Elimizde apta ishinde bolǵan kadrlyq taǵaıyndaýlar
ASTANA. KAZINFORM — Ótken aptada elimizde birqatar kadrlyq aýys-túıis boldy.
Úkimet qaýlysymen Maıra Meldebekova oqý-aǵartý birinshi vıtse-mınıstri qyzmetine taǵaıyndaldy.
Maıra Turǵanbaıqyzy 1971 jyly dúnıege kelgen. Abaı atyndaǵy Almaty Eńbek Qyzyl Tý ordeni ýnıversıtetin, Qorqyt Ata atyndaǵy Qyzylorda memlekettik ýnıversıtetin bitirgen.
Eńbek jolyn 1988 jyly pıoner lageriniń tárbıeshisi bolyp bastaǵan. 1993-2005 jyldary aralyǵynda Shymkent qalasynyń, Shyǵys Qazaqstan jáne Almaty oblystarynyń birqatar mektepterinde muǵalim, dırektordyń orynbasary, dırektor qyzmetterin atqardy.
2005-2018 jyldary — Qazaqstan Respýblıkasy Bilim jáne ǵylym mınıstrliginiń bas mamany, basqarma bastyǵy, departament dırektorynyń orynbasary, dırektory. 2018-2020 jyldary — Qyzylorda oblysy bilim basqarmasynyń basshysy; 2020-2021 jyldary — Qazaqstan Respýblıkasy Bilim jáne ǵylym mınıstrligi Mektepke deıingi jáne orta bilim berý komıtetiniń tóraǵasy; 2021-2022 jyldary — Qazaqstan Respýblıkasy Bilim jáne ǵylym mınıstrligi Bilim jáne ǵylym salasyndaǵy sapany qamtamasyz etý komıteti tóraǵasynyń orynbasary; 2022 jyldan bastap qazirgi ýaqytqa deıin Qazaqstan Respýblıkasy Oqý-aǵartý mınıstrligi Bilim salasyndaǵy sapany qamtamasyz etý komıteti tóraǵasynyń orynbasary qyzmetin atqarǵan.
Dosjan Musalıev Tsıfrlyq damý, ınnovatsııalar jáne aeroǵarysh ónerkásibi vıtse-mınıstri bolyp taǵaıyndaldy.
Ol 1985 jyly dúnıege kelgen. 2002–2007 jyldary — Reseı Federaldyq qaýipsizdik qyzmetiniń akademııasyn bitirgen. Mamandyǵy — telekommýnıkatsııalyq júıelerdiń aqparattyq qaýipsizdigi.
2012–2014 jyldary — Qazaq gýmanıtarlyq-zań ýnıversıtetin Quqyqtaný mamandyǵy boıynsha támamdaǵan. 2021–2023 jyldary — Nazarbaev Ýnıversıtetin bitirgen. Memlekettik basqarý magıstri (MPA).
2007 jyldan bastap qazirgi ýaqytqa deıin Qazaqstan Respýblıkasynyń arnaýly memlekettik organdarynda aqparattyq qaýipsizdik, jeke derekterdi qorǵaý, telekommýnıkatsııalar jáne aqparattyq tehnologııalar salalarynda ártúrli ofıtserlik jáne basshylyq laýazymdarda jumys istedi.
Qazaqstan Respýblıkasy Prezıdentiniń 2023 jylǵy 2 mamyrdaǵy Jarlyǵymen «Jaýyngerlik eńbegi úshin» medalimen marapattalǵan.
Mádenıet jáne aqparat mınıstriniń buıryǵymen Janar Rysbaıqyzy Dosaeva Etnosaralyq qatynastardy damytý komıtetiniń tóraǵasy qyzmetine taǵaıyndaldy.
Ol 1974 jyly Qostanaı qalasynda dúnıege kelgen. A.Baıtursynov atyndaǵy Qostanaı memlekettik ýnıversıtetin, «Turan-Astana» ýnıversıtetin bitirgen. Eńbek jolyn 2003 jyly Astana qalasy Іshki saıasat departamentiniń Taldaý, monıtorıng jáne jastar saıasaty bóliminiń bas mamany bolyp bastaǵan.
2003–2007 jyldary — Memlekettik bilim berý jáne testileý standarttary ulttyq ortalyǵynyń ákimshilik-taldaý bóliminiń bastyǵy. 2008–2017 jyldary QR Mádenıet mınıstrliginiń qurylymynda túrli laýazymdy qyzmet atqardy. 2019–2025 jyldary QR Prezıdenti Ákimshiliginde túrli laýazymda jumys istedi.
2025 jyldan bastap qazirgi ýaqytqa deıin QR MAM Mádenıet komıteti tóraǵasynyń orynbasary qyzmetin atqardy.
Egemberdy Erǵalı Qýandyquly Qarjy mınıstrligi Memlekettik múlik jáne jekeshelendirý komıtetiniń tóraǵasy bolyp taǵaıyndaldy.
Qazaq memlekettik zań akademııasyn, L. N. Gýmılev atyndaǵy Eýrazııa ulttyq ýnıversıtetin jáne Boston ýnıversıtetin (AQSh) támamdaǵan. Saıası ǵylymdarynyń kandıdaty.
Eńbek jolyn 1998 jyly Qarjy mınıstrliginiń júıesinde Astana qalasy Qarjy departamentiniń bas mamany bolyp bastaǵan. Astana qalasy Ekonomıka jáne bıýdjettik josparlaý basqarmasynyń basshysy, astananyń «Saryarqa» aýdanynyń ákimi, sonymen qatar Qazaqstan Respýblıkasy Prezıdenti Ákimshiliginiń memlekettik ınspektory, Prezıdent ákimshiliginiń Memlekettik baqylaý jáne uıymdastyrý-aýmaqtyq jumys bólimi meńgerýshisiniń orynbasary bolyp qyzmet atqarǵan.
Sońǵy eki jyl Qarjy mınıstrliginiń Apparat basshysy boldy.
Serik Janaıdarov Almaty qalasy memlekettik múlik jáne jekeshelendirý departamentiniń basshysy bolyp taǵaıyndaldy.
Serik Tleýhanuly 1968 jyly Qostanaı oblysy, Amangeldi aýdany, Búırektal aýylynda týǵan. 1994 jyly Abaı atyndaǵy Almaty memlekettik ýnıversıtetin orta mekteptiń tarıh muǵalimi mamandyǵy boıynsha bitirgen.
1999 jyly Almaty Zań ınstıtýtyn zańger mamandyǵy boıynsha bitirgen. 2016 jyly Ál-Farabı atyndaǵy Qazaq ulttyq ýnıversıtetin «Ekonomıka jáne bıznes» bakalavry boıynsha bitirgen.
2024 jylǵy 1 shildeden 2025 jyldyń 8 mamyryna deıin QR QM Memlekettik múlik jáne jekeshelendirý komıtetiniń Shymkent qalasy memlekettik múlik jáne jekeshelendirý departamentiniń basshysy bolyp qyzmet atqardy.
Qazaqstan Respýblıkasy Qarjy mınıstrliginiń «Keden qyzmetiniń úzdigi» tósbelgisimen, Qazaqstan Respýblıkasy Qarjy mınıstrliginiń «Memlekettik kirister organdarynyń úzdigi» tósbelgisimen, «Qazaqstan Respýblıkasynyń Konstıtýtsııasyna 25 jyl» merekelik medalimen, «Qazaqstan Respýblıkasynyń Táýelsizdigine 25 jyl» merekelik medalimen marapattalǵan.
Qarjy mınıstriniń buıryǵymen Atyraý oblysy boıynsha memlekettik kirister departamentiniń basshysy laýazymyna Kenjeǵazy Esembekov taǵaıyndaldy.
Kenjeǵazy Muqajanuly eńbek jolyn 1996 jyly memlekettik kirister organdarynda bastaǵan. Ár jyldary Qarjy mınıstrligi Memlekettik kirister komıtetiniń aýmaqtyq bólimshelerinde jumys istegen.
Almaty sondaı-aq Astana qalasynda, Almaty men Túrkistan oblysy boıynsha memlekettik kirister departamentinde basshylyq qyzmetter atqarǵan. 2021 jyldan Memlekettik kirister komıtetiniń memlekettik qyzmetter departamenti aktsızderdi ákimshilendirý basqarmasynyń basshysy bolǵan. Al 2022 jylǵy 18 mamyrdan beri Astana qalasy boıynsha Memlekettik kirister departamenti basshysynyń orynbasary qyzmetin atqaryp keldi.
Memlekettik qyzmet isteri agenttiginiń kelisimi boıynsha oblys ákiminiń ókimimen Álibek Saıynuly Antazıev BQO memlekettik sáýlet-qurylys baqylaý basqarmasynyń basshysy laýazymyna taǵaıyndaldy.
Álibek Antazıev 1982 jyly Atyraý oblysynda dúnıege kelgen. Bilimi joǵary. Mahambet Ótemisov atyndaǵy Batys Qazaqstan memlekettik ýnıversıtetin aýdarmashy, Batys Qazaqstan ınjenerlik-gýmanıtarlyq ýnıversıtetin qurylysshy mamandyǵy boıynsha támamdaǵan.
Ár jyldary Atyraý oblysy energetıka jáne kommýnaldyq sharýashylyq basqarmasy josparlaý shart bóliminiń bas mamany, Oral qalasy qurylys bóliminiń óndiristik-tehnıkalyq sektorynyń meńgerýshisi, BQO qurylys basqarmasy turǵyn úı qurylysynyń monıtorıngi, sondaı-aq óndiristik-tehnıkalyq bóliminiń basshysy, osy basqarma basshysynyń orynbasary boldy.
Taǵaıyndaýǵa deıin Batys Qazaqstan oblysy qurylys basqarmasynyń basshysy qyzmetin atqardy.
Jambyl oblysynyń ákimi Erbol Qarashókeevtiń ókimimen densaýlyq saqtaý basqarmasy basshysynyń mindetterin atqarýshy bolyp Serjan Sársenbekuly Nazarbek taǵaıyndaldy.
Serjan Sársenbekuly 1986 jyly Jambyl oblysynda dúnıege kelgen. S. D. Asfendııarov atyndaǵy Qazaq ulttyq medıtsına ýnıversıtetin, Germanııa Federatıvtik Respýblıkasyndaǵy Bılefeld ýnıversıtetiniń Qoǵamdyq densaýlyq saqtaý mektebin jáne QR Prezıdentiniń janyndaǵy Memlekettik basqarý akademııasynda bilim alǵan.
«Qoǵamdyq densaýlyq» mamandyǵy boıynsha «densaýlyq saqtaý salasyndaǵy ǵylym magıstri jáne „Memlekettik basqarý“ mamandyǵy boıynsha „bıznes jáne menedjment“ magıstri. Qazaq, orys, aǵylshyn, túrik jáne nemis tilderin meńgergen.
Eńbek jolyn «Ulttyq medıtsınalyq holdıng» AQ ǵylym jáne bilim departamentiniń bas menedjeri bolyp bastaǵan. Ár jyldary QR Densaýlyq saqtaý mınıstrligi «Respýblıkalyq densaýlyq saqtaýdy damytý ortalyǵy» ShJQ RMK mindetti áleýmettik medıtsınalyq saqtandyrýdy júzege asyrý jobasynyń basshysy, Dúnıejúzilik densaýlyq saqtaý uıymynyń Úılestirý tobynyń jetekshisi, Dúnıejúzilik densaýlyq saqtaý uıymynyń shtab-páterindegi Qazaqstan Respýblıkasynyń ókili, QR Densaýlyq saqtaý mınıstrligi «Respýblıkalyq densaýlyq saqtaýdy damytý ortalyǵy» ShJQ RMK Jahandyq densaýlyq saqtaýdy damytý ortalyǵynyń basshysy, QR Densaýlyq saqtaý mınıstrligi «Qoǵamdyq densaýlyq saqtaý ulttyq ortalyǵy» ShJQ RMK basqarýshy dırektory, Dúnıejúzilik densaýlyq saqtaý uıymynyń ulttyq qyzmetkeri, «Sapaly med qyzmet» servıstik kompanııalar qaýymdastyǵy zańdy tulǵalar birlestiginiń basqarma tóraǵasy qyzmetterin atqarǵan.
Oqý-aǵartý mınıstriniń buıryǵymen Názıpa Aıýbaeva Ybyraı Altynsarın atyndaǵy Ulttyq bilim akademııasynyń prezıdenti laýazymyna taǵaıyndaldy.
Ol Ulybrıtanııadaǵy Kembrıdj ýnıversıtetiniń Bilim berý fakýltetinde fılosofııa doktory (PhD) jáne fılosofııa magıstri (MPhil) dárejelerin, Úndistandaǵy Bangalor ýnıversıtetinde marketıng jáne júıeler mamandyǵy boıynsha iskerlik basqarý magıstri (MBA) dárejesin, sondaı-aq Bishkektegi Joǵary kolledjde pedagogıka jáne lıngvıstıka mamandyǵy boıynsha bakalavr dárejesin alǵan.
Eńbek jolyn Taraz qalasyndaǵy № 39 orta mektepte aǵylshyn tili pániniń muǵalimi bolyp bastaǵan. Almaty qalasyndaǵy Abaı atyndaǵy respýblıkalyq daryndy balalarǵa arnalǵan mamandandyrylǵan mektep-ınternatynda álem ádebıeti jáne fılosofııa pánderinen arnaıy kýrs júrgizgen. Narhoz ýnıversıteti men Qazaq ulttyq qyzdar pedagogıkalyq ýnıversıtetinde qaýymdastyrylǵan professor qyzmetinde bolǵan.
Ár jyldary «Nazarbaev Zııatkerlik mektepteri» derbes bilim berý uıymy tóraǵasynyń orynbasary, «Nazarbaev Qory» tóraǵasynyń orynbasary, Nazarbaev Ýnıversıteti Joǵary bilim berý mektebiniń aǵa ǵylymı qyzmetkeri jáne Qazaqstan Respýblıkasy Úkimeti men Ulttyq Banki janyndaǵy «Ulttyq analıtıkalyq ortalyq» aktsıonerlik qoǵamynyń jobalar menedjeri qyzmetterin atqarǵan.
Názıpa Altynbekqyzy Eýropalyq komıssııa, Amerıkalyq halyqaralyq damý agenttigi (USAID) jáne Dúnıejúzilik saýda ınstıtýtynyń (WTI) aımaqtyq jobalaryn basqarý salasynda mol tájirıbe jınaqtaǵan. Bilim salasyndaǵy zertteýshilerdiń Qazaqstandaǵy qaýymdastyǵynyń (KERA) negizin qalaýshylardyń biri jáne Eýropadaǵy bilim salasyn zertteýshiler qaýymdastyǵynyń belsendi múshesi.
«Ǵylymdy damytýǵa sińirgen eńbegi úshin» tósbelgisimen marapattalǵan.
Almaty qalasy ákiminiń kommýnıkatsııa jáne BAQ-pen jumys boıynsha keńesshisi bolyp Ilzat Akchýrın taǵaıyndaldy.
Ol 2024 jyldan bastap, osy ýaqytqa deıin «Almaty» teleradıokompanııasy» AQ bas dırektorynyń orynbasary qyzmetin atqardy.
Aqparat salasyndaǵy 15 jyldyq eńbegin ol tilshi bolyp bastaǵan. Odan soń telejúrgizýshi, Astana qalasyndaǵy tilshilik pýnkte saraptamalyq baǵdarlamalar bóliminiń basshysy, shyǵarýshy redaktor, bas redaktordyń orynbasary, keıin «Almaty» teleradıokompanııasynyń aqparattyq-saraptamalyq baǵdarlamalar departamentiniń dırektory — bas redaktory qyzmetin atqardy. Sondaı-aq, «Tań» jáne «STV» telearnalarynda jumys istegen.
«Saryarqa» arnaıy ekonomıkalyq aımaǵy basqarmasynyń tóraǵasy bolyp Dáýlet Ábdýálıuly Oralov taǵaıyndaldy.
Dáýlet Oralovtyń joǵary zańgerlik jáne qarjylyq bilimi bar. Ár jyldary memlekettik jáne jeke qurylymdarda jaýapty laýazymdardy atqardy.
Eńbek jolyn 2012 jyly Almaty qalasy Ádilet departamentinde memlekettik satyp alý bóliminiń mamany bolyp bastaǵan. Sodan keıin «Almaty» ÁKK-de jobalaý menedjeri, «Alan Parking» JShS bas dırektorynyń orynbasary, «Almaty» ÁKK-de jobalardy basqarý jáne ınvestıtsııalar tartý departamentiniń dırektory qyzmetin atqardy.
2018–2021 jyldary Dáýlet Oralov Almaty oblysy ákiminiń kómekshisi boldy. Keıingi jyldary ónerkásip sektorynda — «Aluminium of Kazakhstan» JShS basqarýshy dırektory, «Petro Premium Service» JShS bas dırektory bolyp jumys istedi. 2023 jylǵy qazannan bastap osy kúnge deıin «Qazaqtelekom» AQ-da eńbek qaýipsizdigi jáne eńbekti qorǵaý jónindegi bıznes-jattyqtyrýshy jáne menedjer laýazymdaryn atqardy.
Qazaqstandyq 43 jastaǵy jattyqtyrýshy «Atyraý» fýtbol klýbynyń bas bapkeri bolyp taǵaıyndaldy.
Denıs Mamonov Pavlodar oblysynda dúnıege kelgen. Ol fýtboldaǵy qorǵaýshy jáne jartylaı qorǵaýshy retinde mansabyn «Jetisý» (Taldyqorǵan), «Vostok» (Óskemen), «Taraz» jáne «Esil-Bogatyr» (Petropavl) klýbtarynda ótkizgen.
Bapker retinde almatylyq «Qaırat» fýtbol klýbynyń qurylymynda, «Jetisý», «Maqtaaral» jáne «Aqsý» fýtbol klýbtarynda qyzmet atqardy. Denıs Nıkolaevıch qazirge deıin 21 jasqa deıingi Qazaqstan jastar quramasynyń aǵa bapkeri boldy. Maýsym basynda «Atyraý» komandasyna qaıta oralǵan ol burynǵy bas bapker Konstantın Gorovenkonyń kómekshisi bolǵan edi
«Teńizshevroıl» JShS-niń bas dırektory laýazymyna Ýılıam Lakobı taǵaıyndalady. Bul qyzmetti 2021 jyldan beri bas dırektor bolǵan Kevın Laıon atqarǵan edi.
Ol «Shevron» kompanııasynyń AQSh, Angola jáne Indonezııadaǵy bıznes bólimshelerinde túrli ınjenerlik-tehnıkalyq, basshylyq qyzmetterdi atqarǵan. 2021 jyldan beri Ońtústik Afrıkadaǵy strategııalyq bıznes bólimshesiniń basqarýshy dırektory boldy. Bul qyzmetinde Angola men Kongo Respýblıkasyndaǵy «Shevron» kompanııasynyń aktıvterine, onyń ishinde Angoladaǵy suıytylǵan tabıǵı gaz óndirisiniń iri jobasyna jetekshilik etip, jergilikti qamtý jáne kadrlardy damytýǵa, jergilikti halyqtyń ál-aýqatynyń artýyna yqpal etken basshy retinde tanyldy.