Elıtalyq tuqymdardyń úlesi ósti - Saparhan Omarov

NUR-SULTAN. QazAqparat – Memlekettik qoldaýdyń nátıjesinde tómen sapaly tuqymdardy paıdalaný paıyzy 2016-2020 jyldary 7,2%-ǵa deıin tómendedi. Bul týraly Úkimet otyrysynda Aýyl sharýashylyǵy mınıstri Saparhan Omarov málim etti, dep habarlaıdy QazAqparat tilshisi.

«2021 jyldyń ónimine respýblıka boıynsha 2,5 mln tonna tuqym daıyndalǵan bolatyn, olar egis kondıtsııalaryna tolyq sáıkes keldi. Egilgen sorttyq tuqymdardyń jartysynan kóbi qazaqstandyq selektsııaǵa jatatynyn atap ótý qajet. Otandyq tuqym ósirý sharýashylyqtaryn zamanaýı selektsııalyq jáne tuqym tazalaý tehnıkasymen jaraqtandyrý boıynsha jumys júrgizilýde. Memlekettik qoldaýdyń nátıjesinde tómen sapaly tuqymdardy paıdalaný paıyzy 2016-2020 jyldary 7,2%-ǵa deıin tómendedi, elıtalyq tuqymdardyń úlesi 6,8%-ǵa deıin ósti», - dedi S. Omarov.

Onyń aıtýynsha, úshinshi reprodýktsııadan tómen emes tuqymdardy paıdalaný boıynsha jaqsy kórsetkish Soltústik Qazaqstan (100%), Batys Qazaqstan (99,2%) jáne Almaty (98,7%) oblystarynda baıqalady. Joǵary reprodýktsııaly tuqymdardy qoldanýdyń eń tómen kórsetkishi - Túrkistan (71,4%) jáne Jambyl (77,3%) oblystarynda.

«Bul rette, Jambyl, Túrkistan jáne Pavlodar oblystary boıynsha joǵary reprodýktsııaly tuqymdardy paıdalaný úlesi jyl saıyn tómendep keledi. Aqmola, Qostanaı jáne Qyzylorda oblystary boıynsha oń dınamıka baıqaldy. Bul kórsetkishti arttyrý úshin oblystar sharýashylyqtardy tuqym sharýashylyǵyn sýbsıdııalaýmen neǵurlym tolyq qamtýlary qajet. Bıylǵy oblystardyń jergilikti bıýdjetterinde tuqym sharýashylyǵyn damytýdy sýbsıdııalaýǵa 11,7 mlrd teńge kózdelgen, respýblıkalyq bıýdjetten qosymsha 4,3 mlrd teńge bólindi», - dedi mınıstr.

Budan buryn habarlanǵandaı, búgin Úkimet otyrysynda Premer-Mınıstr Asqar Mamın aýyl sharýashylyǵy salasyna qatysty birqatar tapsyrma berdi.