Elimizde 5 myńnan astam stýdent sý tasqynymen kúreske jumylǵan
ASTANA. KAZINFORM – Elimizdiń sý basqan óńirlerindegi joǵary oqý oryndaryna stýdentterdi qaýipti aımaqtarǵa jibermeý týraly tapsyrma berilgen. Bul týraly Ǵylym jáne joǵary bilim vıtse-mınıstri Talǵat Eshenqulov aıtty.
«Qazirgi tańda tótenshe jaǵdaı oryn alǵan óńirlerde ornalasqan joǵary oqý oryndaryn sý almaǵan. Zalal kelý men qıraý qaýpi joq. Mınıstrlik tarapynan barlyq oqý ornynan stýdentterdi qaýipti aımaqtarǵa jibermeý týraly tapsyrma berildi. Mınıstrlik jáne tıisti óńirlerdiń joǵary oqý oryndary tótenshe jaǵdaı rejıminde jumys jasaýda. Sý tasqyny júrip jatqan óńirlerdegi ýnıversıtetterdiń kúndelikti monıtorıngin júrgizip jatyr», - dedi vıtse-mınıstr Ortalyq kommýnıkatsııalar qyzmetindegi brıfıngte.
Onyń atap ótýinshe, joǵary oqý oryndarynda jumys jáne oqý shtattyq rejımde júrgizilýde.
Onlaın oqytýǵa qazir tótenshe jaǵdaı rejımine baılanysty tek qana H.Dosmuhamedova atyndaǵy Atyraý ýnıversıteti kóshken. Onda 8 myń stýdent bilim alady.
«Apatpen kúreske joǵary oqý oryndary tartylǵan. Ýnıversıtetter belsendi azamattyq ustanym kórsetýde. Óńirlerde, sý tasqyny júrip jatqan jerlerde stýdentter jáne ýnıversıtetter qyzmetkerleri qatarynan 5 myńnan asa adamnan turatyn otrıadtar quryldy. Atap aıtqanda, Q.Jubanov atyndaǵy Aqtóbe óńirlik ýnıversıtetiniń 450 stýdentteri men 50 qyzmetkerlerden turatyn eriktiler toby gýmanıtarlyq ortalyqtarda qajetti turmystyq taýarlardy tasymaldaýǵa-jetkizýge, gýmanıtarlyq kómekterdi qabyldaýǵa járdemdesýde. Dál osy ýnıversıtettiń 2,8 myńnan astam stýdenti men 200 qyzmetkerinen arnaıy eriktiler jasaǵy qurylǵan. Atyraý munaı jáne gaz ýnıversıtetiniń 300 stýdenti eriktiler retinde aýyspaly rejımde jumys jasaýda. Qostanaı óńirlik ýnıversıtetiniń 100 volontery kún saıyn tasqyn bolǵan aımaqtardan evakýatsııalanǵan azamattarǵa gýmanıtarlyq kómek taratý jumystaryna qatysyp júr», - dedi Talǵat Eshenqulov.
