Elimizde 11-13 jas aralyǵyndaǵy 1,6 myńnan astam qyz bala APV-ǵa qarsy ekpe aldy
ASTANA. KAZINFORM – Adam papılloma vırýsyna (APV) qarsy ekpe salý úshin elimizdiń óńirlerine vaktsııana jetkizildi. Bul týraly QR DSM Sanıtarııalyq-epıdemıologııalyq baqylaý komıtetiniń vaktsınamen basqarylatyn ınfektsııalardy baqylaý basqarmasynyń basshysy Nurshaı Ázimbaeva aıtty.
«Qyrkúıek aıynda barlyq óńirge vaktsına jetkizildi. Elimizdiń 9 óńirinde – Qaraǵandy, Shyǵys Qazaqstan, Batys Qazaqstan, Pavlodar, Jetisý, Túrkistan, Ulytaý, Aqmola oblystarynda jáne Astana qalasynda APV-ǵa qarsy vaktsınatsııa bastaldy. APV vaktsınatsııasynyń barysyna kúndelikti monıtorıng júrgiziledi. Qazirgi kezde respýblıka boıynsha 11-13 jas aralyǵyndaǵy 1,6 myńnan astam qyz bala APV-ǵa qarsy ekpe aldy», - dedi N.Ázimbaeva Ortalyq kommýnıkatsııalar qyzmetindegi baspasóz máslıhatynda.
Onyń aıtýynsha, óńirlerdiń daıyndyǵyn jáne aýdandar, medıtsınalyq uıymdar boıynsha vaktsınany jetkizý ári taratý merzimderin eskere otyryp, 6 óńirde APV-ǵa qarsy vaktsınatsııa osy aptada bastalady (Abaı, Aqtóbe, Almaty, Atyraý, Qostanaı jáne Soltústik Qazaqstan oblystary). Qalǵan 5 óńirde vaktsınatsııanyń bastalýy kelesi aptaǵa josparlanǵan (30 qyrkúıek – 1 qazan aralyǵy).
Vaktsınanyń 175,8 myń doza kólemindegi ekinshi parııasynyń kelýi bıylǵy qarasha aıyna josparlanǵan.
Vaktsınatsııa mektepterdiń medıtsınalyq kabınetterinde ata-analardyń nemese zańdy ókilderdiń aqparattandyrylǵan kelisimin alǵannan keıin júrgiziledi. Ata-analardyń qalaýy boıynsha vaktsınatsııa tirkelgen jeri boıynsha emhanalarda da júrgizilýi múmkin.
Elimizde qoldanylatyn APV-ǵa qarsy «Gardasıl» vaktsınasyn DDSU sertıfıkattan.
«Aıta ketetin jaıt - vaktsına +2-den +8°S-qa deıingi temperatýralyq rejımdi saqtaýdy talap etedi. Osyndaı temperatýralyq tártipti saqtaý úshin óńirlerdiń medıtsınalyq uıymdary tońazytqysh jabdyqtarmen jáne termokonteınerlermen qamtamasyz etilgen. Óńirlerdiń ortalyq qoımalary deńgeıinde shamamen úlken 30 tońazytqysh kamerasy bar, medıtsınalyq uıymdarda 8 myńnan astam tońazytqysh jáne 10 myńnan astam termokonteıner jasaqtalǵan», - dedi basqar basshysy.
QR Bas memlekettik sanıtarlyq dárigeriniń 2024 jylǵy 17 qyrkúıektegi № 11 qaýlysy qabyldandy, onda medıtsına qyzmetkerleri úshin APV-ǵa qarsy vaktsınatsııalaý boıynsha tıisti uıymdastyrý is-sharalary men algorıtm aıqyndaldy. QR Ulttyq vaktsınatsııa kúntizbesine sáıkes, Dúnıejúzilik densaýlyq saqtaý uıymynyń usynymyn jáne Qazaqstandaǵy Halyqty ımmýndaý jónindegi sarapshylardyń ulttyq tehnıkalyq konsýltatıvtik tobynyń sheshimin eskere otyryp, elde 11 jastaǵy qyzdarǵa vaktsına egý bastaldy. Sonymen qatar, 11 jastan asqan qyzdardyń ata-analarynyń ótinishterin eskere otyryp, 12 jáne 13 jastaǵy qyzdardy APV-ǵa qarsy ımmýndaý júrgizilip jatyr. Ulttyq vaktsınatsııa kúntizbesine jáne óndirýshiniń nusqaýlaryna sáıkes, APV-dan qorǵaý úshin 6 aı aralyǵyn saqtaı otyryp, vaktsınanyń eki dozasyn alý qajet.
Budan buryn elordada adam papılloma vırýsyna (APV) qarsy vaktsınatsııa naýqany bastalǵanyn jazǵan edik.
