Elimizde apta ishinde bolǵan kadrlyq taǵaıyndaýlar
Qazaqstanda ótken aptada birqatar kadrlyq aýys-túıis boldy, dep habarlaıdy Kazinform.
25 jeltoqsan kúni Almaty oblysy ákiminiń ókimimen Mádı Ahmetov Almaty oblysy jastar saıasaty máseleleri basqarmasynyń basshysy laýazymyna taǵaıyndaldy.
Ár jyldary «Nur Otan» partııasy janyndaǵy «Jas Otan» jastar qanatynyń Almaty qalalyq fılıalynyń tóraǵasy, halyqaralyq bıznes ýnıversıtetiniń qoǵammen baılanys jónindegi Menedjeri, Halyqaralyq aqparattyq tehnologııalar ýnıversıtetiniń tárbıe jumysy jónindegi dekannyń orynbasary boldy.
Sonymen qata «Nur Otan» partııasy janyndaǵy «Jas Otan» Jastar qanatynyń Almaty qalalyq fılıalynyń tóraǵasy, Qazaqstan Respýblıkasy Parlament Májilisiniń depýtaty laýazymdaryn atqarǵan, Almaty qalasynyń jastar saıasatyn damytý memlekettik qorynda shtattan tys keńesshisi retinde qyzmet atqarǵan.
26 jeltoqsanda QR Іshki ister mınıstriniń buıryǵymen Abaı oblysy PD bastyǵynyń orynbasary qyzmetine Beıbit Isaqov taǵaıyndaldy.
Ol osyǵan deıin oblystaǵy Kýrchatov qalasy polıtsııa bóliminiń bastyǵy qyzmetin atqarǵan.
Beıbit Muratuly — burynǵy Semeı oblysynyń týmasy.
Quqyq qorǵaý organdarynda 2007 jyldan beri qyzmet etip keledi.
Ár jyldary túrli basshylyq laýazymdarda jumys istedi.
Sonyń ishinde oblys qurylǵan ýaqyttan bastap osy kúnge deıin Abaı oblysy Kýrchatov qalasynyń polıtsııa bólimin basqardy.
Sheni — polıtsııa podpolkovnıgi.
Polıtsııa departamentiniń bastyǵy polıtsııa general-maıory Bektóre Sultan óziniń jańa orynbasaryna sáttilik tilep, birqatar mindet qoıdy.
Aptanyń 2-i kúni Janat Nurmaǵambetova BQO bala quqyqtary jónindegi ýákili bolyp taǵaıyndaldy.
Oblys ákiminiń orynbasary Baqytjan Narymbetov kámeletke tolmaǵandardyń isteri jáne olardyń quqyqtaryn qorǵaý jónindegi oblystyq komıssııa múshelerine jańa ýákildi tanystyrdy.
Baqytjan Haberuly óz sózinde Janat Jandollaqyzynyń qadaǵalaý salasynda — QR Bas prokýratýrasy quqyqtyq statıstıka jáne arnaıy esepke alý komıtetiniń BQO boıynsha basqarmasynda túrli basshylyq laýazymdarda qyzmet atqarǵan tájirıbeli tulǵa ekenin jetkizdi.
Seısinbi kúngi taǵy bir taǵaıyndaý QR Prezıdenti Ákimshiliginiń kelisimen, oblys ákiminiń ókimimen Musabaev Ádilbek Najmadınuly Abaı oblysy ákiminiń orynbasary bolyp taǵaıyndaldy.
Ádilbek Najmadınuly 1975 jyly 31 shildede Qyzylorda oblysynda dúnıege kelgen.
«Saıasattaný jáne memlekettik basqarý» mamandyǵy boıynsha Taıaý Shyǵys tehnıkalyq ýnıversıtetin (Túrkııa) bitirgen.
«Bolashaq» baǵdarlamasy boıynsha Karnegı Mellon ýnıversıtetiniń (Pensılvanııa, AQSh) magıstratýrasyn támámdaǵan jáne Qyzylorda memlekettik ýnıversıtetin «Quqyq jáne quqyqtyq bilim ádisteri» mamandyǵy boıynsha bitirgen.
Ádilbek Musabaev 2000-2002 jyldar aralyǵynda Qazaqstan Respýblıkasy Syrtqy ister mınıstrliginde túrli dıplomatııalyq laýazymdarda qyzmet atqarǵan.
2002-2005 jyldary «Azyq-túlik korporatsııasy» UK» AQ-nyń departament dırektory, basqarýshy dırektory bolyp jumys istegen.
2005-2008 jyldar aralyǵynda «Maqta kelisim-shart korporatsııasy» AQ, «Qazaqstan Maqtasy» AQ basqarma tóraǵasy qyzmetterin atqardy.
2008-2011 jyldar aralyǵynda Qazaqstan Respýblıkasy Prezıdentiniń Іs Basqarmasy resmı is-sharalar jáne syrtqy baılanystar bóliminiń meńgerýshisi bolyp jumys istedi. Qazaqstan Respýblıkasy Indýstrııa jáne jańa tehnologııalar mınıstrliginde basshylyq qyzmetterinde, Qazaqstan Respýblıkasy Parlamentiniń Sharýashylyq basqarmasy basshysynyń orynbasary, Qazaqstan Respýblıkasy Syrtqy ister mınıstrligi Investıtsııalar komıteti basqarma basshysy, Qazaqstan Respýblıkasynyń Reseı Federatsııasydaǵy Elshiliginiń keńesshisi bolyp jumys istegen.
Bul qyzmetke taǵaıyndalǵanǵa deıin Abaı oblysy ákiminiń keńesshisi qyzmetin atqarǵan.
Otbasyly, tórt balasy bar.
26 jeltoqsanda Abaı oblysynyń memlekettik satyp alý basqarmasynyń basshysy bolyp Maqsut Ómirhanov taǵaıyndaldy.
Maqsut Ómirhanov 1974 jyly 19 mamyrda qazirgi Abaı oblysy Besqaraǵaı aýdanynda dúnıege kelgen.
Qazaq memlekettik basqarý akademııasyn (Narhoz) «qarjy jáne nesıe», keıin Ál-Farabı atyndaǵy Qazaq memlekettik ýnıversıtetin «quqyqtaný», L. B. Goncharov atyndaǵy Qazaq avtomobıl-jol akademııasyn «ınjener-qurylysshy» mamandyǵy boıynsha bitirgen.
Qurylys mamandyǵynan ınjenerııa jáne tehnologııa magıstri dárejesi bar.
Eńbek jolyn «KSRO 50 jyl» kolhozynda maýsymdyq jumystardan bastady.
Maqsut Ómirhanov toqsanynshy jyldary Almatyda qor bırjasynda, saqtandyrý jáne bank júıesinde jumys istegen.
«Menaý Áje qory» qoǵamdyq qoryn basqardy.
2003-2019 jyldary «Ulttyq akkredıtteý ortalyǵy» BAQ biliktilikti arttyrý ınstıtýtynyń dırektory, Almaty qalasyndaǵy «Ulttyq akkredıtatsııalaý ortalyǵy» BAQ ókilettiliginiń basshysy qyzmetin atqarǵan.
2021 jyly Máskeý qalasy «Rýbej» aımaqtyq tutynýshylar quqyǵyn qorǵaý qoǵamdyq uıymy tóraǵasynyń orynbasary bolǵan.
2022 jylǵa deıin «Halal ındýstrııasynyń akkredıttelgen sýbektiler odaǵy» (UAHIB) tóraǵasy qyzmetin atqarǵan.
Taǵaıyndalǵanǵa deıin Astana qalasynyń aktıvter jáne memlekettik satyp alý basqarmasy basshysynyń orynbasary bolǵan.
Astana qalasyndaǵy «№ 1 avtobýs parki» AQ dırektorlar keńesiniń, Astana qalasyndaǵy «Elorda qurylys kompanııasy» JShS baqylaý keńesiniń múshesi bolǵan.
«Qazaqstan Respýblıkasynyń táýelsizdigine 20 jyl» mereıtoı medali, sondaı-aq Qazaqstan Prezıdenti Qasym-Jomart Toqaevtyń Alǵys hatymen marapattalǵan.
29 jeltoqsanda SQO-daǵy Jambyl aýdanyna jańa ákim taǵaıyndaldy.
Azamat Bektasov 1989 jyly SQO, Esil aýdanynda týǵan.
2011 jyly Soltústik Qazaqstan memlekettik ýnıversıtetin «Ekologııa», 2021 jyly Abaı Myrzahmetov atyndaǵy Kókshetaý ýnıversıtetin «Quqyqtaný» mamandyǵy boıynsha bitirdi.
2011 jyldyń qyrkúıek aıynan bastap Esil aýdany Pokrovka aýylynda arnaıy pánder oqytýshysy bolyp jumys istedi.
2013 jyldyń qarasha aıynan – osy aýyldaǵy agrohımııalyq pánder oqytýshysy.
2014 jyldyń maýsymynan - SQO boıynsha ekologııa departamenti memlekettik ekologııalyq baqylaý bóliminiń bas mamany.
2015 jyldyń qazan aıynan – SQO boıynsha ekologııa departamenti memlekettik ekologııalyq baqylaý bóliminiń basshysy.
2017 jylǵy mamyrdan bastap – SQO boıynsha ekologııa departamenti basshysynyń orynbasary.
2020 jyldyń qyrkúıeginen - Qaraǵandy oblysy boıynsha ekologııa departamenti basshysynyń orynbasary.
2020 jylǵy jeltoqsannan – «SQO ákimdiginiń energetıka jáne turǵyn úı-kommýnaldyq sharýashylyq basqarmasy» KMM basshysynyń orynbasary.
2021 jyldyń maýsymynan osy kúnge deıin SQO boıynsha ekologııa departamentiniń basshysy bolyp eńbek etti.
