «Qazaqtelekom» AQ-da tehnık, ınjener-konstrýktor bolyp jumys istedi.
2016-2018 jyldar aralyǵynda «Astanatelekom» mekemesinde ártúrli laýazymdarda jumys istegen.
2019-2021 jyldary «Ertis» ÁKK» AQ Basqarma tóraǵasynyń orynbasary laýazymyn atqardy.
2021-2022 jyldary Máskeý qalasyndaǵy Eýrazııalyq ekonomıkalyq komıssııanyń ekonomıka jáne qarjy saıasaty jónindegi alqa múshesiniń keńesshisi, kómekshisi boldy.
2022-2023 jyldary Shyǵys Qazaqstan oblysynyń Qarjy basqarmasy basshysynyń orynbasary bolyp qyzmet etti.
2023-2024 jyldary Shyǵys Qazaqstan oblysynyń Kásipkerlik jáne ındýstrıaldy-ınnovatsııalyq damý basqarmasynyń basshysy bolǵan.
Qaraǵandy oblysy Buqar jyraý aýdanynyń ákimi bolyp Erlan Qusaıyn taǵaıyndaldy.
Eńbek jolyn 1999 jyly bastaǵan. 2007 jyldan bastap memlekettik qyzmette. Qaraǵandy oblysy Kásipkerlik jáne ónerkásip departamentiniń qarjy, uıymdastyrý jáne kadr jumysy bóliminiń bas mamany boldy.
2008 jyldan 2014 jylǵa deıin Qaraǵandy oblysy ákiminiń baspasóz qyzmetinde túrli qyzmetter atqardy. Sodan keıin Buqar jyraý aýdany ákiminiń orynbasary bolyp jumys istedi. Qaraǵandy oblysy ákimi apparatynyń Qazaqstan halqy Assambleıasynyń Hatshylyǵyn basqardy. Qaraǵandy oblysy ákimi apparatynyń «Qoǵamdyq kelisim» KMM dırektory, ishki saıasat basqarmasynyń basshysy, Qarqaraly aýdanynyń ákimi boldy.
2023 jyldyń qarasha aıynan bastap osy taǵaıyndaýǵa deıin Qaraǵandy oblysy ákiminiń orynbasary qyzmetin atqardy.
Qazaqstandyq «Barys» hokkeı klýbyna bas bapker bolyp Vıacheslav Býtsaev taǵaıyndaldy.
V. Býtsaev oıynshy retinde Olımpıada jáne álem chempıony atanǵan. AQSh-taǵy Ulttyq hokkeı lıgasynda 130-dan astam match ótkizgen.
Buǵan deıin ol Reseıdiń TsSKA, «Sochı» jáne «Neftehımık» komandalarynyń bas bapkeri bolǵan.
Al «Vıtıaz» klýbyn bas bapker bolyp júrgende atalmysh ujym Qurlyqtyq hokkeı lıgasynyń 2022-2023 jylǵy maýsymynda pleı-off kezeńine shyqqan bolatyn.
