Elimizde 2026 jyly syra qaınatý ónimderi tańbalanady
ASTANA. KAZINFORM – QR Premer-mınıstriniń orynbasary – Ulttyq ekonomıka mınıstri Serik Jumanǵarın Qazaqstandaǵy Amerıkalyq saýda palatasynyń atqarýshy dırektory Djeff Erlıhpen kezdesti. Bul týraly Úkimettiń baspasóz qyzmeti habarlady.
Kezdesý barysynda vıtse-premer tutyný taýarlaryn tsıfrlyq tańbalaýdy engizý máselesi qaralǵan Investıtsııalyq ahýaldy jaqsartý jónindegi keńes otyrysynyń oń qorytyndylaryn atap ótti. Ol Úkimettiń sheteldik seriktester men Amerıkalyq saýda palatasynyń Qazaqstannyń ınvestıtsııalyq ahýalyn damytýǵa qosqan úlesin joǵary baǵalaıtynyn jetkizdi. Otyrysta aıtylǵan barlyq usynys muqııat zerdelendi.
Serik Jumanǵarınniń aıtýynsha, bıznes-qoǵamdastyq ókilderimen kezdesý tsıfrlyq tańbalaýdy engizýdiń praktıkalyq aspektisin talqylaýǵa múmkindik beredi.
— Biz mindetti tsıfrlyq tańbalaýdy kóleńkeli ekonomıkanyń úlesin tómendetý men taýar naryǵynyń ashyqtyǵyn arttyrýdaǵy pármendi qural dep sanaımyz. Bul úderiste syra qaınatý salasyna erekshe nazar aýdarylady. Munda tsıfrlyq tańbalaý tásildiń tıimdiligin tájirıbe júzinde baǵalaýǵa múmkindik beredi. Syra qaınatý ónimin tańbalaýdy engizý zańsyz ónim kólemin qysqartýǵa jáne naryqtyń osy segmentin 25%-dan astamǵa «kóleńkeli ekonomıkadan shyǵarýǵa» múmkindik beredi, — dep atap ótti ol.
Úkimettiń is-qımyl baǵdarlamasyna sáıkes (QR 2025 jylǵy 12 maýsymdaǵy №431 qaýlysy) syra qaınatý ónimderin mindetti tańbalaýdy 2026 jylǵy aqpannan bastaý josparlanǵan. Sonymen qatar bızneske júktemeni azaıtý úshin bótelke men bankany tańbalaýdy engizýdi 2027 jylǵy qańtarǵa deıin shegerý týraly sheshim qabyldandy. Bul kásiporyndarǵa jabdyqqa kezeń-kezeńimen ınvestıtsııa salýǵa jáne óz aqparattyq júıelerin jetildirýge múmkindik beredi.
Qazaqstandaǵy Amerıkalyq saýda palatasynyń atqarýshy dırektory Djeff Erlıh eldegi iri jobalardy júzege asyratyn halyqaralyq kompanııalar tańbalaý júıesin tabysty jáne kezeń-kezeńimen júzege asyrýǵa múddeli ekenin atap ótti. Sonymen qatar bıznes-qoǵamdastyq turaqty ınvestıtsııalyq belsendilikti saqtaý úshin teńgerimdi júzege asyrý merzimin qamtamasyz etýdiń mańyzdylyǵyna nazar aýdarady.
Efes Kazakhstan korporatıvtik máseleler jónindegi dırektory Shyńǵys Qaskeev bıznestiń tsıfrlyq tańbalaýdy engizýdi qoldaıtynyn jáne Úkimettiń kezeńge bólip qoldaný tásilin oń baǵalaıtynyn aıtty. Tańbalaýdyń birinshi kezeńi 2026 jylǵy aqpannan bastap júrgizilip, bóshkeler men bótelkeler, ekinshisi kezeńde 2027 jylǵy qańtardan bastap bankalar tańbalanady. Sonymen qatar jabdyqty jetkizý merzimi men óndiristiń maýsymdyq ereksheligin eskere otyryp, kompanııa iske qosýdy 2026 jylǵy qarashaǵa aýystyrý múmkindigin qarastyrýdy usyndy.
Serik Jumanǵarın Úkimettiń tańbalaýdy engizýdegi naqty jospary baryn jáne naryq qatysýshylary ýaqtyly daıyndalýy úshin merzimdi bekitý mańyzdy ekenin aıtty.
— Biz bótelkeler men bankalardy tańbalaýdy 2027 jylǵy qańtarǵa aýystyrýǵa daıynbyz. Biraq syra qaınatý salasynyń maýsymdyq ereksheligin eskere otyryp, kegti tańbalaý 2026 jylǵy qyrkúıekte júrgiziledi. Kegterdi tańbalaý avtomattandyrýdy qajet etpeıdi jáne aıtarlyqtaı shyǵyn ákelmeıdi, — dep atap ótti ol.
Vıtse-premer jańa Salyq kodeksi sheńberinde Úkimet tańbalaýdy engizýge jumsalatyn naqty shyǵynnan asatyn salyq shegerimi arqyly bıznesti qosymsha yntalandyrý múmkindigin qarastyrýǵa daıyn ekenin atap ótti. Osy tetikti pysyqtaý úshin ol Ulttyq ekonomıka mınıstrligi men Qarjy mınıstrligine tańbalaý protsesiniń naryq qatysýshylary úshin ekonomıkalyq tıimdi bolýyn qamtamasyz etetin tıisti usynys daıyndaýdy tapsyrdy.
Aıta keteıik, Qazaqstanda tsıfrlyq tańbalaý qoldanylatyn elderge syra eksportynyń ósýi baıqalady. 2025 jylǵy birinshi jartyjyldyqtaǵy eksport kólemi — 12,6 mln lıtr bolǵan. Bul ótken jylǵy sáıkes kezeńmen salystyrǵanda 33%-ǵa artyq. Reseılik kompanııalar buryn Reseı naryǵynda bolmaǵan qazaqstandyq syra qaınatý zaýyttarynyń ónimin sertıfıkattaýdy bastady. Bul otandyq óndirýshilerdiń eksporttyq áleýeti men tehnıkalyq daıyndyǵyn kórsetedi.
Saýda jáne ıntegratsııa mınıstriniń buıryǵy negizinde birqatar taýar tizimine ózgerister engizý usynylǵanyn jazǵan bolatynbyz.