Elimizde 20-30 jastaǵy qyz-kelinshekter jatyr moıny obyryna jıi shaldyǵa bastady - onkolog

ALMATY. KAZINFORM – Almatylyq onkolog 11 jastaǵy qyzdarǵa jatyr moıny obyryna qarsy vaktsına saldyrýǵa úndedi. Óıtkeni áıelder arasynda aýrýdyń osy túri kóbeıip barady.

Erte bastan salynǵan ekpe qaýipti derttiń aldyn alýǵa kómektesedi.

Bul týraly óńirlik kommýnıkatsııalar qyzmetinde ótken baspasóz máslıhatynda Almaty onkologııa ortalyǵynyń onkogınekologııa bólimshesiniń meńgerýshisi Raıhan Bolatbekova aıtty.

«Dúnıejúzilik densaýlyq uıymy 2030 jylǵa qaraı 15 jasqa deıingi qyzdardyń kem degende 90%-yna adam papılloma vırýsyna qarsy ekpe egýdi usynady. Osylaısha jatyr moıny obyrynyń jańa jaǵdaılaryn 2045 jylǵa qaraı 42% azaıtyp, 2070 jylǵa qaraı 14 mln adamnyń ómirin saqtap qalýǵa bolady. Al, Qazaqstanda atalǵan vaktsınatsııanyń arqasynda jatyr moıny obyryn 74,2% tómendetýge múmkindik bar», — dedi dáriger.

Sonymen qatar, ol 2024 jyldyń kúzinde el mektepterinde 11 jasar qyzdarǵa adam papıllomavırýsyna qarsy tegin vaktsınatsııa bastalatynyn eske saldy.

Vaktsına ata-analardyń ruqsatymen ǵana egiledi.

«Jatyr moıny obyry - onkologııalyq aýrýlar ishinde ekinshi orynda tur. Biz 20-30 jas aralyǵyndaǵy qyz-kelinshekterden jatyr moıny qaterli dertin jıi tirkeımiz», — deıdi Raıhan Bolatbekova.

Aıta keteıik, 27 qańtarda Almaty onkologııa ortalyǵynda ashyq esik kúni ótedi.

Qabyldaý ýaqyty saǵat 9:30–dan 13:00–ge deıin.