Elimizde 900 myń tonnadan astam kartop jınaldy

ASTANA. KAZINFORM - Qazaqstan óńirlerinde kartop jınaý naýqany qarqyndy júrgizilip jatyr. Búgingi kúnge 907 myń tonna ónim jınaldy.

Aýyl sharýashylyǵy mınıstrligi málimetinshe, óńirlerge qaraı alqaptardaǵy baǵa kelisine 90-nan 120 teńgege deıin ózgerip otyr. Bıyl uıymdasqan sharýashylyqtarda kartop egistiginiń kólemi 11 myń gektarǵa ulǵaıyp, jalpy ónim kólemin 2,7 mln tonnaǵa jetkizý josparlanǵan. Bul ishki naryqtyń jyldyq qajettiliginen (shamamen 2 mln tonna) aıtarlyqtaı joǵary.

— Boljam boıynsha ónim mol bolady. Mundaı kólemde ishki naryqty tolyq qamtamasyz etýge esh qaýip joq. Sondyqtan 28 shildede kartop eksportyna qoıylǵan barlyq shekteýler alyndy, — dedi QR Aýyl sharýashylyǵy vıtse-mınıstri Erbol Tasjúrekov.

Bólshek saýdadaǵy ortasha baǵa da tómendep jatyr. Statıstıka derekterine sáıkes, 2 qyrkúıekte el boıynsha kartoptyń ortasha baǵasy kelisine 194 teńge boldy. Bul kórsetkish bir apta burynǵydan 3,9 %-ǵa tómen.

Eksport baǵytynda da oń dınamıka baıqalady. Tamyz aıynda fıtosanıtarlyq sertıfıkattardy rásimdeýde týyndaǵan tehnıkalyq máseleler sheshimin tapty. 4 qyrkúıektegi jaǵdaı boıynsha Ózbekstanǵa jóneltilgen 8,7 myń tonna kartopqa qujattar rásimdeldi.

— Bıylǵy eksporttyq áleýet 450 myń tonna jáne onyń ishki naryqqa esh áseri bolmaıdy, — dep túıindedi Erbol Tasjúrekov.

Kartop baǵasy kóktemde 185 teńgeden aspaıtynyn jazǵan edik.