Elimizge ınvestor tartýǵa qandaı faktorlar qolbaılaý bolyp otyr

Álemdik ınvestıtsııalyq tartymdylyq reıtıngisinde Qazaqstannyń neshinshi orynda turǵany belgili boldy, dep habarlaıdy QazAqparat tilshisi.

«Qazaqstan ınvestıtsııalyq tartymdylyq reıtıngisinde 84 eldiń ishinde 56-orynda tur. Bul zertteýdi jyl saıyn kanadalyq Freızer ınstıtýty júrgizedi. Ol álem elderiniń ınvestıtsııalyq tartymdylyǵyn baǵalaýǵa baǵyttalǵan, onyń aıasynda mıneraldy shıkizatpen qamtamasyz etilý deńgeıi, sondaı-aq paıdaly qazbalardy barlaý, óndirý salasyna ınvestıtsııa tartýǵa tán qoǵamdyq-saıası faktorlar eskeriledi. Qazaqstanǵa qatysty júrgizilgen zertteýde olqylyqtyń 77 paıyzy quqyqtyq júıege qatysty bolǵan. Atap aıtqanda, salyq jáne eńbek zańnamasy, sondaı-aq geologııalyq derekter bazasy ınvestorlar úshin qolaısyz sanalady», - dep jazylǵan «Jer qoınaýyn paıdalaný jáne ınvestıtsııalyq ahýaldy jaqsartý máseleleri týraly» QR zańynyń konsýltatıvtik qujatynda.

Ónerkásip jáne qurylys mınıstrligi ınvestıtsııalyq klımatty jaqsartý maqsatynda birneshe baǵyttaǵy zańnamany jetildire túsý mańyzdy dep esepteıdi.

«2030 jylǵa qaraı Qazaqstan ınvestıtsııalyq tartymdylyq reıtıngisinde 50-orynda bolýyna jaǵdaı jasalady. Ol úshin jer qoınaýyn paıdalaný salasyndaǵy zańnamany jetildirý qajet», - dep máseleni sheshý joly usynylǵan.

Degenmen mınıstrlik Qazaqstannyń reıtıngidegi pozıtsııasy 2025 jyldan bastap jaqsara túsedi degen ustanymda.

Sonymen qosa konsýltatıvtik qujatta elimizdegi óńdeý ónerkásipteriniń jaı-kúıi de jazylǵan. Máselen, Qazaqstanda alıýmınııdiń tek 17% óńdelip, qalǵany eksportqa jiberiledi.