Elimizde 27 sáýirde Eýropalyq ımmýndaý aptalyǵy bastalady

ASTANA. KAZINFORM – Elimizde 27 sáýir men 3 mamyr aralyǵynda Eýropalyq ımmýndaý aptalyǵy ótedi. Bul týraly Ortalyq kommýnıkatsııalar qyzmetinde ótken «Immýndyq profılaktıka máseleleri týraly» baspasóz máslıhatynda aıtyldy.

QR DSM Sanıtarııalyq-epıdemıologııalyq baqylaý komıtetiniń vaktsınamen basqarylatyn ınfektsııalardy baqylaý basqarmasynyń basshysy Nurshaı Ázimbaevanyń aıtýynsha, Eýropalyq ımmýndaý aptalyǵy sheńberinde elimizde mynandaı sharalar ótedi:

- dóńgelek ústelder, brıfıngter, jýrnalıstermen, blogerlermen jáne medıa keńistigindegi dárigerlermen kezdesýler;

- vaktsınatsııanyń mańyzdylyǵyn talqylaý úshin pedıatrlarǵa, epıdemıologtarǵa, jalpy tájirıbe jáne basqa profıldi dárigerlerge arnalǵan konferentsııalar ótedi;

- ımmýndaýdyń mańyzdylyǵy týraly kórneki materıaldardy basyp shyǵaryp, taratylady.

Sondaı-aq, ol vaktsınalar men vaktsınatsııa týraly senimdi derekter ornalastyrylǵan egu.kz saıty jáne 7701 senim telefonynyń jumysy uıymdastyrylǵanyn atap ótti.

Aıta keteıik, Eýropalyq ımmýndaý aptalyǵy (EIA) – 2005 jyldan bastap DDU Eýropalyq aımaqtyq bıýrosynyń bastamasymen ótkizilip kele jatqan ımmýndaýdy nasıhattaýdyń tıimdi mehanızmi. Onyń maqsaty – ımmýndaýǵa nazar aýdarý jáne halyqtyń ımmýndaýdyń mańyzdylyǵy týraly habardarlyǵyn arttyrý.

Buǵan deıin elimizde balasyna vaktsına saldyrmaıtyn ata-ana kóbeıip kele jatqanyn jazǵan edik.

Sondaı-aq, vaktsınalaýdyń arqasynda elimiz 34 jylda qandaı kórsetkishterge qol jetkizgenin habarlaǵan edik.