Elimizde apta ishinde bolǵan kadrlyq taǵaıyndaýlar
ASTANA. KAZINFORM – Osy aptada elimizdiń ákimdikterinde birqatar kadrlyq aýys-túıis boldy.
QR Prezıdenti Ákimshiliginiń kelisimimen Jambyl oblysy ákiminiń orynbasary bolyp Serik Jaqsylyquly Sálemov taǵaıyndaldy.
S. Jaqsylyquly 1972 jyly týǵan. Bilimi joǵary. Qazaq memlekettik sáýlet-qurylys akademııasyn, Q.A.ıAssaýı atyndaǵy Halyqaralyq qazaq-túrik ýnıversıtetin, QR Prezıdentiniń janyndaǵy Memlekettik basqarý akademııasyn bitirgen.
Ár jyldary «Saltanat» shaǵyn memlekettik kásiporynda teri ótkerýshi, «Aqbastaý» shaǵyn jeke kásipornynda qurylys ýchaskesiniń sheberi, «Saltanat» shaǵyn memlekettik kásipornynda dırektordyń orynbasary, Jambyl aýdany ákimi apparatynyń uıymdastyrý jáne kadr bóliminiń bas keńesshisi, bas mamany, Baızaq aýdany ákimi apparatynyń uıymdastyrý jáne kadr bóliminiń meńgerýshisi, Jambyl oblystyq máslıhat apparatynyń bas mamany, uıymdastyrý jumystary bóliminiń meńgerýshisi, jetekshisi laýazymdaryn atqarǵan.
2022 jylǵy shilde aıynan bastap búginge deıin M.H. Dýlatı atyndaǵy Taraz óńirlik ýnıversıtetiniń Basqarma múshesi – Infraqurylymdy damytý jónindegi prorektory qyzmetin atqaryp keldi.
Oblys ákiminiń jańa orynbasary bilim, dene shynyqtyrý jáne sport, aqparat jáne qoǵamdyq damý, din, mádenıet jáne tilderdi damytý salalaryna jetekshilik etedi.
***
Osy aptada Atyraý oblystyq bilim basqarmasynyń basshysy qyzmetine Marat Ábýov taǵaıyndaldy.
Marat Álmenuly H.Dosmuhamedov atyndaǵy Atyraý memlekettik ýnıversıtetin shetel tili, Batys Qazaqstan ınjenerlik-gýmanıtarlyq ýnıversıtetin quqyqtaný mamandyǵy boıynsha bitirgen. Memlekettik basqarý akademııasynan magıstr dárejesin alǵan.
Eńbek jolyn bilim salasynda ustazdyq etýden bastaǵan. 1999-2004 jyldary Qyzylqoǵa aýdanyndaǵy H.Dosmuhamedov atyndaǵy orta mekteptiń muǵalimi bolǵan. 2004-2005 jyldary Qyzylqoǵa aýdandyq bilim berý bóliminde, 2005-2008 jyldary aralyǵynda Qyzylqoǵa aýdany ákimi apparatynyń uıymdastyrý-kadr jáne memlekettik-quqyqtyq jumystar bóliminde bas maman bolyp jumys istegen.
Al, 2008-2011 jyldary Qyzylqoǵa aýdany ákimi apparatynyń jalpy bóliminde bólim meńgerýshisi, 2011-2017 jyldary Qyzylqoǵa aýdany ákimi apparatynyń basshysy, 2017-2022 jyldary Qyzylqoǵa aýdany ákiminiń áleýmettik máseleler jónindegi orynbasary laýazymyn atqarǵan. 2022 jyldan bastap osyi taǵaıyndaýǵa deıin oblys ákimi apparaty basshysynyń orynbasary qyzmetin atqaryp keldi.
***
Almaty qalasy ákiminiń ókimimen Ázız Qajdenbek jastar saıasaty basqarmasynyń basshysy qyzmetine taǵaıyndaldy.
Ázız Qajdenbek 1993 jyly týǵan. Ál-Farabı atyndaǵy Qazaq ulttyq ýnıversıtetin bitirgen. Eńbek jolyn 2013 jyly bastady. Ár jyldary qaladaǵy úkimettik emes uıymdarda, joǵary oqý oryndarynda qyzmet etti.
Atap aıtar bolsaq, Halyqaralyq bıznes ýnıversıtetiniń (UIB) Jastar ortalyǵynyń dırektory jáne M.Tynyshpaev atyndaǵy Qazaq kólik jáne kommýnıkatsııalar akademııasynyń tárbıe jumysy departamentiniń dırektory qyzmetin atqardy. Jastar saıasatyn damytý memlekettik qorynyń dırektory boldy. 2023 jyldyń naýryz aıynan bastap qazirgi taǵaıyndaýǵa deıin Almaty qalasy Jastar saıasaty basqarma basshysynyń orynbasary boldy.
***
Mańǵystaý oblysy qurylys, sáýlet jáne qala qurylysy basqarmasynyń basshysy qyzmetine Aıdos Hamıev taǵaıyndaldy.
A. Hamıev Mańǵystaý oblysy Aqtaý qalasynda dúnıege kelgen. Sh.Esenov atyndaǵy Aqtaý memlekettik ýnıversıtetin «Ónerkásip, azamattyq qurylys jáne qala sharýashylyǵy» mamandyǵy boıynsha támamdaǵan.
Eńbek jolyn 2005 jyly Aqtaý qalasynda qurylys ýchaskesiniń masteri, jumys uıymdastyrýshysy bolyp bastaǵan.
2010 jyldan bastap Qazaqstan Respýblıkasy Qurylys jáne turǵyn úı-kommýnaldyq sharýashylyq isteri agenttiginde, vedomstvanyń Soltústik Qazaqstan, Jambyl, Aqmola oblystaryndaǵy aýmaqtyq organdarynda jumys istegen.
2015 jyldan bastap Aqmola jáne Mańǵystaý oblystarynyń, Astana jáne Aqtóbe qalalarynyń jergilikti atqarýshy organdarynda túrli laýazymdarda qyzmet atqarǵan.
Osy ýaqytqa deıin «Astanagenplan» ǵylymı-zertteý jobalaý ınstıtýtynda konsýltant bolyp qyzmet atqardy.
***
Ulan Búrkitov «QazaqGaz» UK» AQ basqarma tóraǵasynyń geologııalyq barlaý jáne perspektıvalyq jobalar jónindegi orynbasary qyzmetine taǵaıyndaldy.
U. Otaralyuly Q.Sátbaeva atyndaǵy QazUTÝ túlegi jáne «Bolashaq» baǵdarlamasy boıynsha Londondaǵy Imperıal kolledjiniń munaı-gaz ınjenerııa ǵylymdary magıstri.
Onyń munaı men gazdy barlaý jáne ıgerý, aktıvter men kapıtal jobalaryn basqarý jáne tsıfrlyq transformatsııa salasynda 20 jyldyq halyqaralyq tájirıbesi bar.
Sońǵy 12 jyl ishinde ol Gronıngen jáne jerasty gaz qoımalary (Nıderlandy), Qarashyǵanaq jáne Qashaǵan jobalarynda jumys istep, Shell kompanııasynda ártúrli laýazymdardy atqardy.
Ulan Otaralyuly jańa qyzmetinde geologııalyq barlaý jáne resýrstyq bazany keńeıtý, perspektıvalyq jobalardy júzege asyrý jáne tsıfrlandyrýǵa jaýapty bolady.
***
Osy aptada Qazaqstan Boks federatsııasy Qaırat Sátjanovtyń bokstan erler quramasynyń bas bapkeri qyzmetine taǵaıyndalǵanyn málimdedi.
Aıta keteıik, Qaırat Tursunqanuly Satjanov — 54 jasta, Qazaqstan Respýblıkasynyń bokstan eńbek sińirgen jattyqtyrýshysy, Qazaqstan Respýblıkasynyń dene shynyqtyrý jáne sport úzdigi. Bapkerlik eńbek ótili — 34 jyl.
2021-2022 jyldary Qazaqstan ulttyq quramasynyń bas bapkeri qyzmetin atqarǵan. 2024 jyldan Qazaqstan jastar quramasynyń aǵa bapkeri. Q.Sátjanovtyń jetekshiligimen 2021 jyly Qazaqstan quramasy álem chempıonatynda (Serbııa) II komandalyq oryn (2 altyn, 2 kúmis, 1 qola medal) aldy. 2022 jyly Azııa chempıonatynda (Iordanııa) ІІ komandalyq oryn (3 altyn, 6 kúmis, 3 qola) enshilegen.
2024 jyly Astanada ótken jastar arasyndaǵy Azııa chempıonatynda Qazaqstan komandasy I komandalyq oryn (5 altyn, 1 kúmis, 3 qola) aldy. Qaırat Sátjanov jattyqtyrýshy retinde 7 álem chempıonyn, 43 Azııa chempıonyn daıyndaǵan.
