Elimizde apta ishinde bolǵan kadrlyq taǵaıyndaýlar
ASTANA. KAZINFORM – Osy aptada elimizde birqatar kadrlyq aýys-túıis boldy.
20 qańtarda Tóleý Muhtar Qaraǵandy oblysynyń jumyspen qamtýdy úılestirý jáne áleýmettik baǵdarlamalar basqarmasynyń basshysy bolyp taǵaıyndaldy.
Tóleý Muhtar - QR Prezıdenti janyndaǵy Memlekettik basqarý akademııasynyń túlegi. Memlekettik qyzmette segiz jyldan astam eńbek etip keledi.
Qaraǵandy oblysynyń Jastar saıasaty máseleleri basqarmasynda bas maman bolyp jumys istedi. Qaraǵandy oblysy Din isteri basqarmasynyń Konfessııaaralyq qatynastar problemalaryn taldaý jáne zertteý ortalyǵyn basqardy. 2018 jyldan bastap Qaraǵandy oblysynyń jumyspen qamtýdy úılestirý jáne áleýmettik baǵdarlamalar basqarmasynda jumys istep keledi, 2019 jyldan bastap basshynyń orynbasary qyzmetin atqardy.
20 qańtarda Temirjan Bólteev Aqtóbe oblystyq jumyldyrý daıarlyǵy, aýmaqtyq qorǵanys jáne azamattyq qorǵaý basqarmasyna taǵaıyndaldy. Ol buǵan deıin kommýnaldyq mekemede basshy bolǵan.
Ol 1963 jyly Aqtóbe oblysynda dúnıege kelgen. 1989 jyly Qaraǵandy pedagogıkalyq ınstıtýtyn «Alǵashqy áskerı daıyndyq jáne dene tárbıesi», 2007 jyly Q.Jubanov atyndaǵy Aqtóbe memlekettik ýnıversıtetin «Zańtaný» mamandyqtary boıynsha támamdaǵan. Aqtóbe oblysy ákimini baspasóz qyzmetiniń habarlaýynsha, eńbek jolyn 1980 jyly Baıǵanın orta kásiptik-tehnıkalyq ýchılışesiniń traktorısi bolyp bastaǵan.
1981–1984 jyldary «Aktıýbselstroı» kásipornynda jumysshy, «Selhozenergo» kásipornynda elektromonter boldy. Al 1989–1999 jyldary Jańajol orta mektebinde alǵashqy áskerı daıarlyq jetekshisi, Baıǵanın aýdandyq kásiptik-tehnıkalyq ýchılışesiniń áskerı daıarlyq oqytýshysy, Baıǵanın aýdandyq áskerı komıssardyń orynbasary, áskerı komıssary bolyp jumys istegen.
1999–2015 jyldary Muǵaljar aýdanynyń áskerı komıssary, Aqtóbe qalasynyń qorǵanys isteri jónindegi basqarmasynyń bastyǵy.
30217 áskerı bóliminiń shtab bastyǵy — brıgada komandıriniń birinshi orynbasary, Mańǵystaý oblysynyń qorǵanys isteri jónindegi departamentiniń bastyǵy.
«Shyǵys» óńirlik qolbasshylyǵy áskerleri shtab bastyǵynyń orynbasary — shtabtyń uıymdastyrý — jumyldyrý basqarmasynyń bastyǵy qyzmetterin atqarǵan.
2020–2024 jyldary Aqtóbe oblysy ákimi apparatynyń «Jumyldyrý daıyndyǵy jáne aýmaqtyq qorǵanys basqarmasy» kommýnaldyq memlekettik mekemesiniń basshysy.
2024 jyldyń tamyz aıynan bastap Aqtóbe oblysynyń jumyldyrý daıarlyǵy, aýmaqtyq qorǵanys jáne azamattyq qorǵaý basqarmasynyń «Jumyldyrý daıyndyǵyn qamtamasyz etý, aýmaqtyq qorǵanys jáne azamattyq qorǵaý qyzmeti» kommýnaldyq memlekettik mekemesiniń basshysy qyzmetin atqaryp keldi.
21 qańtarda Tıgran Gekchıan Qazaqstan basketbol quramasynyń bas bapkeri atandy.
Federatsııanyń habarlaýynsha, basketboldan Qazaqstan quramasyn Katar jáne Iran quramalaryna qarsy óz alańyndaǵy matchtarǵa Qazaqstanda «Atyraý barystary» klýbyndaǵy jumysymen tanymal armıan mamany Tıgran Gekchıan daıyndaıdy.
Gekchıannyń shtatyna sondaı-aq reseılik Evgenıı Ovsıannıkov pen eki qazaqstandyq bapker – Aleksandr Lysıak pen Tımýr Sultanov kirdi.
21 qańtarda Ákim Tursun respýblıkalyq Toǵyzqumalaq Federatsııasy prezıdenti bolyp saılandy.
Al buǵan deıin respýblıkalyq federatsııany basqarǵan qoǵam qaıratkeri Álıhan Báımenov uıymnyń Qurmetti prezıdenti bolyp bekitildi. Sonymen birge Báımenov Dúnıejúzilik Toǵyzqumalaq Federatsııasy prezıdenti qyzmetin jalǵastyrady.
Astanada ótken respýblıkalyq federatsııanyń jıynynda Álıhan Báımenov osy kúnge deıin Respýblıkalyq Toǵyzqumalaq Federatsııasy vıtse-prezıdenti qyzmetin atqarǵan Ákim Tursundy federatsııa basshysy qyzmetine usyndy. Otyrysqa qatysqan óńirlik federatsııa jetekshileri, toǵyzqumalaq qaıratkerleri jáne Federatsııa basshylyq quramy usynysty qoldap, Tursundy QR Toǵyzqumalaq Sporty Federatsııasy prezıdenti laýazymyna saılady.
Beısenbi kúni Davıd Lorııa Qazaqstan fýtbol federatsııasynyń vıtse-prezıdenti qyzmetine taǵaıyndaldy.
Davıd Lorııa – qazaq fýtboly tarıhyndaǵy erekshe tulǵalardyń biri. Fýtbolshy mansabynda «Jeńis», «Esil», «Shahter», «Halmstad» (Shvetsııa), «Spartak-Nalchık» (Reseı), «Astana», «Ertis», «Rızespor» (Túrkııa), «Qaırat», «Karshııaka» (Túrkııa), «Ordabasy» klýbtarynda oınady.
Qazaqstan ulttyq quramasynda 47 oıyn ótkizip, qaqpashylar arasynda rekord jasady.
1999 jyly Qazaqstan jastar quramasy sapynda Nıgerııada ótken álem chempıonatyna qatysty.
Mansabyn aıaqtaǵannan keıin «Astana» fýtbol klýbynda, Astana qalasynyń fýtbol federatsııasynda jáne «Super Bol» jobasynda basshylyq qyzmetter atqardy.
2019-2022 jyldary ÝEFA UEFA MIP – UEFA Executive Master for International Players magıstrlik baǵdarlamasy boıynsha sport menedjmenti salasynda bilim aldy.
Aptanyń ekinshi kúni Erlan Sultangereev Aqtóbe oblystyq densaýlyq saqtaý basqarmasynyń basshysy bolyp taǵaıyndaldy.
Erlan Baqytuly 1980 jyly Aqtóbe oblysynda dúnıege kelgen. 2003 jyly Marat Ospanov atyndaǵy Batys Qazaqstan memlekettik medıtsına akademııasyn «Emdeý isi», 2013 jyly Astana medıtsına ýnıversıtetin «Medıtsına» mamandyqtary boıynsha támamdaǵan. Medıtsına ǵylymdarynyń doktory.
Eńbek jolyn 2004 jyly Jedel medıtsınalyq járdem aýrýhanasynyń hırýrgııa bóliminde dáriger-hırýrg bolyp bastaǵan.
2010 jyly osy mekemede dáriger-ordınator laýazymyna aýystyrylǵan.
2017-2018 jyldary Aqtóbe medıtsınalyq ortalyǵynyń bas dárigerdiń hırýrgııalyq qyzmet jónindegi orynbasary.
2018-2020 jyldary Aqtóbe medıtsınalyq ortalyǵynyńbalalar statsıonarynyń medıtsınalyq dırektory qyzmetterin atqarǵan.
2020 jyldyń qazan aıynan bastap 2024 jyldyń tamyz aıyna deıin Aqtóbe medıtsınalyq ortalyǵynyń bas dárigeri qyzmetinde boldy
21 qańtarda Bulbul Kúzembaeva Aqtóbe oblystyq bilim basqarmasynyń basshysy boldy.
Ol buǵan deıin Batys Qazaqstan oblysy bilim salasynda sapany qamtamasyz etý departamentiniń basshysy qyzmetin atqardy.
2000 jyly Batys Qazaqstan memlekettik ýnıversıtetiniń pedagogıkalyq mamandyǵyn, 2016 jyly Q.Jubanov atyndaǵy Aqtóbe memlekettik ýnıversıtetiniń quqyqtaný mamandyǵyn támamdaǵan.
Eńbek jolyn 2000 jyly № 2 Mártók orta mektebiniń muǵalimi bolyp bastaǵan. 2003-2007 jyldary osy mektepte dırektordyń tárbıe jumysy boıynsha orynbasary bolyp jalǵastyrǵan.
2007-2010 jyldary Mártók aýdandyq mádenıet jáne tilderdi damytý bóliminiń basshysy bolǵan.
2010-2011 jyldary Aqtóbe oblysy balalardyń quqyqtaryn qorǵaý departamentiniń monıtorıng jáne aqparattyq-taldaý qyzmeti bóliminiń bastyǵy boldy.
2011-2018 jyldary Mártók aýdany ákiminiń orynbasary, Oıyl aýdanynyń ákimi qyzmetterin atqarǵan.
2018-2022 jyldary QR Bilim jáne ǵylym mınıstrligi Bilim jáne ǵylym salasynda sapany qamtamasyz etý komıteti Aqtóbe oblysynyń bilim salasynda sapany qamtamasyz etý departamentiniń basshysy qyzmetinde boldy.
2022 jyldyń maýsym aıynan bastap QR Oqý-aǵartý mınıstrligi Bilim salasynda sapany qamtamasyz etý komıtetiniń Batys Qazaqstan oblysy bilim salasynda sapany qamtamasyz etý departamentiniń basshysy qyzmetin atqaryp keldi.
22 qańtarda Ádiljan Isataıuly Ǵubashev Batys Qazaqstan oblysy memlekettik satyp alý jáne kommýnaldyq menshik basqarmasynyń basshysy laýazymyna rotatsııa tártibimen taǵaıyndaldy.
Ádiljan Ǵubashev 1975 jyly Batys Qazaqstan oblysynyń Jánibek aýdanynda dúnıege kelgen.
Bilimi joǵary. Qazaq ulttyq ýnıversıtetin avtomatıka jáne tehnıkalyq júıelerdi basqarý, Kaspıı qoǵamdyq ýnıversıtetin zańtaný, Batys Qazaqstan ınjenerlik-gýmanıtarlyq ýnıversıtetin esep jáne aýdıt mamandyǵy boıynsha támamdaǵan.
Ár jyldary Qazaqstan Respýblıkasynyń keden organdarynda jumys istep, Oral qalasy turǵyn úı-kommýnaldyq sharýashylyq, jolaýshy kóligi jáne avtomobıl joldary bólimi memlekettik-quqyqtyq jumystar sektorynyń meńgerýshisi, osy bólim basshysynyń orynbasary boldy.
Sondaı-aq Batys Qazaqstan oblysy memlekettik satyp alý basqarmasy áleýmettik nysandardy damytý bóliminiń basshysy, BQO memlekettik satyp alý jáne kommýnaldyq menshik basqarmasy basshysynyń orynbasary laýazymdarynda qyzmet etken.
Sársenbide Amantaı Kýmbaev Mańǵystaý oblysy bilim basqarmasynyń jańa basshysy bolyp taǵaıyndaldy.
Amantaı Kýmbaev 1979 jyly týǵan. Bilimi joǵary. 2001 jyly Sh.Esenov atyndaǵy Aqtaý memlekettik ýnıversıtetin tarıh pániniń muǵalimi, 2020 jyly quqyqtaný mamandyǵy boıynsha bitirgen.
Eńbek jolyn 2000 jyly «Femına» JShS-de sheber bolyp bastap, 2012 jylǵa deıin jeke sektorlardy jumys istegen. 2012-2015 jyldar aralyǵynda Aqtaý qalasyndaǵy №10 orta mektep dırektorynyń oqý isi jónindegi orynbasary boldy.
2015-2020 jyldar aralyǵynda Mańǵystaý oblysynyń bilim salasyndaǵy baqylaý departamentinde jetekshi mamany, QR Bilim jáne ǵylym mınıstrliginiń Bilim jáne ǵylym salasyndaǵy Baqylaý komıteti Mańǵystaý oblysynyń bilim salasyndaǵy baqylaý departamentinde oqý sapasyn syrttaı baǵalaý bóliminiń jetekshi mamany, bas mamany qyzmetin atqardy.
2020 jyly QR Bilim jáne ǵylym mınıstirligi Bilim jáne ǵylym salasynda sapany qamtamasyz etý komıtetiniń Mańǵystaý oblysynyń bilim salasynda sapany qamtamasyz etý departamentiniń Bilim berý qyzmetin lıtsenzııalaý bóliminiń basshysy boldy.
2021-2024 jyldar aralyǵynda Qaraqııa aýdany men Aqtaý qalasy ákiminiń apparatynda bas ınspektor, Ómirzaq aýyly ákiminiń orynbasary, Aqtaý qalalyq mádenıet, dene shynyqtyrý jáne sport bólimi memlekettik mekemesiniń bólim basshysy laýazymyn atqardy.
2024 jyly Aqtaý qalasy boıynsha bilimi bóliminiń jalpy bilim jáne memlekettik qyzmet kórsetý sektorynyń sektor meńgerýshisi, Aqtaý qalasy ákiminiń apparatynyń memlekettik-quqyqtyq jumys bóliminiń basshysy boldy.
Osyǵan deıin Mańǵystaý oblysy ákiminiń apparaty óńirlik saıasat jáne uıymdastyrý jumysy bóliminiń basshysy qyzmetin atqaryp keldi.
23 qańtarda Memleket basshysy Qasym-Jomart Toqaevtyń jarlyǵymen Tımýr Shámiluly Sultanǵojın Qazaqstan Respýblıkasynyń Grek Respýblıkasyndaǵy Tótenshe jáne Ókiletti Elshisi laýazymyna taǵaıyndaldy.
Sonymen qatar Nıkolaı Vladımırovıch Jumaqanov Qazaqstan Respýblıkasynyń Kıpr Respýblıkasyndaǵy Tótenshe jáne Ókiletti Elshisi laýazymyna taǵaıyndaldy.
24 qańtarda Almaty oblysynyń ákimdiginde kadrlyq aýys-túıis boldy.
Almaty oblysy ákiminiń ókimimen Áset Dúısebekuly Masabaev 2025 jyldyń 23 qańtarynan bastap Almaty oblysy ákiminiń orynbasary laýazymyna taǵaıyndaldy.
Áset Dúısebekuly 1985 jyly týǵan. Bilimi joǵary. 2008 jyly Almaty energetıka jáne baılanys ınstıtýtyn «Elektrenergetıkalyq júıeler jáne toraptar» mamandyǵy boıynsha, 2014 jyly Ekonomıka jáne quqyq akademııasyn «Qarjy» mamandyǵy, Reseı halyqtar dostyǵy ýnıversıtetin «Quqyqtaný» mamandyǵy boıynsha bitirgen.
Eńbek jolyn 2007 jyly «Almaty elektr stantsııalary» AQ-nyń elektromontery bolyp bastaǵan.
Ár jyldary Almaty qalasy Jetisý jáne Medeý aýdany ákimderiniń orynbasary, Almaty qalasy ákimi apparatynyń bas ınspektory, Almaty qalasy Medeý aýdanynyń ákimi, Jetisý oblysy Taldyqorǵan qalasynyń ákimi laýazymdarynda qyzmet atqarǵan. 2024 jylǵy 16 tamyzynan bastap búgingi kúnge deıin «ULKEN GROUP LTD» jeke kompanııasynyń basqarýshy dırektory laýazymynda qyzmet etti.
Sonymen qatar Almaty oblysy ákiminiń ókimimen Aıdyn Áýesbaıuly Áýesbaı 2025 jyldyń 23 qańtarynan bastap Almaty oblysynyń Memlekettik sáýlet-qurylys baqylaý basqarmasynyń basshysy laýazymyna taǵaıyndaldy.
Aıdyn Áýesbaıuly 1981 jyly týǵan. Bilimi joǵary. 2005 jyly M.Tynyshbaev atyndaǵy Qazaq kólik jáne kommýnıkatsııalar akademııasyn «Qurylysty mehanıkalandyrý jáne avtomattandyrý» mamandyǵy boıynsha, 2012 jyly Ó.A.Joldasbekov atyndaǵy ekonomıka jáne quqyq akademııasyn «Quqyqtaný» mamandyǵy boıynsha, 2024 jyly Halyqaralyq kóliktik-gýmanıtarlyq ýnıversıtetin «Ekonomıka» mamandyǵy boıynsha bitirgen.
Eńbek jolyn 2006 jyly Almaty oblysy Jambyl aýdandyq turǵyn úı-kommýnaldyq sharýashylyq, jolaýshylar kóligi jáne avtomobıl joldary bóliminiń jetekshi mamany bolyp bastaǵan. Ár jyldary Jambyl aýdany Uzynaǵash selolyq okrýg ákiminiń orynbasary, Almaty oblysy Qarasaı aýdany Raıymbek aýyldyq okrýginiń ákimi, Qarasaı aýdany ákimi apparatynyń basshysy, aýdan ákiminiń orynbasary, Almaty oblysy jolaýshylar kóligi jáne avtomobıl joldary basqarmasy basshysynyń orynbasary, «ÁÁK Qonaev» AQ taý-ken metallýrgııa jáne óńdeý ónerkásibindegi ınvestıtsııalyq jobalar departamentiniń dırektory laýazymdarynda qyzmet atqarǵan.
2023 jyldyń 23 jeltoqsanynan bastap búginge deıin Almaty oblysy Іle aýdany ákiminiń orynbasary laýazymynda qyzmet etti.
24 qańtarda Erlan Tekeshov Shyǵys Qazaqstan oblysy ákimi apparatynyń basshysy bolyp taǵaıyndaldy.
Erlan Hasenuly — Shyǵys Qazaqstannyń týmasy. Almaty qalasyndaǵy Qazaq polıtehnıkalyq ınstıtýtyn jáne D. Serikbaev atyndaǵy Shyǵys Qazaqstan tehnıkalyq ýnıversıtetin bitirgen.
Ol ár jyldary geolog, saýda jáne qyzmet kórsetý departamentiniń shtattan tys ınspektory, Shyǵys Qazaqstan oblysy ákimi apparatynyń «Іs basqarmasy» memlekettik kásipornynyń bas dırektory qyzmetterin atqardy.
Óskemen qalasynyń turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimin, qurylys bólimin basqardy. Keıin Shyǵys Qazaqstan oblystyq qurylys basqarmasynyń basshysy laýazymyn atqarǵan.
Sondaı-aq Erlan Tekeshov Shemonaıha aýdany ákiminiń orynbasary, Tarbaǵataı aýdanynyń ákimi, Shyǵys Qazaqstan oblysy ákiminiń orynbasary, «ShyǵysEnergoTreıd» JShS-niń bas dırektory qyzmetterinde jumys istegen.
Juma kúni Qaısar Jumabaı Prezıdent Ákimshiliginiń kommýnıkatsııalar bólimi meńgerýshisiniń orynbasary boldy.
Qaısar Jumabaıulynyń mass-medıa salasynda mol tájirıbesi bar. QR Prezıdenti Ákimshiliginiń taldaý jáne boljamdaý ortalyǵy meńgerýshisiniń orynbasary bolǵan.
Qaısar Jumabaıulynyń BAQ jáne PR salasynda tájirıbesi bar. Ár jyldary Almatydaǵy qalalyq «Stolıchnoe obozrenıe» gazetinde, «Shahar» teleradıo kesheninde, «Qazaqstan» RTRK, «Habar» agenttiginde, TSC-group ınvestıtsııalyq-ónerkásiptik korporatsııasynyń qoǵammen baılanys departamentinde jumys istedi.
Keıin sol kezdegi Indýstrııa mınıstrliginiń baspasóz hatshysy bolyp qyzmet atqardy. Astana ákiminiń keńesshisi boldy, elorda ákimdigine qarasty «Elorda Aqparat» medıa-resýrsyn basqardy.
QR Prezıdenti Ákimshiliginiń taldaý jáne boljamdaý ortalyǵy meńgerýshisiniń orynbasary, QR Tuńǵysh Prezıdenti Qorynyń strategııalyq kommýnıkatsııalar ortalyǵynda Perspektıvalyq zertteýler ortalyǵynyń basshysy bolyp jumys istedi.
Jańa qyzmetke taǵaıyndalǵanǵa deıin QR Prezıdentiniń Іs basqarýshysynyń keńesshisi, QR PІB bas ınspektory-baspasóz hatshysy qyzmetin atqaryp keldi.
24 qańtar kúni Qazaqstan boks federatsııasy prezıdentiniń buıryǵymen Mereı Tólegenuly Aqshalov Qazaqstan boks federatsııasynyń bas hatshysy qyzmetine taǵaıyndaldy.
Qazaqstan boks federatsııasynyń baspasóz qyzmetinen málim etkenindeı, Mereı Aqshalov 36 jasta, bokstan álem jáne Azııa chempıony, QR eńbek sińirgen sport sheberi.
Mereı Aqshalov 1988 jyly 8 mamyrda Abaı oblysy Aıagóz aýdany Myńbulaq aýylynda dúnıege kelgen.
2004 jyly kadetter arasynda Azııa chempıony atanǵan M.Aqshalov Beıjiń Olımpıadasyna qatysty.
2013 jyly áýeli Azııa, keıin álem chempıony atandy. Osy jyldyń qorytyndysy boıynsha «Azııanyń úzdik boksshysy» jáne Qazaqstanda «Jyldyń úzdik sportshysy» ataǵyna ıe boldy.
M.Aqshalov – «Qurmet» ordeniniń ıegeri.
25 qańtarda Túrkistandyq «Turan» komandasy bas bapkeri qyzmetine Vıtalıı Jýkovskıı taǵaıyndaldy.
V. Jýkovskıı 1984 jyly dúnıege kelgen. Eńbek jolyn 2010 jyly belarýstik «Isloch» komandasynyń bas bapkeri bolyp bastady.
2015 jyly atalǵan ujym Belorýs birinshi lıgasynyń jeńimpazy boldy. 2020 jyly sol eldegi BATE klýbynyń tizginin ustap, chempıonattyń kúmis medali men kýbok ıegeri atandy.
2022 jyldan qazaqstandyq «Atyraý» klýbynyń tizginin ustap, byltyr komanda Qazaqstan kýbogynyń fınalyna jetti. El birinshiliginde jetinshi orynǵa turaqtady.
Al «Turan» komandasy byltyr el birinshiliginde on ekinshi oryndy mise tutty.