Elimizde 11 kúnde turmystyq janjal týraly 4 myńnan astam habarlama tirkeldi

ASTANA. KAZINFORM — Bul týraly ІІM Ákimshilik polıtsııa komıtetiniń aǵa ınspektory Aqmaral Serikbaeva aıtty. 

«Osy jyldyń 15-26 qańtary aralyǵynda el aýmaǵynda «Turmys» aldyn alý is-sharasy ótkizildi. Onyń qorytyndysyna saı polıtsııada otbasylyq, turmystyq janjal týraly 4 myńnan astam habarlama tirkeldi. Sonyń 1,5 myńyn polıtsııa qyzmetkerleri ózderi úılerdi aralaý barysynda anyqtady. Іs júzinde «agressorlardyń» barlyǵy nemese 95 paıyzy ákimshilik jaýapkershilikke tartyldy», — dedi ol ІІM baspasóz qyzmeti alańynda ótken brıfıngide.

ІІM ókili otbasylyq janjaldyń negizgi sebebi maskúnemdik, lýdomanııa, adamgershilik qundylyqtardyń tómendeýi jáne sonyń saldarynan otbasy ınstıtýtynyń joǵalýy ekenin aıtady.

«Osyndaı zorlyq-zombylyqtyń sebepterin ýaqtyly anyqtaý jáne joıý úshin aldyn alý is-sharalary qolǵa alyndy. Turmystyq zorlyq-zombylyq jasaǵany úshin buryn polıtsııanyń nazaryna túsken 39 myńǵa jýyq adammen profılaktıkalyq áńgime júrgizildi. Qaýiptilik deńgeıin anyqtaý úshin 3 669 otbasydan saýalnama alyndy. Saýalnama nátıjesinde 559 otbasynda qaıta quqyq buzýshylyq jasaý qaýpi joǵary ekeni anyqtaldy. Sondaı-aq quqyq buzýshylarǵa agressııany boldyrmaý úshin psıhokorrektsııalyq kýrstardan óz erkimen ótý usynyldy. Ómirlik qıyn jaǵdaıdaǵy 675 otbasy, onyń ishinde qolaısyz áleýmettik ortadaǵy zorlyq-zombylyq belgileri bar balalary anyqtaldy. Olar týraly kómek kórsetý úshin múddeli memlekettik organdarǵa aqparat jiberildi», — dedi Aqmaral Serikbaeva.