Elimizde 2030 jylǵa qaraı 236 myńnan astam muǵalim qajet bolady – Darhan Ahmed-Zakı
ORAL. KAZINFORM – QR Ǵylym jáne joǵary bilim vıtse-mınıstri Darhan Ahmed-Zakı Oral qalasynda Mahambet Ótemisov atyndaǵy Batys Qazaqstan ýnıversıtetinde óńirdiń ǵylymı qaýymdastyǵy ókilderimen kezdesip, Qazaqstanda ǵylym men joǵary bilim berýdi damytý máseleleri týraly áńgimelep berdi.
Darhan Ahmed-Zakı mınıstrliktiń 2024 jyldyń birinshi jartyjyldyǵyndaǵy jumysyn qorytyndylap, negizgi jetistikterin jınalǵandar nazaryna usyndy.
Óz baıandamasynda sondaı-aq joǵary jáne joǵary oqý ornynan keıingi bilimniń qoljetimdiligi men sapasyn arttyrýǵa baǵyttalǵan memlekettik bastamalar týraly aıtty. Vıtse-mınıstr toqtalǵan negizgi baǵdarlamalardyń qatarynda 2023-2029 jyldarǵa arnalǵan til saıasatyn damytýdyń tujyrymdamasy, sondaı-aq joǵary bilim men ǵylymdy damytýdyń 2023-2029 jyldarǵa arnalǵan tujyrymdamasy bar.
Qazaqstan Respýblıkasy Prezıdentiniń tapsyrmasy aıasynda jasandy ıntellektti engizýge jáne tsıfrlyq tehnologııalardy damytýǵa erekshe nazar aýdaryldy. Darhan Ahmed-Zakıdiń pikirinshe, bul eldiń bilim berý jáne ǵylym salasyn tabysty damytý úshin mańyzdy element bolmaq.
Vıtse-mınıstrdiń sózine qaraǵanda, búgingi tańda resmı statıstıkaǵa sáıkes joǵary demografııalyq ósim baıqalady. 2019 jyldan bastap 2022 jylǵa deıin bala týýdyń ósýin eskergende, 2040 jylǵa qaraı 18 jastaǵy balalardyń eki ese artýyn boljaýǵa bolady. Bul memlekettiń birinshi mamandyq alýǵa jumsaıtyn shyǵystarynyń ósý serpinine alyp keledi, óıtkeni elde memlekettik bıýdjet qarajaty bilim berý júıesin qarjylandyrýdyń negizgi kózderiniń biri bolyp tabylady.
Memleket basshysynyń 2022 jylǵy 1 qyrkúıektegi halyqqa Joldaýynda berilgen tapsyrmalaryn oryndaý aıasynda saralanǵan grantty engizý, bilim berý nesıesin berý tásilderi ázirlendi. Bul tásilder 2030 jylǵa qaraı joǵary bilimge jylyna 150 myńnan astam mektep túlekterine qol jetkizýge múmkindik beredi, olardyń úlgerimi, ǵylymı jetistikteri men áleýmettik mártebesin eskere otyryp, 30 paıyzdan 100 paıyzǵa deıin grant beriledi.
Vıtse-mınıstrdiń málimdeýinshe, pedagogıkalyq kadrlardy daıarlaýdyń sapasyn arttyrý úsh baǵyt boıynsha júzege asyrylady.
«Birinshi. Astanany qosa alǵanda óńirlerdi olardyń qajettilikterine sáıkes pedagogıkalyq kadrlarmen qamtamasyz etý. Búgingi tańda elimizdiń joǵary oqý oryndary aldaǵy tórt jylda aǵymdaǵy suranysty eskere otyryp, oqytýshylar daıarlaýǵa daıyn. 2030 jylǵa qaraı elimizde 236 myńnan astam muǵalim qajet bolady», - dedi vıtse-mınıstr.
Onyń aıtýynsha, qysqa jáne uzaq merzimdi josparlar bar. Sonymen, bıylǵy jyly Astana qalasy úshin pedagogtardy daıarlaý maqsatynda Abaı atyndaǵy Qazaq ulttyq pedagogıkalyq jáne L.Gýmılev atyndaǵy Eýrazııa ulttyq ýnıversıtetteriniń birlesken baǵdarlamalaryn iske qosý josparlanǵan.
Ekinshiden, jańa formatsııadaǵy pedagogtardy daıarlaý jáne qaıta daıarlaý qolǵa alynady.
Búgingi tańda ýnıversıtettiń bilim berý baǵdarlamalary «Pedagog» kásibı standarty men mektepke deıingi jáne orta bilim berýdiń memlekettik bilim berý standartyn eskere otyryp qurastyrylǵan.
«30 jańa ınnovatsııalyq bilim berý baǵdarlamasy ázirlendi, olardy aýqymdy etý úshin bıylǵy jyldyń 1 qyrkúıeginen bastap respýblıka boıynsha 49 joǵary oqý ornynyń 1 800 oqytýshysy bilim alýda. Bul baǵdarlamalar qazirgi kózqarastan túbegeıli erekshelenedi. Olarda stýdentterdiń ǵylymı-zertteý jáne tsıfrlyq quzyrettilikterin damytýǵa basa nazar aýdarylǵan. Inklıýzıvti pedagogıkanyń mazmuny men pánderdi oqytý ádistemesi jańartyldy. Jyl sońyna deıin arnaıy pedagogıka mamandyǵy boıynsha mamandar daıarlaıtyn 14 joǵary oqý orny ınklıýzııa kabınetterimen jáne 25 joǵary oqý orny pándik kabınettermen jabdyqtalady», - deıdi D.Ahmed-Zakı.
Úshinshiden, pedagogıkalyq bilim berýdiń ınstıtýtsıonaldyq transformatsııasy baǵytynda erte kásiptik baǵdar berý jáne kásiptik keńesshilerdi oqytý boıynsha jumys bastaldy.
«Daıarlaý baǵdarlamalary minor men mıkrobiliktilikterden quralǵan modelder jıyntyǵy retinde qaıta qarastyrylyp otyr. Ol kolledj bitirgen túlekterge joǵary oqý oryndarynda qysqartylǵan baǵdarlamalar boıynsha bilim alýǵa múmkindik beredi. Pedagogtardy oqytýdyń tájirıbege baǵyttalǵan sıpaty jáne PGCE kýrstary arqyly pedagogtardy qaıta daıarlaý modeli kúsheıtiledi», - dedi vıtse-mınıstr.