Elimizde apta ishinde bolǵan kadrlyq taǵaıyndaýlar
ASTANA. KAZINFORM – Osy aptada elimizde negizinen jergilikti atqarýshy organdarda, sondaı-aq Qarýly Kúshterde birqatar kadrlyq aýys-túıis boldy.
Memleket basshysy QR Qarýly Kúshteri Qurlyq áskerleriniń bas qolbasshysy jáne «Ońtústik» óńirlik qolbasshylyǵy áskerleriniń qolbasshysy taǵaıyndaldy.
Atap aıtqanda, Mereke Mátimuly Kóshekbaev QR Qarýly Kúshteri Qurlyq áskerleriniń bas qolbasshysy laýazymyna, al Erjan Ýaqasuly Ybyraev «Ońtústik» óńirlik qolbasshylyǵy áskerleriniń qolbasshysy laýazymyna keldi.
***
Memleket basshysynyń ókimimen Mahsýt Kýrmanalıevıch Gýseınov «Astana» óńirlik qolbasshylyǵy áskerleriniń qolbasshysy laýazymyna taǵaıyndaldy.
***
Qorǵanys mınıstriniń buıryǵymen polkovnık Rýslan Serikhanuly Omarov Abaı oblysynyń Qorǵanys isteri jónindegi departamentiniń bastyǵy bolyp taǵaıyndaldy.
R. Serikhanuly 1978 jyly Semeı oblysynda dúnıege kelgen. B. Momyshuly atyndaǵy respýblıkalyq áskerı mektep-ınternatynyń túlegi. 1999 jyly Túrkııa Respýblıkasy Qurlyq áskerleriniń áskerı akademııasyn («basqarý júıesiniń ınjeneri»), 2000 jyly Túrkııa Respýblıkasynyń artıllerııa mektebin támamdaǵan. 2018 jyly Ulttyq qorǵanys ýnıversıtetin «Áskerı istegi menedjment» mamandyǵy boıynsha bitirgen. QR Qarýly kúshterinde vzvod komandırinen bastap, quramanyń artıllerııa shtabynyń bastyǵyna deıingi laýazymdarda qyzmet etti.
«Shyǵys» óńirlik qolbasshylyǵy áskerlerinde Zymyran áskerleri jáne artıllerııa shtabynda jaýyngerlik daıyndyqty basqardy.
Jańa taǵaıyndaýǵa deıin QR QK Bas shtaby Uıymdastyrý-jumyldyrý jumystary departamenti bastyǵynyń (tsıfrlandyrý jónindegi) orynbasary qyzmetin atqardy.
***
Osy aptada Aınur Isabekova Shymkent qalasy Ádilet departamentiniń basshysy laýazymyna taǵaıyndaldy.
1998 jyly Shymkent qalasyndaǵy №11 orta mektebin úzdik bitirip, sol jyly QazMZA-ǵa zańger mamandyǵyn ıgerý úshin tústi. Osy joǵary oqý ornyn 2002 jyly úzdik aıaqtap, sol jyly Ońtústik Qazaqstan oblysynyń Ádilet basqarmasynyń notarıat isteri jónindegi bas mamany laýazymyna jumysqa ornalasty.
Kórsetilgen ýaqyttan beri ádilet organdarynda qyzmet etip kele jatyr. Qyzmet etý merziminde Ońtústik Qazaqstan oblysynyń Ádilet departamentiniń quqyqtyq túsindirý jáne halyqqa zańgerlik kómek kórsetý bóliminiń basshysy (2005 – 2015 jj.), jyljymaıtyn múlikke quqyqtardy tirkeý bólimi basshysynyń mindetin atqarýshysy (2007 j.), jeke sot oryndaýshylarynyń qyzmetin uıymdastyrý bóliminiń basshysy (2015-2018 jj.) bolyp jumys istedi.
2018 jyly Shymkent qalasynyń Abaı aýdandyq ádilet basqarmasynyń bólim basshysy laýazymyna taǵaıyndaldy, ári qaraı Shymkent qalasy Ádilet departamentiniń atqarýshylyq óndiristi qamtamasyz etý bóliminiń basshysy (2019-2020 jj.), osy Departamenttiń ákimshilik bóliminiń basshysy (2020 j.) bolyp jumys atqardy. 2020 - 2024 j.j. Shymkent qalasy Ádilet departamenti basshysynyń orynbasary boldy.
***
Osy aptada Pavlodar aýdanynyń jańa ákimi Dıdar Ibraev tanystyryldy.
Dıdar Elýbekuly 1992 jyly Jelezın aýdanynda dúnıege kelgen. 2014 jyly S. Toraıǵyrov atyndaǵy Pavlodar memlekettik ýnıversıtetin «Quqyqtaný» mamandyǵy boıynsha aıaqtaǵan. Eńbek jolyn 2009 jyly QR Bas prokýratýrasynyń quqyqtyq statıstıka jáne arnaıy esepke alý komıtetiniń aýmaqtyq organynda bastaǵan.
2015 jyldan bastap QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Pavlodar oblysy boıynsha departamentiniń atqarýshy jáne basshylyq laýazymdarynda qyzmet atqardy. 2018 jyldan bastap jergilikti atqarýshy bılik organdarynda eńbek etedi. 2022 jyldan bastap osy ýaqytqa deıin Pavlodar oblysy ákimi apparatynyń basshysy qyzmetin atqardy.
***
Aqmola oblysy ákiminiń 2024 jylǵy 25 qarashadaǵy ókimimen, QR Prezıdenti Ákimshiliginiń jáne máslıhat depýtattarynyń kelisimimen Qorǵaljyn aýdanynyń ákimi bolyp Almas Alın taǵaıyndaldy.
***
Qazaqstan Respýblıkasy Prezıdenti Ákimshiliginiń jáne Alǵa aýdandyq máslıhaty depýtattarynyń kelisimimen Aslanbek Serikuly Shúıinshalıev Alǵa aýdanynyń ákimi laýazymyna taǵaıyndaldy.
Ol 1988 jyly dúnıege kelgen. Bilimi — joǵary. Qazaq-Orys Halyqaralyq ýnıversıtetiniń «Quqyqtaný», Almaty ekonomıka jáne statıstıka akademııasynyń «Ekonomıka», QR Prezıdentiniń janyndaǵy memlekettik basqarý akademııasynyń «Óńirlik damý» mamandyqtary boıynsha bitirgen. Lıtva Memleketiniń Mıkolos Romerıs Ýnıversıtetinde memlekettik basqarý baǵdarlamasy aıasynda halyqaralyq taǵylymdamadan ótken.
Eńbek jolyn 2007 jyly Alǵa aýdandyq qarjy bóliminiń is-qaǵazdaryn júrgizýshi zańgeri bolyp bastaǵan.
2016 — 2021 jj. Alǵa aýdandyq qarjy bóliminiń basshysy, Aqtóbe oblysy ákimi apparatynyń oblystyq terrorızmge qarsy komıssııanyń jumysyn úılestirý jáne quqyq qorǵaý organdarymen ózara árekettesý bóliminiń basshysy, Qarǵaly aýdany ákiminiń orynbasary boldy. 2021 — 2023 jj. Aqtóbe oblysynyń jumyspen qamtýdy úılestirý jáne áleýmettik baǵdarlamalar basqarmasyn basqardy.
2023 jyldyń qarasha aıynan bastap Aqtóbe qalasynyń «Almaty» aýdanynyń ákimi qyzmetin atqaryp keldi.
***
Osy aptada Áset Ótegenuly Oralbaev Aqtóbe oblysy ákimi apparaty basshysynyń orynbasary laýazymyna taǵaıyndaldy.
Ol 1982 jyly dúnıege kelgen. Bilimi joǵary: 2004 jyly — L. N. Gýmılev atyndaǵy Eýrazııa ulttyq ýnıversıtetin «Memlekettik basqarý», 2006 jyly — T.Rysqulovatyndaǵy Qazaq ekonomıkalyq ýnıversıtetin «Ekonomıka» mamandyqtary boıynsha bitirgen.
Eńbek jolyn 2004 jyly Qazaqstan Respýblıkasy Prezıdentiniń teleradıokesheniniń menedjeri bolyp bastaǵan. 2005 — 2024 jj. Qazaqstan Respýblıkasynyń arnaıy memlekettik organdarynda; bıznes sýbektileriniń basshylyq laýazymdarynda jumys istegen.
2024 jyldyń qańtar aıynan bastap «Qazaqstan ınjınırıng» ulttyq kompanııasy» aktsıonerlik qoǵamynyń basqarma tóraǵasynyń keńesshisi jáne «S. M. Kırov atyndaǵy Mashına jasaý zaýyty» aktsıonerlik qoǵamynyń dırektorlar keńesiniń tóraǵasy qyzmeterin atqaryp kelgen.
***
Nurbol Baqytjanuly Erjanov Aqtóbe oblysy Jer qatynastary basqarmasynyń basshysy bolyp taǵaıyndaldy.
Ol 1987 jyly dúnıege kelgen, bilimi joǵary: 2008 jyly - Q.I.Sátbaev atyndaǵy Qazaq ulttyq tehnıkalyq ýnıversıtetin «Elektr energetıkasy», 2010 jyly - Qazaq eńbek jáne áleýmettik qatynastar akademııasyn «Quqyqtaný», 2010 jyly - M.Tynyshbaev atyndaǵy Qazaq kólik jáne kommýnıkatsııalar akademııasyn «Kólikti paıdalaný jáne júk qozǵalysy men tasymaldaýdy uıymdastyrý», 2019 jyl - Reseı Federatsııasy Prezıdenti janyndaǵy memlekettik jáne halyq sharýashylyǵy Reseı Akademııasyn «Memlekettik jáne mýnıtsıpaldy basqarý» mamandyqtary boıynsha bitirgen.
Eńbek jolyn 2008 jyly «KazPromStroıGrýpp» JShS menedjeri bolyp bastaǵan. 2008 – 2009 jj. QR Qarýly kúshteri qatarynda áskerı boryshyn ótegen.
2021 jyldyń aqpan aıynan bastap osy ýaqytqa deıin Alǵa aýdanynyń ákimi qyzmetin atqaryp keldi.
***
Soltústik Qazaqstan oblysy ákiminiń ókimimen Erden Shortybaev jolaýshylar kóligi jáne avtomobıl joldary basqarmasynyń basshysy bolyp taǵaıyndaldy.
Erden Shortybaev - óńirlik kadr rezerviniń ókili. 1993 jyly týǵan. 2015 jyly A.Myrzahmetov atyndaǵy Kókshetaý ýnıversıtetin, 2018 jyly L.B. Goncharov atyndaǵy qazaq avtomobıl-jol akademııasyn támamdady.
2021 jyldan bastap osy kúnge deıin Soltústik Qazaqstan oblysynyń jolaýshylar kóligi jáne avtomobıl joldar basqarmasy avtomobıl joldaryn damytý jáne paıdalaný bóliminiń bas mamany, bólim basshysy jáne basqarma basshysynyń orynbasary qyzmetterin atqardy.
***
Nurǵısa Málikuly Qamashev BQO tsıfrlyq tehnologııalar basqarmasynyń basshysy laýazymyna taǵaıyndaldy.
N. Qamashev 1984 jyly dúnıege kelgen. Bilimi joǵary. H.Dosmuhamedov atyndaǵy Atyraý memlekettik ýnıversıtetin zańtaný mamandyǵy boıynsha támamdaǵan.
Atyraý qalasy jer qatynastary bólimi basshysynyń orynbasary, Atyraý qalalyq jumyspen qamtý jáne áleýmettik baǵdarlamalar bólimi basshysynyń orynbasary, BQO ákimdigi tsıfrlyq tehnologııalar basqarmasynyń «Aqparattyq tehnologııalar ortalyǵy» KMM dırektory laýazymdarynda qyzmet etken.
***
Ataqty boksshy, Olımpıada chempıony jáne Vel Barker kýbogynyń ıegeri Serik Sápıev Qaraǵandy oblysynyń dene shynyqtyrý jáne sport basqarmasy basshysynyń mindetterin oryndaýǵa kiristi.
Serik Sápıevtiń birneshe biliktilik boıynsha joǵary bilimi bar: «dene shynyqtyrý pedagogi», «quqyqtaný», «memlekettik jáne jergilikti basqarý», «sport menedjmenti» mamandyǵy boıynsha «Bolashaq» halyqaralyq baǵdarlamasynyń stıpendıaty.
2017 jyly QR Parlamenti Májilisiniń depýtaty bolyp saılandy. 2019 jyldyń qańtarynda Memlekettik qyzmetke aýysty — úsh jylǵa jýyq QR Mádenıet jáne sport mınıstrliginiń Sport jáne dene shynyqtyrý isteri komıtetin basqardy. Sodan keıin QR Ulttyq Olımpıada komıteti Bas hatshysynyń orynbasary qyzmetin atqardy. 2022 jyldyń sáýirinen bastap osy taǵaıyndaýǵa deıin «MTEX management» JShS sportty damytý jónindegi basqarýshy dırektory bolyp jumys istedi.
***
Azamat Imashev Pavlodar oblysynyń dene shynyqtyrý jáne sport basqarmasynyń basshysy bolyp taǵaıyndaldy.
A. Bolatuly 1981 jyly týǵan, joǵary bilimdi. S. Seıfýllın atyndaǵy Aqmola agrarlyq ýnıversıtetin «ekonomıka jáne menedjment» mamandyǵy boıynsha, Akademık E. A. Bóketov atyndaǵy Qaraǵandy memlekettik ýnıversıtetin «dene shynyqtyrý jáne sport» mamandyǵy boıynsha aıaqtaǵan. Ekonomıka jáne bıznes magıstri.
Eńbek jolyn 2002 jyly Astana qalasyndaǵy Karate-do jáne jekpe-jek óneri federatsııasynyń menedjeri bolyp bastaǵan. 2007-2011 jyldary onyń vıtse-prezıdenti boldy.
Osy laýazymǵa taǵaıyndalǵanǵa deıin 2024 jyldyń sáýirinen bastap QR týrızm jáne sport mınıstrliginiń sport jáne dene shynyqtyrý isteri komıteti tóraǵasynyń orynbasary bolyp jumys istedi.