Elimizde 203 myń múmkindigi shekteýli bala tirkelgen

ASTANA. KAZINFORM — Elimizde 203 myń múmkindigi shekteýli bala tirkelgen. Bul týraly Úkimet otyrysynda QR Oqý-aǵartý mınıstri Ǵanı Beısembaev aıtty.

«Búgingi tańda psıhologııalyq-medıtsınalyq-pedagogıkalyq konsýltatsııa (PMPK) esebinde 203 myń múmkindigi shekteýli bala tirkelgen. Olardyń 66 myńy — mektepke deıingi, 137 myńy — mektep jasyndaǵy balalar. Atalǵan sanattaǵy balalar sany jyl saıyn artýda. Byltyrǵy jylmen salystyrǵanda 15 myńǵa, ıaǵnı 8% ósken (2022 j. — 175 myń, 2023 j — 188 myń, 2024 j — 203 myń)», — dedi QR Oqý-aǵartý mınıstri. 

Vedomstvo basshysynyń aıtýynsha, arnaıy qoldaýdy qajet etetin balalardy oqytý, tárbıeleý, ońaltý 496 arnaıy bilim berý uıymynda júzege asyrylady (99 arnaıy mektep, 45 arnaıy balabaqsha, 108 PMPK, 221 túzetý kabıneti, 10 aýtızm ortalyǵy, 13 ońaltý ortalyǵy). 

Múmkindigi shekteýli balalardy oqytý úshin mektepke deıingi uıymdardyń 69%-da, mektepterdiń 88%-da, kolledjderdiń 80%-da jaǵdaı jasalǵan. Mektepterde 1071 arnaıy jabdyqtalǵan kabınet bar.

Buǵan deıin Ǵanı Beısembaev Nazarbaev Zııatkerlik mektepterine bólinetin qarajat azaıǵanyn málim etken bolatyn.