Elimizde apta ishinde bolǵan kadrlyq taǵaıyndaýlar
ASTANA. KAZINFORM – Osy aptada elimizde birqatar kadrlyq aýys-túıis boldy.
Memleket basshysynyń ókimimen Serik Jaqsyǵalıuly Borambaev Qazaqstan Respýblıkasynyń Qarýly Kúshteri Áskerı-teńiz kúshteriniń bas qolbasshysy laýazymyna taǵaıyndaldy.
Serik Jaqsyǵalıuly Kıev joǵarǵy áskerı-teńiz polıtehnıkalyq ýchılışesiniń, QR RF Áskerı ýnıversıtetiniń, QR RF Áskerı ýnıversıteti janyndaǵy adıýnktýrasynyń, QR Ulttyq qorǵanys ýnıversıteti janyndaǵy akademııalyq kýrstardyń túlegi.
Serik Borambaev qyzmet jolyn Kaspıı flotynyń korablder kúzeti dıvızıony saıası bólimniń komsomoldyq jumystar jónindegi bastyǵynyń kómekshisinen bastaǵan. Ár túrli jyldary Atyraý oblystyq áskerı komıssarıatynda Áskerı-teńiz ınstıtýty bastyǵynyń orynbasary, QR QK Áskerı-teńiz basqolbasshysynyń orynbasary qyzmetin atqardy.
QR Prezıdenti Ákimshiliginiń kelisimi boıynsha agenttik tóraǵasynyń buıryǵymen Kasımov Rýslan Muratuly Qarjylyq monıtorıng agenttiginiń Jambyl oblysy boıynsha Ekonomıkalyq tergep-tekserý departamentiniń basshysy qyzmetine taǵaıyndaldy.
Rýslan Kasımov buǵan deıin Jambyl oblysy boıynsha Ekonomıkalyq tergep-tekserý departamenti basshysynyń orynbasary qyzmetin atqarǵan.
QR Prezıdenti Ákimshiliginiń kelisimi boıynsha agenttik tóraǵasynyń buıryǵymen Bıtanov Erlan Janǵazyuly Qarjylyq monıtorıng agenttiginiń Ulytaý oblysy boıynsha Ekonomıkalyq tergep-tekserý departamentiniń basshysy qyzmetine taǵaıyndaldy.
Erlan Bıtanov buǵan deıin Qostanaı oblysy boıynsha Ekonomıkalyq tergep-tekserý departamenti basshysynyń orynbasary qyzmetin atqarǵan.
Otyrar aýdanynyń ákimi bolyp Joldybaı Qaırat Joldybaıuly taǵaıyndaldy. Jańa ákimdi aýdannyń aktıvine oblys ákimi Darhan Satybaldy tanystyrdy.
Qaırat Joldybaıuly 1981 jyly 5 mamyrda Shardara qalasynda ómirge kelgen. Bilimi joǵary, biliktiligi ekonomıst-menedjer.
Qazaqstan Respýblıkasy Prezıdenti janyndaǵy Memlekettik basqarý akademııasynyń memlekettik jáne jergilikti basqarý boıynsha magıstri.
Eńbek jolyn 2003 jyly Qazaqstan Respýblıkasy Bilim jáne ǵylym mınıstrligi Joǵary oqý oryndaryn jáne ǵylymdy qarjylandyrý bóliminiń jetekshi mamany bolyp bastaǵan.
2003-2023 jyldary Qazaqstan Respýblıkasy Bilim jáne ǵylym mınıstrligi Memlekettik satyp alýlar jáne jekemenshik bóliminiń jetekshi mamany, QR Qarjy mınıstrliginiń birqatar komıtetinde bas maman, bas sarapshy, bólim basshysy, Qazaqstan Respýblıkasy Parlamenti Senaty depýtatynyń kómekshisi, Shardara aýdany ákiminiń orynbasary, Ordabasy aýdanynyń ákimi, Shardara aýdanynyń ákimi laýazymdarynda abyroıly qyzmet atqarǵan.
2024 jylǵy 28 maýsymdaǵy NU Qamqorshylyq keńesiniń sheshimimen Prezıdent qyzmetine Ulybrıtanııanyń azamaty Ahmad Vakar tańdaldy.
Ahmad Vakar Bredford ýnıversıtetinde (Ulybrıtanııa) PhD doktory dárejesin alǵan.
Doktor Vakar óziniń mansap jolynda Iork ýnıversıteti men London ýnıversıtettik kolledji (Ulybrıtanııa) professory qyzmetinen Mıdlseks ýnıversıtetiniń (Ulybrıtanııa) prorektoryna deıin kóterilgen.
2001-2004 jyldary doktor Vakar Ulybrıtanııa Premer-Mınıstri kantselıarııasy Ǵylym departamentin basqarǵan.
2017 jyldan bastap Abý-Dabı ýnıversıtetiniń rektory boldy. Ol basshylyq etken jyldary Abý-Dabı ýnıversıteti Times Higher Education bedeldi reıtıngindegi úzdik ýnıversıtetter arasynda 250-300 dıapazonyna deıin kóterildi.
Sonymen qatar ol — bedeldi ǵylymı basylymdarda jarııalanǵan 90-nan astam ǵylymı jumystyń avtory.
«Altaı Óskemen» fýtbol klýbynyń bas bapkeri bolyp el fýtbolynyń ardageri, Qazaqstan quramasynyń burynǵy jattyqtyrýshysy, KSRO sport sheberi — Vahıd Masýdov taǵaıyndaldy.
Bapkerlik mansabyn 1996 jyly «Qaırat» fýtbol klýbynda bastaǵan. Odan keıin qazaqstandyq maman «Taraz», «Atyraý», «Aqtóbe», «Ordabasy», «Maqtaral» komandalaryn jáne 19 jasqa deıingi Qazaqstan jasóspirimder quramasyn jattyqtyrǵan. Sondaı-aq Masýdov Super bol jobasynda qyzmet etti.
